پاريجدە 22 قاراشادا ەكسپو-2017 كورمەسىن ۇيىمداستىرۋ كوميتەتىنىڭ توراعاسى, قر پرەمەر-ءمينيسترىنىڭ ورىنباسارى ومىرزاق شوكەەۆ باستاعان قازاقستان دەلەگاتسياسى حالىقارالىق كورمەلەر باس اسسامبلەياسىنىڭ مەرەيتويلىق 150-ءشى سەسسياسىنا 2017 جىلعى كورمە وتكىزۋگە كانديدات ەل رەتىندە قاتىستى.
سەسسيادا دەلەگاتسيا باسشىسى ومىرزاق شوكەەۆ ءسوز سويلەپ, قازاق دالاسى ارقىلى وتكەن جىبەك جولى ەجەلدەن ءبىز تۋعان مەكەندى باتىس پەن شىعىستى جالعاستىرۋشى ەتسە, سوڭعى 20 جىل ىشىندە ەۋرازيا قۇرلىعىنىڭ ەكى بولىگى – ەۋروپا مەن ازيا اراسىنداعى ساۋدا جانە مادەني قاتىناستاردىڭ ەداۋىر دەڭگەيگە كوتەرىلگەنىن نازارعا سالدى. ال قازاقستان بولسا, وسى بايلانىستاردىڭ ەڭ توقايلاسقان تۇسىندا تۇر. ءبىز كورمەگە ۇسىنىپ وتىرعان تاقىرىپ – «بولاشاق ەنەرگياسى» دەپ اتالادى. مۇناي, گاز, كومىر سىندى قۋات كوزدەرىنىڭ قورىمەن جانە ۋران بايلىعىمەن الەمدەگى وندىققا كىرەتىن قازاقستان اركەز بەيبىت ماقساتتى تۋ ەتەدى. ءوزىنىڭ يادرولىق قارۋدى تاراتپاۋ جونىندەگى بەيبىت باستامالارىمەن ەرەكشەلەنەتىن جانە يادرولىق قارۋدىڭ زاردابىن شەككەن ءبىزدىڭ ەل قورشاعان ورتانى قورعاۋدىڭ, اتوم ەنەرگياسىن بەيبىت ماقساتتارعا جۇمساپ, ادامنىڭ يگىلىگىنە اينالدىرۋدىڭ قانشالىقتى ماڭىزدى ەكەنىن جاقسى بىلەدى. ال جوعارىداعى ايتىلعان ماسەلەلەردىڭ الەم كۇن تارتىبىندە تۇرعانى انىق, دەدى.
سەسسيادا قازاقستان تاراپىنان وزگە دە شەشەندەر شىعىپ ءسوز ءسويلەدى. ولاردىڭ قاتارىندا ەكونوميكالىق ينتەگراتسيا ءمينيسترى جانار ايتجانوۆا, سىرتقى ىستەر مينيسترلىگىنىڭ جاۋاپتى حاتشىسى, ەكسپو-2017-ءنىڭ ۇلتتىق ۇيلەستىرۋشىسى ءراپىل جوشىباەۆ, استانا قالاسى اكىمىنىڭ ورىنباسارى قانات سۇلتانبەكوۆ بولدى.
پاريج سەسسياسىندا استانامەن قاتار, كورمە وتكىزۋگە تالاپكەر بەلگيانىڭ لەج قالاسىنىڭ دا ۇسىنىسى قاراستىرىلدى. ال ەكسپو-2017-ءنىڭ قاي قالادا وتكىزىلەتىنى تۋرالى شەشىم باس اسسامبلەيانىڭ 2012 جىلدىڭ جەلتوقسان ايىندا وتەتىن باسقوسۋىندا داۋىس بەرۋ ارقىلى شىعارىلاتىن بولادى.
«ەگەمەن-اقپارات».