تاۋەلسىزدىك كۇنى قارساڭىندا ەلىمىزدىڭ مادەنيەت جانە سپورت سالاسىنىڭ تانىمال قايراتكەرلەرىنە مەملەكەتتىك ناگرادالار تابىستاۋ ءراسىمى ءوتتى.
ەلباسىنىڭ ارنايى جارلىعى بويىنشا قازاقستاننىڭ مادەنيەت جانە سپورت, ادەبيەت پەن ونەردىڭ دامۋىنا ءوز ۇلەستەرىن قوسىپ جۇرگەن ازاماتتارعا مەملەكەتتىك ناگرادالار, مەدالدار جانە العىس حاتتارىن قازاقستان رەسپۋبليكاسىنىڭ مادەنيەت جانە سپورت ءمينيسترى ارىستانبەك مۇحامەدي ۇلى تابىستادى.
ماراپاتتاۋ راسىمىندە ءسوز العان مينيستر ارىستانبەك مۇحامەدي ۇلى قازاقستاندىقتاردى تاۋەلسىزدىك مەرەكەسىمەن قۇتتىقتاپ, 26 جىلدىڭ ىشىندە قازاقستان دۇنيە جۇزىنە تانىمال, الەمدە ەرەكشە ورنى بار ەلگە اينالعانىن ايتتى. «مۇنداي دارەجەگە ەڭ العاش ەلباسى نۇرسۇلتان نازارباەۆتىڭ ساليقالى ساياساتىنىڭ ارقاسىندا جانە تاتۋ-ءتاتتى ءومىر ءسۇرىپ جاتقان حالقىمىزدىڭ, ەلگە قىزمەت ەتىپ جاتقان ءاربىر قازاقستاندىقتىڭ ارقاسىندا جەتىپ وتىرمىز. ءبىزدىڭ اتا-بابالارىمىز ارمانداعان تاۋەلسىزدىك مەرەكەسى بارلىعىمىزعا تەك جاقسىلىق الىپ كەلسىن», دەپ ەلگە تىلەگىن جەتكىزدى.
قۇتتىقتاۋ سوزىنەن كەيىن ارىستانبەك مۇحامەدي ۇلى مەملەكەتتىك جانە قوعامدىق قىزمەتتە ەڭبەك سىڭىرگەن, ەلدىڭ الەۋمەتتىك-ەكونوميكالىق جانە مادەني دامۋىنا, حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەسى ءۇشىن وسكەمەن قالاسىنداعى «بەرەل» مەملەكەتتىك تاريحي-مادەني قورىق مۋزەيى» رمقك عىلىمي قىزمەتكەرى زاينوللا ساماشەۆتى, جازۋشى ەسەنعالي راۋشانوۆتى, سازگەر سەكەن تۇرىسبەكوۆتى, كينورەجيسسەر الەكسەي كامەنسكي جانە تاعى باسقا ەلىمىزگە بەلگىلى ازاماتتاردى «پاراسات» وردەنىمەن ماراپاتتادى.
«قۇرمەت» وردەنىمەن «ساكرالدى قازاقستان» عىلىمي-زەرتتەۋ ورتالىعىنىڭ باسشىسى بەرىك ابدىعالي ۇلى, «استانا وپەرا» مەملەكەتتىك وپەرا جانە بالەت تەاترى» كەاق جەتەكشى وپەرا ءسوليسى سۇندەت بايعوجين, مادەنيەت جانە سپورت مينيسترلىگى كوميتەت توراعاسىنىڭ ورىنباسارى عالىمجان مەلدەشوۆ, «ۇلتتىق شتاتتىق كوماندالار جانە سپورت رەزەرۆى ديرەكتسياسى» رمقك سپورتشى-نۇسقاۋشى, بالۋان ايبەك نۇعىماروۆقا تابىستالدى.
«قازاقستاننىڭ ەڭبەك سىڭىرگەن قايراتكەرى» اتاعى «ع.مۇسىرەپوۆ اتىنداعى قازاق مەملەكەتتىك اكادەميالىق بالالار جانە جاسوسپىرىمدەر تەاترى» رمقك ديرەكتورى ءسابيت ابدىحالىقوۆقا, اقىن ەلەنا ابدىقالىقوۆاعا, كومپوزيتور ارمان دۇيسەنوۆكە, «استانا قالاسى اكىمدىگىنىڭ «جاستار تەاترى» كمك اكتەرى ءادىل احمەتوۆكە, «مۋز تۆ» تەلەۆيزيالىق پرەمياسىنىڭ ديرەكتورى ارمان داۆلەتياروۆقا جانە تاعى باسقا ونەر يەلەرىنە بەرىلدى. ال ءىى دارەجەلى «دوستىق» وردەنىمەن ماراپاتتالعاندار اراسىندا لا سكالا تەاترىنىڭ باس ديريجەرى زۋبين مەنتا ء(ۇندىستان), ۆيولونچەليست سەرگەي رولدۋگين (رەسەي) جانە وپەرا ءانشىسى دومينگو پلاسيدو (يسپانيا) بار.
ءالي بيتورە, «ەگەمەن قازاقستان»