الماتىدا «مەملەكەتتىك تاپسىرىس-2012» اكتسياسى اياسىندا كەڭەس بولىپ ءوتتى. بۇل باسقوسۋعا الماتى قالاسىنىڭ اكىمى احمەتجان ەسىموۆ جانە «سامۇرىق-قازىنا» ۇاق اق باسقارماسى توراعاسىنىڭ ورىنباسارى قۋاندىق بيشىمباەۆ قاتىستى. اكتسيا اياسىنداعى كەڭەستە «سامۇرىق-قازىنا» ۇلتتىق ءال-اۋقات قورى مەن قالالىق اكىمدىك اراسىندا 2012 جىلعا ىنتىماقتاستىق مەموراندۋمىنا قول قويىلدى.
الماتى قالاسىنىڭ اكىمى احمەتجان ەسىموۆتىڭ ايتۋىنشا, «سامۇرىق-قازىنا» كومپانياسى مەن قالالىق اكىمدىك اراسىنداعى «مەملەكەتتىك تاپسىرىس» اكتسياسىنىڭ وتكىزىلە باستاعانىنا بيىل ەكى جىل تولعان. كوپشىلىككە بەلگىلى, مەملەكەت باسشىسى نۇرسۇلتان نازارباەۆتىڭ مەملەكەتتىك ساتىپ الۋ سالاسىندا قازاقستاندىق ۇلەستى ودان ءارى ۇلعايتۋ جونىندەگى تاپسىرماسى ءوز ناتيجەسىن بەرىپ, جوعارى كورسەتكىشتەرگە قول جەتكىزۋدە.
– شىن مانىسىندە, بۇل باعىتتا بىرقاتار تابىستارعا قول جەتتى. ماسەلەن, بيىلعى 2011 جىلدىڭ وتكەن توعىز ايىندا الماتى قالاسى كاسىپكەرلەرى مەن ۇلتتىق كومپانيالار قورى اراسىندا جالپى سوماسى 566 ميلليارد تەڭگەنى قۇرايتىن ون جەتى مىڭنان استام كەلىسىمشارت جاسالدى. سونداي-اق, 118 ميلليارد تەڭگەنىڭ قىزمەتى كورسەتىلىپ, 141 ميلليارد تەڭگەنىڭ جۇمىسى ورىندالدى.
ال, ەندى الدىڭعى جىلى, بىزدەر بۇل اكتسيانى العاش رەت وتكىزگەندە 118 ميلليارد تەڭگەنىڭ عانا كەلىسىمشارتى جاسالعان بولاتىن. قازىر ونىڭ كولەمى ءتورت ەسەگە دەيىن ۇلعايىپ وتىر. سونىمەن بىرگە, «سامۇرىق-قازىنا» كومپانياسىنىڭ مەملەكەتتىك تاپسىرىستارىنىڭ كولەمى 3,2 تريلليون تەڭگەنى قۇراۋى دا كوپ نارسەدەن حابار بەرسە كەرەك, – دەيدى قالا اكىمى ءوز ويىن ورتاعا سالىپ.
ءسوز رەتى كەلگەندە اتاپ ايتارلىعى, ۇلتتىق كومپانيالاردىڭ ساتىپ الۋداعى قازاقستاندىق ۇلەستىڭ ۇلعايۋى, تۇتاستاي العاندا وڭتۇستىك استانانىڭ الەۋمەتتىك-ەكونوميكالىق كورسەتكىشتەرىنە ايتارلىقتاي ىقپال ەتتى. بيىلعى جىلدىڭ وتكەن ون ايىندا ونەركاسىپتىك ءونىم ءوندىرۋ ون بەس پايىزعا ۇلعايىپ, 352 ميلليارد تەڭگەدەن استام ءونىم شىعارىلدى.
«سامۇرىق-قازىنا» ۇلتتىق قورى باسقارماسى توراعاسىنىڭ ورىنباسارى قۋاندىق بيشىمباەۆتىڭ ەسەپتەۋىنشە, «قازاقستاندىق ۇلەستىڭ ۋاقىت وتكەن سايىن ارتا ءتۇسۋى – بۇل ستراتەگيالىق ماڭىزدى مىندەت». «سامۇرىق-قازىنا» كومپانياسى كەلەر جىلى دا بۇل باعىتتاعى ءىس-شارالاردى ودان ءارى جالعاستىرماق. بۇل ورايدا ۇزاق مەرزىمدى كەلىسىمشارتتارعا, وتاندىق وندىرۋشىلەردى نەسيەلەندىرۋگە قاتىسۋ جانە وزگە دە جوبالار قولعا الىنباق.
باقىت بالعارينا.