ينتەرنەت كوزدەرىنەن الىنعان دەرەكتەر سوڭعى كەزدەرى ەلىمىزدە ءار جىل سايىن ءبىر ميلليوننان استام ادام وفتولمولوگيالىق سالا ماماندارىنان كومەك الاتىنىن كورسەتەدى. ونىڭ ءتورت ءجۇز مىڭعا جۋىعىن پوتولوگيالىق ەرەكشەلىكتەرى بويىنشا كوز دارىگەرىنە تۇڭعىش رەت كەلىپ قارالعاندار قۇرايدى ەكەن. وسىنداي جاعدايدا ەلورداسى استانا مەن مەگوپوليس قالا الماتىداعى ورتالىقتاردىڭ جۇكتەمەسى قالىپتى مولشەردەن كوبەيگەن. بۇگىندە دەرتتىڭ وسى ءتۇرى بويىنشا ەمدىك شارالاردى رەسەيدەن الىپ جۇرگەن وتانداستىرىمىزدىڭ سانى دا از ەمەس سەكىلدى.
تاۋەلسىزدىك مەرەكەسى قۇرمەتىنە اقتوبە قالاسىندا مەملەكەت-جەكەمەنشىك ارىپتەستىگى اياسىندا بوي كوتەرگەن وفتولمولوگيالىق ورتالىق وسى ولقىلىقتىڭ ورنىن تولتىردى دەۋگە ابدەن بولادى. مۇنداعى ەمحانا مەن اۋرۋحانا جۇيەسىندەگى بىرىڭعاي كەشەنگە ەڭ سوڭعى زاماناۋي ۇلگىدەگى قۇرال-جابدىقتار مەن جوعارى تەحنولوگيالىق قوندىرعىلار ورناتىلعان.
جاڭا ورتالىققا اقتوبەدە قۇرىلعان مەديتسينالىق كلاستەردىڭ تيگىزەتىن شاپاعاتى دا ەداۋىر ەكەنى عيماراتتىڭ اشىلۋ ءراسىمى كەزىندە اشىق ايتىلدى. ويتكەنى وسى «كوز جارىعى» دەپ اتالعان تەڭدەسى جوق كلينيكادا كلاستەر قۇرامىنداعى م.وسپانوۆ اتىنداعى اقتوبە مەملەكەتتىك مەديتسينا ۋنيۆەرسيتەتىنىڭ كوز اۋرۋلارى كافەدراسى ورنالاسقان. تەوريا مەن تاجىريبەنىڭ, عىلىم مەن ءبىلىمنىڭ ءبىر ارناعا توعىسار تۇسى دا ەل وڭىرلەرى اراسىندا ەشقانداي بالاماسى جوق وسى جاڭا وفتولمولوگيالىق ورتالىق بولىپ وتىر.
يننوۆاتسيالىق تەحنولوگيا ارنايى مامانداندىرىلعان بىلىكتى ماماندار توبىن قاجەت ەتەدى. بۇل رەتتە ولار ءوز تاجىريبەلەرىن الەمنىڭ ەڭ ۇزدىك كلينيكالارىنان تولىقتىرىپ قايتىپتى. جاڭا كلينيكادا ەل ايماقتارىندا بۇعان دەيىن بولىپ كورمەگەن كۇردەلى وتالار جاسالماق. ونىڭ ءبارى نەگىزىنەن مەملەكەتتىك تاپسىرىس شەڭبەرىندە جۇرگىزىلمەك. بۇل جونىندە گازەت تىلشىسىنە «دارۋ» ەمدەۋ-ساۋىقتىرۋ ورتالىعىنىڭ جەتەكشىسى, جوبا ينۆەستورى عالىمجان ەلەۋوۆ ايتىپ بەردى. مۇنداعى جوعارى مامانداندىرىلعان ەمحانالىق جانە ستاتسيونارلىق ەم تۇرلەرى جاس تالعامايدى. وفتولمولوگيالىق ورتالىق ەرەسەكتەر مەن بالالارعا تەڭ دەڭگەيدە مەديتسينالىق كومەك كورسەتە بەرەدى. ونىڭ قامتىلۋ اۋماعىنا رەسپۋبليكانىڭ باتىس وڭىرىندەگى اقتوبە, اتىراۋ, باتىس قازاقستان, ماڭعىستاۋ جانە قىزىلوردا وبلىستارى كىرەدى دەدى ول ودان ءارى.
مەملەكەت پەن ءىرى بيزنەستىڭ ءوزارا كەلىسىمى مەن تۇسىنىستىگى ارقاسىندا تۇرعىزىلعان جاڭا كلينيكانىڭ قوعامدىق-الەۋمەتتىك ءمانى مەن ماڭىزىنا ەشقانداي باعا جەتپەيدى. ورتالىقتىڭ باستى ماقساتى – تەك كوز اۋرۋلارىن ەمدەۋ مەن وتالار جاساۋ عانا ەمەس, سونىمەن بىرگە اتالعان دەرتتىڭ الدىن الۋ ماسەلەلەرىنە دە كەڭ ءورىس اشۋ جانە پروفيلاكتيالىق جۇمىستاردى ودان ءارى جانداندىرۋ بولىپ وتىر. مۇنداعى باستى ۇستانىم ەمدەۋ ساپاسىن جاقسارتۋعا جانە بىلىكتىلىك پەن كاسىبي شەبەرلىكتى كوتەرۋگە باعىتتالعان.
رەسپۋبليكا ايماقتارى اراسىندا تەڭدەسى جوق ءسانى مەن ساۋلەتى كەلىسكەن ءزاۋلىم ورتالىق قۇرىلىسى نەبارى ءبىر جىل ەكى ايدىڭ ىشىندە اياقتالعان. جوباعا ينۆەستوردىڭ قوسقان ۇلەسى 4 ميلليارد تەڭگەگە جۋىق.
مەملەكەت-جەكەمەنشىك ارىپتەستىگى شەڭبەرىندە اياقتالعان ورتالىق قۇرىلىسى تاۋەلسىزدىك مەرەكەسى كۇنىنە ارنالعان تارتۋ بولدى. وسىندايدا جارايسىڭ عالىمجان, رەسەيدە فەدوروۆ كلينيكاسى بولسا, قازاقستاندا ەلەۋوۆ كلينيكاسى نەگە بولماسقا دەگىڭ كەلەدى ەرىكسىز.
تەمىر قۇسايىن, «ەگەمەن قازاقستان»
اقتوبە