ەندى قوستانايلىقتار كوممۋنالدىق قىزمەت تۇرلەرىنىڭ اقىسىن ءبىر ورتالىقتان تولەيتىن بولدى. قوستانايدا ءبىرىنشى كوممۋنالدىق قىزمەت ورتالىعىن «قوستاناي سۋ» مەملەكەتتىك-كوممۋنالدىق كاسىپورنى ءوز باستاماسىمەن اشتى.
«ەندى قالالىقتار كوممۋنالدىق قىزمەت تۇرلەرى اقىسىن بۇرىنعىداي «كتەك», «كوستاناي-سۋ», «تازالىك–2012» جانە باسقا دا كاسىپورىنداردى ىزدەپ جۇرمەي, ءبىر جەردەن, ءبىر وپەراتورعا تولەيتىن بولادى. بۇل ءۇشىن قالا اكىمدىگى «قوستاناي سۋعا» عيمارات ۇسىندى, ولار عيماراتتى جوندەپ, رەتكە كەلتىرىپ, وسى ورتالىقتى اشتى», دەدى قوستاناي قالاسىنىڭ اكىمى بازىل جاقىپوۆ.
«قوستاناي سۋ» مەملەكەتتىك-كوممۋنالدىق كاسىپورنى بۇل جۇمىس ءۇشىن 15 ميلليون تەڭگە قارجى جۇمسادى. ورتالىق تاڭعى 08.00-20.00-عا دەيىن ءۇزىلىسسىز جۇمىس ىستەيدى. بۇل تۇرعىندارعا وتە قولايلى بولماق. «قوستاناي سۋ» مكك ديرەكتورى ەركەبۇلان فايزۋلاەۆ ورتالىقتى جوندەۋگە, جابدىقتاۋعا كەتكەن قارجى ۇنەمدەلگەن, تۇسكەن تابىستىڭ ەسەبىنەن جۇمسالعانىن ايتتى. سونىمەن قاتار, مۇندا تەك كوممۋنالدىق قىزمەتتىڭ اقىسىن عانا تولەمەيدى, تۇتىنۋشىنىڭ وعان قاتىستى سۇراعى بولسا ول كاسىپورىنداردى ارالاماي-اق, وسى جەردەن شەشۋىنە بولادى. ورتالىقتا كوممۋنالدىق قىزمەتتىڭ 20 ءتۇرىنىڭ اقىسىن تولەۋگە بولادى, ولاردىڭ ءتىزىمى جازىلعان. ورتالىق كوممۋنالدىق قىزمەت تۇرلەرى ءۇشىن ەڭ كوپ دەگەندە 50 تەڭگە عانا كوميسسيا ۇستايتىن بولادى.
ءنازيرا جارىمبەت, «ەگەمەن قازاقستان»