شىنبولات شىندىعىنىڭ شىراعداندارى

مەملەكەت باسشىسى ۇسىن­عان «رۋحاني جاڭعىرۋ» باع­دارلاماسى تالاپتارىمەن مەي­­لىنشە ۇندەس بولمىستاعى ايتىس الامانىندا ەلدىڭ ءار اي­ماعىنان جانە قىتاي حالىق رەسپۋبليكاسىنان سايدىڭ تاسىنداي ىرىكتەلىپ كەلگەن, «سەن تۇر, مەن اتايىن» دەيتىندەي سۇبەلى ءسوزدىڭ مايىن تامىزعان 14 جاس اقىن باسەكە كورىگىن قىزدىردى.

جىر دوداسىنىڭ اشىلۋ راسىمىندە ايتىس اقىندارى مەن كورەرمەن قاۋىمدى قالا اكىمى, «نۇر وتان» پارتياسى قا­لالىق فيليالىنىڭ توراعاسى اسقار ىدىرىسوۆ, قوعام قاي­راتكەرى ءاليحان بايمەنوۆ, اي­تىس­قا تورەلىك ەتۋشى قازىلار القاسىنىڭ توراعاسى, بەلگىلى جىر جۇيرىگى امانجول التاەۆ قۇتتىقتاپ, ءسوز سويلەدى. وسى ورايدا, قازىلار القاسىنىڭ قۇرامىندا ەلگە ەتەنە تانىس ايتىس اقىندارى تولەگەن جامانوۆ پەن ءومىرجان كوپبوسىنوۆ, كەنشى-اقىن, قازاقستان جازۋشىلار وداعىنىڭ مۇشەسى مۇسا تىلەۋوۆ, اقىن-جۋرناليستەر ابدوللا داستانوۆ پەن ىزتولەۋ ءتۇسىپوۆ بولعانىن ايتا كەتكەن ءجون.

ەكى كۇنگە ۇلاسقان جىر دوداسىندا جاس اقىندار شىن­بولاتتىڭ ىزىمەن شىندىقتى شى­رايىن ەنگىزە وتىرىپ شىر­­قادى. ايتىس بارىسىندا شىن­­كەڭنىڭ ۇلتتىق ونەر تۇر­لەرىن وركەندەتۋگە قاتىستى ولشەۋسىز ەڭبەگى مەن دارا تۇلعا رەتىندەگى قادىرى مەن قا­سيەتى دە ادەمى اسپەتتەلدى. ءبىر سوزبەن تۇيىندەسەك, ءار اقىن­نىڭ وزىنە ءتان تانىم-تۇي­سىگىنەن تۋىنداعان ورالىمدى ويلار مەن مارجان سوزدەر تىڭدارماننىڭ قۇلاق قۇرىشىن قاندىردى. جاندارىن جادىراتىپ, ءبىر­شاما قاۋىمنىڭ ساناسىنا ساۋلە قۇيدى. ناتيجەسىندە شىن­بولات دىلدەباەۆتىڭ اۋلەتى تاعايىنداعان ارنايى جۇل­دەلەردى تارازدىق راي ءدوڭ­باي, ۇلىتاۋلىق مۇقاعالي سەيت­قازى,  جاڭاارقالىق مەدەت نۇر­لان ۇلى جانە ساتباەۆ قالا­سىنىڭ نامىسىن قورعاعان جەڭىس تىلەكەنوۆ يەلەندى. ءىىى ورىنعا تيەسىلى ارقايسىسى 100 مىڭ تەڭگە كولەمىندەگى ەكى جۇلدەنى جەزقازعاندىق جو­لامان ماع­زۇموۆ پەن پاۆ­لودارلىق نۇر­قانات قاي­رات ءوزارا ءبولىستى. تاراز قالا­سىنان كەلىپ, تىڭدار­ماندى ءتامسىل تۇنعان تاماشا جىرىمەن تامساندىرعان ارۋ اقىن ارۋنا كەرىمبەك ءىى ورىندى ەنشىلەپ, 300 مىڭ تەڭگە سىي­ا­قىنى الدى. ءى ورىنعا لايىقتى تۇردە قول جەتكىزگەن قىتاي­لىق قانداس قارىنداسىمىز سۇلۋجان تاۋبالدىنىڭ سۇلۋ ولەڭدەرى مەن قازاق قىزىنا ءتان يبالى مىنەزىنە, تاۋىپ ايتار جانە توڭىرەگىن تۇگەندەپ ايتار تاپقىرلىعىنا ءتانتى بولعان كورەرمەن وعان سوماسى 400 مىڭ تەڭگە قۇرايتىن جۇلدە تاپسىرىلار ساتتە ىستىق ىقىلاسىن تانىتۋدان ايانىپ قالمادى. ال, باس جۇلدەنى (600 مىڭ تەڭگە) جەڭىپ العان اقتوبەلىك ءدۇلدۇل اقىن دانيار الدابەرگەنوۆتىڭ ساڭلاق سوزدەرىنە ايتىسقۇمار قاۋىم ەكى كۇن بويى مەيىرلەنە قول سوققانى انىق ەدى. بۇدان بولەك, ۇيىمداستىرۋشىلار تاراپىنان جۇلدەگە ىلىكپەگەن اقىندارعا 40 مىڭ تەڭگەدەن سىياقىلار بەرىلدى.

قالاداعى ۇلتتىق ونەر ورتا­لىعىنىڭ جەتەكشىسى گۇل­سىم ءداۋىت ساحنادا جاسىنداي جارقىلداعان سۇلۋجان تاۋبالدىعا كورەرمەن ىقى­لاسىنىڭ ايعاعى رەتىندە قولدان قۇيىلعان كۇمىس جۇزىك تارتۋ ەتتى.

ايتىستان كەيىنگى اۋىزەكى تالقىلاۋلار كەزىندە جۇرتشىلىق قازىلار القاسىنىڭ ادىلدىك جالاۋىن جىقپاي, اقىندارعا قاپىسىز باعا بەرگەنىن ايتىپ جاتتى. شىنتۋايتىندا, سوڭعى شەشىم كيەلى ونەر سايىسىنا تورەلىك جاساۋدىڭ تورەسىندەي بولدى.

ايتىستى قورىتىندىلاۋ ساتىن­دەگى ءوز لەبىزىندە قالا اكىمى اسقار ىدىرىسوۆ جىر جۇي­رىك­تەرى دوداسىنىڭ جىل سايىن ءداستۇرلى نەگىزدە وتكىزىلىپ تۇرا­تىنىن مالىمدەدى.

ميراس اسان, «ەگەمەن قازاقستان»

قاراعاندى وبلىسى,

ساتباەۆ قالاسى