اتىراۋ قالاسىنداعى حيميا-بيولوگيا باعىتىنداعى نازارباەۆ زياتكەرلىك مەكتەبىندە تاۋەلسىزدىك كۇنىنە ارنالعان « ۇلى دالا مۇراگەرلەرى» اتتى وقۋشىلاردىڭ شىعارماشىلىق ەسەبى ءوتتى.
شارا ماحامبەت اتىنداعى وبلىستىق قازاق دراما تەاترىندا وقۋشىلاردىڭ جەتىستىكتەرىنە ارنالعان كورمەدەن باستالدى. حيميا, بيولوگيا, فيزيكا, ماتەماتيكا سىندى عىلىمداردى يگەرۋدە ارنايى جوبالاردى جاساقتاپ وتىرعان بالالاردىڭ جۇمىسى قويىلعان كورمە كوپشىلىكتىڭ قىزىعۋشىلىعىن تۋدىردى. توپىراقتى مۇناي قالدىقتارىنان تازارتۋ, جالىندى ميكروتولقىن ادىسىمەن ءوشىرۋ, ارزان ەلەكتر كوزىن الۋ جانە بۋدان سۋ تامشىلارىن جينايتىن قوندىرعىلار جاساۋ سەكىلدى عىلىمي جوبالاردى مەكتەپ وقۋشىلارى دايىنداعان. ساز جانە قىشتان بۇيىمدار جاساۋ, توقىما جانە تىگىن شەبەرحاناسى, اعاش-مەتالل جانە پلاستيك ماتەريالدارمەن جۇمىس ۇيىرمەسى, بەينەلەۋ, كيىز جانە ءجۇن ونىمدەرىمەن اينالىساتىن وقۋشىلاردىڭ تۋىندىلارى دا كورمەدەن ورىن تاپتى.
« ۇلى دالا مۇراگەرلەرى» اتتى وقۋشىلاردىڭ شىعارماشىلىق ەسەبىنە ارنالعان گالا-كونتسەرتتە مەكتەپتىڭ حور ۇجىمى, حورەوگرافيا, دومبىرا, اكتەرلىك شەبەرلىك ۇيىرمەلەرىنە قاتىسۋشىلار ونەر كورسەتتى. قۇرامىندا جۇزدەن استام وقۋشى بار دومبىرا وركەسترى ءبىر مەزگىلدە قۇرمانعازى كۇيلەرىن ورىنداسا, مەكتەپتىڭ كولەڭكە تەاترى «ماڭگىلىك ەل تاريحى» اتتى قويىلىمدا ەلىمىزدىڭ نەگىزگى تاريحي وقيعالارىن كورسەتتى.
نازارباەۆ زياتكەرلىك مەكتەپتەرىندەگى الەۋمەتتىك جوبالار, اتاپ ايتساق «ەكى اپتا اۋىلدا», «اتا-انا جۇمىسىندا 10 كۇن», «بالانى جۇمىسقا جەتەلە» سىندى وقۋشىلاردىڭ جازعى الەۋمەتتىك تاجىريبەلەرىنىڭ ورىندالۋى دا كوپشىلىك نازارىنا ۇسىنىلدى.
– تاۋەلسىزدىك مەملەكەتتەگى ءار سالانىڭ ءوز الدىنا دامىپ, عالامدىق وزگەرىستەرگە بەيىمدەلە وتىرىپ قالىپتاسۋىنا زور مۇمكىندىك بەردى. سونىڭ ءبىرى – ۇلتتىق ءبىلىم بەرۋ سالاسى. مەملەكەت باسشىسىنىڭ قولداۋىمەن اشىلعان نازارباەۆ زياتكەرلىك مەكتەپتەرى, ءسوز جوق, تاۋەلسىزدىكتىڭ جەمىسى. ساپالى ءبىلىم بەرۋدىڭ وتاندىق فلاگمانى رەتىندە وزگە ءبىلىم بەرۋ مەكەمەلەرىن العا جەتەلەيتىن, جاراتىلىستانۋ جانە ماتەماتيكا باعىتىنداعى عىلىمدى يگەرۋدە كوش باستاپ وتىرعان زياتكەرلىك مەكتەپتەر جەلىسىنىڭ قۇرىلعانىنا 10 جىل تولادى. ال اتىراۋ قالاسىنداعى حيميا-بيولوگيا باعىتىنداعى نازارباەۆ زياتكەرلىك مەكتەبىنىڭ جۇمىسى بەسىنشى جىلعا اياق باستى. اتالعان مەرزىم ىشىندە وڭىردەگى ەلباسى مەكتەبىنىڭ جەتكەن جەتىستىكتەرى, تابىسى كوپ, – دەيدى مەكتەپ ديرەكتورى ايداربەك ايتپۋكەشوۆ.
قازىر مەكتەپتە 700-دەن استام وقۋشى حالىقارالىق ستاندارتتار نەگىزىندە ءبىلىم الىپ جاتىر. «بارلىق وقۋشى تابىستى بولاتىن مەكتەپ!» دەگەن ۇراندى باستى ۇستانىمىنا اينالدىرعان ءبىلىم ورداسى بيىل نيدەرلاندتاعى حالىقارالىق مەكتەپتەر كەڭەسىنىڭ اككرەديتاتسياسىنان ءساتتى ءوتتى.
باقىتگۇل باباش, «ەگەمەن قازاقستان»
اتىراۋ