كەشە ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆتىڭ توراعالىق ەتۋىمەن كوميسسيانىڭ كەزەكتى وتىرىسى ءوتتى. وتىرىستا ورتالىق سايلاۋ كوميسسياسى پرەزيدەنتتىڭ جارلىعىمەن تاعايىندالعان پارلامەنت سەناتىنىڭ دەپۋتاتتارىن تىركەدى جانە قازاقستان رەسپۋبليكاسى ءماسليحاتتارىنىڭ دەپۋتاتتىعىنا كانديداتتاردىڭ رەسپۋبليكالىق بيۋدجەت قاراجاتىنان جابىلاتىن شىعىستارىنىڭ نورماتيۆتەرىن بەكىتتى.
قازاقستان رەسپۋبليكاسى پرەزيدەنتىنىڭ 2011 جىلعى 23 قاراشاداعى «قازاقستان رەسپۋبليكاسى پارلامەنتى سەناتىنىڭ دەپۋتاتتارىن تاعايىنداۋ تۋرالى» جارلىعىنىڭ نەگىزىندە ورتالىق سايلاۋ كوميسسياسى يكرام ادىربەكوۆتى, مۇحتار التىنباەۆتى, بەرىك يماشەۆتى, قايرات ءماميدى, باۋىرجان مۇحامەدجانوۆتى, ەرلان نىعماتۋليندى جانە ليۋدميلا پولتوراباتكونى قازاقستان رەسپۋبليكاسى پارلامەنتى سەناتىنىڭ دەپۋتاتتارى رەتىندە تىركەدى. ودان سوڭ كوميسسيا توراعاسى پارلامەنت سەناتىنىڭ تىركەلگەن دەپۋتاتتارىنا ءتيىستى كۋالىكتەر مەن ومىراۋعا تاعاتىن بەلگىلەردى تاپسىردى.
– پرەزيدەنتتىڭ جارلىعىمەن ەكىنشى مەرزىمگە سەناتور بولىپ تاعايىندالدىق, – دەدى مۇحتار التىنباەۆ كۋالىكتەر مەن ومىراۋعا تاعاتىن بەلگىلەردى تاپسىرۋ راسىمىنەن كەيىن جۋرناليستەرگە بەرگەن سۇحباتىندا. – بۇل بىزگە جۇكتەلگەن ۇلكەن مىندەت جانە سەنىم. ءبىز ەلباسىنىڭ الدىندا, قازاقستان حالقىنىڭ الدىندا ءوزىمىزگە جۇكتەلگەن مىندەت پەن سەنىمدى اقتايمىز.
كوميسسيا وتىرىسىندا, سونداي-اق قازاقستان رەسپۋبليكاسى ءماسليحاتتارىنىڭ دەپۋتاتتىعىنا كانديداتتاردىڭ رەسپۋبليكالىق بيۋدجەت قاراجاتىنان جابىلاتىن شىعىستارىنىڭ نورماتيۆتەرى دە بەكىتىلدى. قۋاندىق تۇرعانقۇلوۆتىڭ ايتۋىنشا, ورتسايلاۋكوم قابىلداعان قاۋلى بويىنشا زاڭعا سايكەس وبلىستىق, استانا جانە الماتى قالالىق ءماسليحاتتاردىڭ دەپۋتاتتىعىنا كانديدات رەتىندە تىركەلگەن ءاربىر ۇمىتكەرگە ۇگىت شارالارى مەن كولىك شىعىستارىنا بيۋدجەتتەن 349 مىڭ تەڭگە, ال قالالىق جانە اۋداندىق ءماسليحاتتاردىڭ دەپۋتاتتىعىنا كانديداتتار ءۇشىن 179 مىڭ تەڭگە ءبولىنەتىن بولادى. ونىڭ سىرتىندا ءاربىر تىركەلگەن ءماسليحات دەپۋتاتتىعىنا كانديدات سايلاۋالدى ۇگىت جۇرگىزۋ ءۇشىن ءوزىنىڭ سايلاۋ قورىن دا قۇرا الادى.
وتىرىستا ورتسايلاۋكوم الداعى سايلاۋدا قولدانىلاتىن سايلاۋشىلار ءتىزىمىنىڭ نىسانى مەن ۋچاسكەلىك سايلاۋ كوميسسياسىنىڭ سايلاۋ ۋچاسكەسىنىڭ اشىلۋى تۋرالى حاتتاماسىنىڭ نىسانىن بەكىتتى جانە ءماجىلىس دەپۋتاتتارىنىڭ كەزەكتەن تىس سايلاۋى بويىنشا سايلاۋ بيۋللەتەندەرىن «قازاقستان رەسپۋبليكاسى ۇلتتىق بانكىنىڭ بانكنوت فابريكاسى» شارۋاشىلىق ءجۇرگىزۋ قۇقىعىنداعى رەسپۋبليكالىق مەملەكەتتىك كاسىپورنىندا ءازىرلەنەدى دەپ شەشىم قابىلدادى. ال ءماسليحات دەپۋتاتتارىن سايلاۋ بويىنشا سايلاۋ بيۋللەتەندەرىن ءتورت وڭىرلىك ۇيىم – اقمولا, قوستاناي, سولتۇستىك قازاقستان وبلىستارى مەن استانا قالاسى ءۇشىن – استانا پوليگرافياسى, شىعىس قازاقستان, قاراعاندى, پاۆلودار وبلىستارى ءۇشىن – «اركو» جشس, الماتى, اقتوبە, اتىراۋ, ماڭعىستاۋ وبلىستارى مەن الماتى قالاسى ءۇشىن – «ابك» جشس-نىڭ باسپاحاناسى, جامبىل, باتىس قازاقستان, قىزىلوردا جانە وڭتۇستىك قازاقستان وبلىستارى ءۇشىن – «سەنىم» باسپا ورتالىعى باسىپ شىعاراتىن بولادى. وسك حاتشىسى باقىت مەلدەشوۆتىڭ حاباردار ەتۋىنشە, بارلىق بيۋللەتەندەر قاجەتتى قورعانۋ دەڭگەيىندە قامتاماسىز ەتىلەدى.
وتىرىستان سوڭ وتكەن بريفينگتە ق.تۇرعانقۇلوۆ باق وكىلدەرىن سايلاۋ ناۋقانىنىڭ بارىسىمەن دە تانىستىردى. توراعانىڭ اتاپ وتۋىنشە, قازىرگى ۋاقىتتا ءماسليحاتتار دەپۋتاتتاعىنا 10 كانديدات ۇسىنىلعان. ولاردىڭ بىرەۋىن قىزىلوردا وبلىستىق ءماسليحاتى دەپۋتاتتىعىنا كاديدات رەتىندە قوعامدىق بىرلەستىك, ال 9 ۇمىتكەر ءوز كانديداتۋرالارىن ماڭعىستاۋ وبلىسى بەينەۋ اۋداندىق ءماسليحاتىنا كانديدات رەتىندە ۇسىنعان. ءاليسۇلتان قۇلانباي.