باعانالى وردا, باستى ورداعا اينالعان شىرايلى استانا بۇل كۇندە بەيبىتشىلىك پەن تاتۋلىقتى تۋ ەتكەن ەلدىڭ تۇعىرىنا اينالدى. ازات ەلدىڭ ايبىنى بولعان استانا ايشىعى بۇگىندە عالامدىق بيىككە كوتەرىلىپ, التى الاشتىڭ ايبار تۇتار ارقاۋى بولىپ وتىر. از عانا ۋاقىتتىڭ ىشىندە تالاي بەلەستى باعىندىرىپ, تالاي بيىككە ورلەگەن تاۋەلسىز قازاقستاننىڭ باس قالاسىنا بۇل كۇندە قۇرمەت بولەك.
وسى ورايدا ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنان تۋىندايتىن مىندەتتەردى جۇزەگە اسىرۋ نەگىزىندە تاراز تەمىر جول بەكەتىنەن «استانا. تاۋەلسىزدىك. رۋحاني جاڭعىرۋ» اتتى اقپاراتتىق پويىز جامبىل وبلىسىنىڭ اۋداندارىنا جول تارتتى. اقپاراتتىق پويىز سالتاناتتى تۇردە وبلىس ورتالىعىنان شىعىپ, ودان ءارى جامبىل – شۋ – قاشقانتەڭىز جانە جامبىل – جاڭاتاس باعىتتارى ارقىلى 25 بەكەتكە ايالدايتىن بولادى.
اقپاراتتىق پويىزدىڭ جولعا شىعۋ سالتاناتىندا ءسوز العان جامبىل وبلىسىنىڭ اكىمى كارىم كوكىرەكباەۆ جامبىلدىقتاردى ەل تاۋەلسىزدىگى كۇنىمەن قۇتتىقتاپ, وبلىستا مەرەكەلىك ءىس-شارالار باستاۋ العاندىعىن جەتكىزدى. سونىمەن قاتار اقپاراتتىق پويىز مۇشەلەرىنە ساتتىلىك تىلەدى.
– تاۋەلسىزدىك كۇنى قارساڭىندا جانە اتاۋلى مەرەكەگە وراي, تاراز قالاسىنان «استانا. تاۋەلسىزدىك. رۋحاني جاڭعىرۋ» اتتى اقپاراتتىق پويىز اۋداندارعا جول تارتقالى وتىر. بۇل بىرەگەي شارانى «ماڭگىلىك ەل» تابالدىرىعىن اتتاعان ەڭسەلى ەلوردامىز – استانا قالاسىنا كورسەتىلگەن قۇرمەتتىڭ ءبىرى دەپ بىلەمىن. ويتكەنى استانا – ءححى عاسىرداعى الەم ەلدەرى اراسىندا بوي كوتەرگەن جالعىز ەلوردا. ال تاۋەلسىز قازاقستان – ەكى عاسىر توعىسىندا جاڭا استانا سالعان جالعىز مەملەكەت, – دەدى اكىم.
بۇدان كەيىن اقپاراتتىق پويىزدىڭ قوڭىراۋى قاعىلىپ, جۇك ۆاگوندارىنا 120 توننا اۋىلشارۋاشىلىق تاۋارلارى تيەلگەن وتاربا اۋدان ورتالىقتارىنا جول تارتتى. ونىڭ ىشىندە 50 توننا كارتوپ, 20 توننا پياز, 8 توننا ءسابىز, 18 توننا ۇن, 6 توننا كۇرىش, 6 توننا سۇيىق ماي, 10 توننا قانت, 2 توننا قاراقۇمىق تۇرعىندارعا ارزانداتىلعان باعامەن ۇسىنىلاتىن بولادى. سونىمەن بىرگە اقپاراتتىق پويىز قۇرامىندا وبلىستىق باسقارمالاردىڭ قىزمەتكەرلەرى, وڭىردەگى زيالى قاۋىم, ەتنومادەني بىرلەستىكتەردىڭ وكىلدەرى, ارداگەرلەر, دارىگەرلەر مەن مادەنيەت سالاسىنىڭ قىزمەتكەرلەرىنەن قۇرالعان 33 ادام بار.
اتالعان شارانىڭ ماقساتى – استانانىڭ جيىرما جىلدىق مەرەيتويىن جالپىحالىقتىق دەڭگەيدە وتكىزۋ, ەلوردانىڭ قازاقستاننىڭ قالىپتاسۋى مەن دامۋىنداعى اۋقىمدى تاريحي ءرولىن ناسيحاتتاۋ بولىپ وتىر. سونىمەن قاتار استانا – وڭىرلەردىڭ سەرپىندى دامۋىنىڭ فاكتورى ەكەندىگىن شالعاي ەلدى مەكەن تۇرعىندارىنا جەتكىزۋ, سونداي-اق اتاۋلى مەرەكە اياسىندا تۇرعىنداردى تەگىن مەديتسينالىق تەكسەرۋدەن وتكىزىپ, ارزانداتىلعان باعامەن اۋىلشارۋاشىلىق تاۋارلارىن ۇسىنۋ, ولارعا مەرەكەلىك كونتسەرتتىك باعدارلامالار قويىپ, حالىققا كوتەرىڭكى كوڭىل-كۇي سىيلاۋ دا مەرەكە قارساڭىندا باستى نازارعا الىندى. سونداي-اق ساپار بارىسىندا اقپاراتتىق توپ مۇشەلەرى ەكى باعىت بويىنشا وبلىس اۋداندارىن ارالاپ, جەرگىلىكتى تۇرعىندارعا ەلىمىزدە جۇرگىزىلىپ جاتقان وڭ ىستەر جونىندە بايانداپ, ولارعا استانا, تاۋەلسىزدىك جانە رۋحاني جاڭعىرۋ جايىندا اقپارات بەرەتىن بولادى.
حاميت ەسامان, «ەگەمەن قازاقستان»
جامبىل وبلىسى