اقجار اۋدانى وبلىس ورتالىعىنان الىس ورنالاسقانىنا قاراماستان, مۇندا شارۋاشىلىقتارعا وزىق تەحنولوگيالار كەڭىنەن ەنگىزىلىپ كەلەدى. سولاردىڭ بىرنەشەۋىن جەكە كاسىپكەر مارات شاپەنوۆ ءوز قاراجاتىنا جۇزەگە اسىردى.
مارات كوزىن تىرناپ اشقاننان اۋىل توڭىرەگىنەن ۇزاعان ەمەس. اكە-شەشە تالىمىمەن اتا كاسىپتى سەرىك ەتىپ, سودان بەرى ءتورت ت ۇلىك وسىرۋمەن اينالىسادى. بەرتىنگە دەيىن اسىل تۇقىمدى مالدى تابىنداپ باقسا, ەندى ءسۇت وندىرۋگە دە مىقتاپ بەت بۇردى. ول ءۇشىن اۋىل ماڭىنداعى يەسىز جاتقان جەردى كادەگە جاراتىپ, مال شارۋاشىلىعى كەشەنىن تۇرعىزدى. 1 ميلليارد 300 ميلليون تەڭگە ينۆەستيتسيا قۇيدى. زاماناۋي قۇرال-جابدىقتار ورناتىپ, جەلىنى جەر يىسكەگەن 600 سيممەنتال سيىرىن ساتىپ الدى.
– ەكى جىل ىشىندە توككەن تەر زايا كەتكەن جوق. تاۋەلسىزدىك كۇنى قارساڭىندا 80 جەرلەسىمدى جۇمىسپەن قامتاماسىز ەتتىك. ورتاشا ەڭبەكاقى 120 مىڭ تەڭگە, – دەيدى اۋىلداستارىنا ۇلكەن قۋانىش سىيلاعان ەل ازاماتى.
ءسۇت كەشەنىنىڭ مەڭگەرۋشىسى بايان جاروۆانىڭ ايتۋىنشا, ساۋىنشىلار گەرمانيادان اكەلىنگەن سوڭعى ۇلگىدەگى قوندىرعىلاردىڭ ءتىلىن تەز مەڭگەرگەن. ارنايى ورىنعا 24 سيىر بىردەن ەنگىزىلىپ, ساۋىن بار-بولعانى 7 مينۋتتا اياقتالادى. ءونىم ساپاسى دا, مايلىلىعى دا باستى نازارعا الىنعان. الدا جىلىنا 2100 توننا ءسۇت ءوندىرۋ مىندەتى تۇر.
وسىلايشا اۋىل دەسە جارعاق قۇلاعى جاستىققا تيمەي جۇرگەن كاسىپكەر ەندى ءسۇتتى تەرەڭدەتە وڭدەپ, ايران, قايماق, ىرىمشىك شىعاراتىن زاۋىت سالۋدى ويلاستىرىپ وتىر.
ءومىر ەسقالي, «ەگەمەن قازاقستان»
سولتۇستىك قازاقستان وبلىسى,
اقجار اۋدانى