قاي قوعامنىڭ دا العا قويعان ماقساتى – ادام الەۋەتىن جاقسارتۋ. ەلباسىنىڭ رۋحاني جاڭعىرۋ جونىندەگى ماقالاسىنداعى ء«ومىر ءسۇرۋ ءۇشىن وزگەرە ءبىلۋ كەرەك» دەگەن بايلامى كوپ جايدى اڭعارتادى. وسىعان وراي, تاۋەلسىزدىك كۇنى قارساڭىندا «استانا دارىنى» وڭىرلىك عىلىمي-پراكتيكالىق ورتالىعىنىڭ ۇيىتقى بولۋىمەن №78 مەكتەپ-ليتسەيدە «ادامي الەۋەت – ەلدىڭ يننوۆاتسيالىق دامۋىنىڭ باستى فاكتورى» تاقىرىبىندا قالالىق عىلىمي-پراكتيكالىق كونفەرەنتسيا وتكەن ەدى.
القالى جيىندى ءا.مارعۇلان اتىنداعى №40 ورتا مەكتەپتىڭ ديرەكتورى ەربول ىرگەباي جۇرگىزىپ, ادامي كاپيتال تۋرالى وي قوزعادى. وقۋشىلار مەن ۇستازدارعا ءاليحان بوكەيحان تۋرالى قويىلىم كورسەتىلىپ, الاش ارىسىنىڭ ءومىر جولىنان جان-جاقتى دەرەك بەرىلدى. زاڭ عىلىمدارىنىڭ دوكتورى, ەۋرازيا ۇلتتىق ۋنيۆەرسيتەتىنىڭ پروفەسسورى ج.يبراگيموۆ «يننوۆاتسيالىق دامۋداعى ازاماتتاردىڭ قۇقىقتىق الەۋەتىن جاڭعىرتۋ» اتتى بايانداما جاساپ, جۇرتشىلىقتىڭ ءتۇرلى سۇراقتارىنا جاۋاپ بەردى. سول سەكىلدى №14 مەكتەپ-گيمنازيانىڭ ديرەكتورى و.نادەين ءبىلىم مەكەمەلەرىندەگى تولەرانتتىق تۋرالى ماعلۇمات بەرسە, «National Geograpھic قازاقستان» جۋرنالىنىڭ جاۋاپتى رەداكتورى م.ياسىلباي ۇلى ادام مەن تابيعاتتىڭ اراسىنداعى بايلانىس جايلى دەرەكتەردى سلايد ارقىلى كورسەتىپ, ءبىر كەزدەردەگى ارال تاعدىرىن مىسالعا كەلتىرىپ, ەندىگى جەردە بالقاش كولىن قالىبىندا ساقتاپ قالۋ ماسەلەسىن وسى كەزدەن باستاپ قولعا الۋ تۋرالى ءوز تۇجىرىمىن العا تارتتى.
پلەنارلىق وتىرىستان كەيىن جينالىسقا كەلگەندەر ءۇش سەكتسيادا جۇمىس ىستەپ, ەلىمىزدىڭ كيەلى جەرلەرى, قازاق مادەنيەتى, اسقاق استانا تۋرالى وي ءبولىستى. قورىتىندىسىندا, «استانا دارىنى» ورتالىعىنىڭ ديرەكتورى م.قۇرمانباەۆا كونفەرەنتسياعا قاتىسقان ازاماتتارعا العىسىن ءبىلدىرىپ, الداعى ۋاقىتتا پرەزيدەنتتىڭ رۋحاني جاڭعىرۋ جونىندەگى ماقالاسىنىڭ ءار تارماعى بويىنشا وسىنداي جيىندار وتكىزىپ, وندا ايتىلعان يدەيانى جاستاردىڭ ساناسىنا ءسىڭىرىپ, ولاردى وتانشىلدىق رۋحتا تاربيەلەۋ ماسەلەسىن جالعاستىرا بەرەتىنىن, اسىرەسە, دارىندى جاستاردىڭ بويىنداعى ەرەكشە تالانتتى اشۋ شەشىمىن تاباتىنىن تىلگە تيەك ەتتى.
سۇلەيمەن مامەت, «ەگەمەن قازاقستان