ەگەر ءتۇرلى دەڭگەيدەگى اتقارۋشى ورگانداردا قىزمەت اتقاراتىن جەتەكشى تۇلعالار وزىنە تىكەلەي تاپسىرىلعان مىندەتتەردى سالاقسىتىپ جىبەرسە نەمەسە جاۋاپكەرشىلىكتى سەزىنبەسە سوگىس الۋى ابدەن مۇمكىن.
قوعامدىق ومىردە سوگىس وزگە دە ارقيلى جاعدايلاردا جاريالانادى. اقتوبە وبلىسى اكىمىنىڭ ءباسپاسوز قىزمەتى لاۋازىمدى تۇلعاعا داعدىلى تاجىريبەدەن تىس بەرىلگەن ەرەكشە ءبىر سوگىس جونىندە جەرگىلىكتى باسىلىمدار ارقىلى اقپارات تاراتتى.
اقتوبە وبلىسىنىڭ كادرلىق كوميسسياسىنىڭ شەشىمى بويىنشا ايىرىقشا تارتىپتىك جازا قارعالى اۋدانىنىڭ اكىمى راحات سىدىقوۆقا بەرىلگەن. نە ءۇشىن؟ ايدىڭ, كۇننىڭ امانىندا نە ءبۇلدىرىپ قويدى ەكەن؟ اتقارىپ جۇرگەن قىزمەتىندە ءبىر شيكىلىك بولعانى-اۋ شاماسى. جوق, مۇنىڭ ءبىرى دە ەمەس, گاپ باسقادا بولىپ شىقتى. ول اقتوبە وبلىسىنىڭ اكىمى بەردىبەك ساپارباەۆتىڭ قارعالى اۋدانىنا ساپارى كەزىندە ءۇستىرت ارەكەتكە جول بەرگەن. ناقتىراق ايتقاندا, ر.سىدىقوۆ وبلىس باسشىسىنىڭ اتالعان اۋدانعا قاراستى بادامشا اۋىلى تۇرعىندارىمەن باسقوسۋعا تەك جەرگىلىكتى مەملەكەتتىك قىزمەتشىلەر مەن شاعىن جانە ورتا بيزنەس وكىلدەرىن عانا شاقىرعان. سوگىستى سول ءۇشىن ارقالاپتى.
بۇعان نە دەۋگە بولادى؟ ارينە تەك ءبىر عانا قارعالى اۋدانىنىڭ اكىمى تاراپىنان كەزدەسكەن كەمشىلىك دەسەك, شىندىقتان الشاقتاۋ كەتىپ قالارمىز. وزگە وڭىرلەردە دە وسىعان ۇقساس كورىنىستەر كەزدەسىپ قالىپ جۇرگەنى جاسىرىن ەمەس. مۇنداي سىڭارجاق ۇستانىم جەرگىلىكتى اتقارۋشى ورگاندار جەتەكشىلەرىنىڭ ابىرويىنا داق ءتۇسىرۋى مۇمكىن ەكەنىن دە جوققا شىعارا الماساق كەرەك. ەكىنشىدەن, لاۋازىمدى تۇلعا مەن بەتپە-بەت پىكىر الىسۋعا تەك «شتاتتاعى شەشەندەر» مەن مەملەكەتتىك قىزمەتشىلەردىڭ شاقىرىلۋى ەل-جۇرتتىڭ اراسىندا ءتۇرلى الىپ-قاشپا پىكىرلەر تۋعىزۋى دا عاجاپ ەمەس.
اڭگىمەنىڭ اشىعىنا كەلەيىكشى. رەسپۋبليكاداعى وبلىس اكىمدەرى ۇلكەن لاۋازىمدى تۇلعا ەمەس پە؟ وبلىس ورتالىعىنان شالعاي ورنالاسقان جەرگىلىكتى ەلدى مەكەندەردە تۇراتىن قاراپايىم حالىقتىڭ ءوڭىر باسشىسىنىڭ قابىلداۋىنا كىرۋىنە مۇمكىندىگى بولا بەرمەيتىنى بەلگىلى. ولاردىڭ ءبارىن قابىلداۋعا وبلىس اكىمدەرىنىڭ جۇمىس كەستەسى سايكەس بولمايتىنى تاعى دا تۇسىنىكتى. سوندا جەرگىلىكتى تۇرعىندار كوكەيدە جۇرگەن ويلارى مەن تىلەكتەرىن وسىنداي كەزدەسۋلەردە ايتپاعاندا قايدا ايتادى؟! ايتسە دە كەيبىر جاعدايلاردا جۇرتشىلىق وكىلدەرى وعان شاقىرىلماي قالادى. تۇرعىندار مەن بيلىك وكىلدەرى اراسىندا تىكەلەي ۇنقاتىسۋلار بولعان جاعدايدا ءوزارا تۇسىنىستىك ودان ءارى تەرەڭدەي تۇسپەي مە؟ قارعالى اۋدانى اكىمىنە وڭىرلىك كادرلىق كوميسسيانىڭ شەشىمىمەن سوگىس جاريالانعان كەزدە وسىنداي ويلار كەلىپ ەدى كوكەيگە. بۇل جايتتاردان ونىڭ ارىپتەستەرى ءتيىستى ساباق السا يگى.
تەمىر قۇسايىن, «ەگەمەن قازاقستان»
اقتوبە