كەشە پارلامەنت سەناتىنىڭ كەزەكتى وتىرىسى بولىپ, وندا پالاتا بيۋروسى ۇسىنعان كۇن ءتارتىبى قارالماس بۇرىن ۇيىمدىق ماسەلەلەر قارالدى. ونى سەنات توراعاسىنىڭ ورىنباسارى الەكساندر سۋدين اشىپ, جۇرگىزىپ وتىردى. ول العاشقى ءسوزدى وتىرىسقا قاتىسىپ وتىرعان پرەزيدەنت اكىمشىلىگىنىڭ باسشىسى اسلان مۋسينگە بەردى.
اسلان ەسبولاي ۇلى ءوزىنىڭ سەناتقا پرەزيدەنت نۇرسۇلتان نازارباەۆتىڭ تاپسىرماسىمەن كەلگەنىن ايتتى. قازاقستان رەسپۋبليكاسى كونستيتۋتسياسىنىڭ 50-بابى 2-تارماعىنا سايكەس, مەرزىمدەرى اياقتالعان سەنات دەپۋتاتتارىنىڭ ورنىنا پرەزيدەنت جارلىعىمەن باسقا دەپۋتاتتار تاعايىندالدى. سونىڭ ىشىندە مۇحتار التىنباەۆ, بەرىك يماشەۆ, قايرات ءمامي جانە باۋىرجان مۇحامەدجانوۆ قايتادان, ال يكرام ادىربەكوۆ, ەرلان نىعماتۋلين جانە ليۋدميلا پولتوراباتكو جاڭادان تاعايىندالدى, دەدى. سونداي-اق اسلان مۋسين وكىلەتتى مەرزىمدەرى اياقتالعان نۇرلىعايىم جولداسباەۆا, مۇحامبەت كوپەي جانە قۋانىش سۇلتانوۆقا مەملەكەتتىك قىزمەتتەگى ۇزاق جىلعى جەمىستى ەڭبەكتەرى ءۇشىن ەلباسىنىڭ اتىنان العىس ايتاتىنىن جەتكىزدى. ودان ءارى پرەزيدەنت اكىمشىلىگىنىڭ باسشىسى پارلامەنت جانە ونىڭ دەپۋتاتتارىنىڭ مارتەبەسى تۋرالى كونستيتۋتسيالىق زاڭنىڭ 9-بابىنا سايكەس ەلباسى ن.نازارباەۆ سەنات توراعاسى قىزمەتىنە قايرات ءماميدىڭ كانديداتۋراسىن ۇسىناتىنىن جاريالاپ, دەپۋتاتتاردىڭ قولداۋلارىن ءوتىندى.
سەناتورلار, رەگلامەنتكە ءسايكەس, الدىمەن ساناق كوميسسياسىن سايلاپ, ودان سوڭ ۇسىنىلعان كانديداتۋرانى داۋىس بەرۋ بيۋللەتەنىنە ەنگىزىپ, جاسىرىن داۋىس بەرۋ تارتىبىمەن سايلاۋ وتكىزدى. سايلاۋدان كەيىن ءسوز العان ساناق كوميسسياسىنىڭ توراعاسى بولات جىلقىشيەۆ قايرات ءماميدىڭ ءبىراۋىزدان سايلانعانىن جاريالادى. توراعالىق ورىندىققا وتىرعان سوڭ ق.ءمامي وزىنە سەنىم كورسەتكەن ەلباسىعا جانە قولداۋ بىلدىرگەن ارىپتەستەرىنە العىسىن ايتىپ, الداعى ۋاقىتتا دا ابىروي بيىگىنەن كورىنۋگە جۇمىس ىستەيتىنىن جەتكىزدى. ال وكىلەتتىك مەرزىمدەرى اياقتالعان م.كوپەي, ق.سۇلتانوۆ جانە ن.جولداسباەۆا الدىمەن ۇلكەن سەنىم كورسەتىپ, وزدەرىن سەناتورلىققا تاعايىنداعان ەلباسىنا, سوسىن بىرلەسە جۇمىس ىستەگەن ارىپتەستەرىنە, اپپارات قىزمەتكەرلەرىنە ريزاشىلىقتارىن ءبىلدىرىپ, سەناتورلارمەن قوشتاستى.
سەنات توراعاسى ق.ءمامي وكىلەتتىگى اياقتالعان م.كوپەيدىڭ ورنىنا سەنات توراعاسىنىڭ ورىنباسارلىعىنا قايرات يششانوۆتىڭ كانديداتۋراسىن ۇسىندى. رەگلامەنتكە سايكەس, اشىق داۋىس بەرۋ تارتىبىمەن سايلاناتىن ورىنباسارلىق قىزمەتكە ق.يششانوۆ ءبىراۋىزدان سايلاندى.
وسىدان كەيىن دەپۋتاتتار كۇن تارتىبىندەگى ماسەلەلەردى قاراۋعا كىرىستى. الدىمەن ءماجىلىس ماقۇلداعان قازاقستان مەن بەلارۋس ۇكىمەتتەرى اراسىنداعى ازاماتتىق قورعانىس, توتەنشە جاعدايلاردىڭ الدىن الۋ جانە ولاردى جويۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى زاڭ جوباسى قارالدى. بۇل تۋرالى توتەنشە جاعدايلار ءمينيسترى ۆ.بوجكو جانە سەناتور ع.قاسىموۆ باياندادى. زاڭ ءبىراۋىزدان قابىلداندى. كەلەسى ماسەلە ءماجىلىس ماقۇلداعان مادەني قۇندىلىقتاردى زاڭسىز اكەلۋگە, اكەتۋگە جانە ولارعا مەنشىك قۇقىعىن بەرۋگە تىيىم سالۋ مەن ولاردىڭ الدىن الۋعا باعىتتالعان شارالار تۋرالى كونۆەنتسيانى راتيفيكاتسيالاۋ تۋرالى زاڭنىڭ جوباسى ءجونىندە بولدى. بۇل ماسەلە بويىنشا نەگىزگى باياندامانى جاساعان مادەنيەت ءمينيسترى م. قۇل-مۇحاممەدكە دە, قوسىمشا بايانداما جاساعان سەناتور ج.ەرعاليەۆكە دە ەشقانداي سۇراق بولماي, زاڭ ءبىراۋىزدان قابىلداندى.
ءۇشىنشى جانە ءتورتىنشى ماسەلەلەر كەدەن وداعىنا قاتىستى شارت پەن كەلىسىمدى راتيفيكاتسيالاۋ تۋرالى زاڭ جوبالارىنا ارنالدى. العاشقىسى كەدەن وداعىنا مۇشە مەملەكەتتەردىڭ كەدەن زاڭناماسىن بۇزعانى ءۇشىن قىلمىستىق جانە اكىمشىلىك جاۋاپكەرشىلىككە تارتۋ ەرەكشەلىكتەرى تۋرالى شارتتى, ەكىنشىسى وسى ىستەر بويىنشا قۇقىقتىق كومەك جانە ءوزارا ءىس-قيمىل تۋرالى كەلىسىمدى راتيفيكاتسيالاۋدى قاراستىرادى. نەگىزگى باياندامانى جاساعان قارجى ءمينيسترى ب.جامىشەۆكە ءبىرقاتار سۇراقتار بولعانىمەن, زاڭ ءبىراۋىزدان قابىلداندى.
ودان كەيىنگى ماسەلە ەكى وقىلىمنان ءوتىپ, بىرقاتار وزگەرىستەرىمەن ماجىلىسكە قايتارىلعان «نەكە (ەرلى-زايىپتىلىق) جانە وتباسى تۋرالى» كودەكس جوباسىنا ارنالدى. ءماجىلىستىڭ ۋاقىتشا بولماۋى كەزىندە ونىڭ فۋنكتسياسىن سەنات اتقارۋىنا بايلانىستى ۇسىنىلعان كودەكس وزگەرىستەرىمەن تولىق قابىلداندى. كەيبىر زاڭنامالىق اكتىلەرگە مەملەكەتتىك الەۋمەتتىك تاپسىرىس ءماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسى مەن «نوتاريات تۋرالى» زاڭ جوباسى دا ماجىلىسكە قايتارىلعان بولاتىن. ەندى ولار دا ۇسىنىلعان وزگەرىستەرىمەن تولىقتاي قابىلداندى.
وتىرىس سوڭىنان دەپۋتاتتاردىڭ ورتالىق ورگاندارعا جولدايتىن ساۋالدارى جاريالاندى.
جاقسىباي سامرات.