ەۋرازيالىق توپ (ERG) قۇرامىنا كىرەتىن «سوكولوۆ-سارىباي كەن-بايىتۋ وندىرىستىك بىرلەستىگى» اكتسيونەرلىك قوعامىندا ەلباسى نۇرسۇلتان نازارباەۆتىڭ قاتىسۋىمەن وتكەن تەلەكوپىر كەزىندە «اقىلدى كارەر» جوباسى ىسكە قوسىلدى.
«اقىلدى كارەر» جوباسى تيىمدىلىك كورسەتكىشتەردىڭ تولىق ايقىندىلىعىن جانە باقىلاۋدى قامتاماسىز ەتەدى. بۇل كاسىپورىننىڭ شىعارعان ونىمىنە, جالپى ءوندىرىس ەكونوميكاسىنا وڭ اسەر بەرەدى. جاڭالىق يندۋستريا 4.0 ەلەمەنتتەرىنىڭ بىرنەشەۋىن ەنگىزۋ ارقىلى كونتسەنترات ءوندىرۋدىڭ تولىقتاي بىرىكتىرىلگەن تسيكلىن بىلدىرەدى.
جوبا ەلەمەنتتەرىنىڭ ءبىرى گيس جانە ERP جۇيەسىمەن بىرىكتىرىلگەن اۆتوماتتاندىرىلعان Modular جۇيەسىن ەنگىزۋمەن بايلانىستى. ول وندىرىستىك ۇدەرىستەردى ۇلگىلەۋ دەگەندى بىلدىرەدى. كارەردەگى جاعدايلاردىڭ جەدەل مونيتورينگىن, قاجەتتى تۇزەتۋلەر ەنگىزۋدى جانە كەنىش كولىك جابدىقتارىن وڭتايلى ءبولۋدى وپەراتور ەمەس, كومپيۋتەرلەر جۇزەگە اسىرادى. مامان تەك «اقىلدى كارەردىڭ» ۇزدىكسىز جۇمىس ىستەۋىن باقىلايدى. ناتيجەسىندە شۇعىل ەسەپكە الۋدى جانە ينۆەستيتسيالىق شەشىمدەردى قابىلداۋدى قولداۋ ءۇشىن جابدىقتى پايدالانۋ تۋرالى 100 پايىز انىق جانە تولىق اقپارات الىنادى.
وسىنىڭ بارلىعى وندىرىستەگى قاتەلىكتەر مەن جاڭىلۋلاردى ازايتادى, تەحنيكانىڭ جوسپاردان تىس تۇرىپ قالۋىن بولدىرمايدى, ونىڭ قوزعالۋ جانە تاراتۋ جىلدامدىعىن ارتتىرادى, شىعىنداردى وڭتايلاندىرادى. ەڭ باستىسى, جابدىقتىڭ ونىمدىلىگىن 10 پايىزعا ارتتىرادى.
– بۇل ءوندىرىس شىعىندارىن بارىنشا ازايتىپ, ميلليارد تەڭگەدەن استام قارجى ۇنەمدەۋدى قامتاماسىز ەتەتىن وتە جوعارى كورسەتكىش,– دەپ اتاپ ءوتتى سسكوب پرەزيدەنتى بەرەكە مۇحامەتقاليەۆ. – بۇگىنگى تاڭدا ەڭ زاماناۋي تەحنولوگيالاردى قولدانا وتىرىپ, تەحنيكامەن قايتا جاراقتاندىرۋ ەكونوميكالىق ءتيىمدى جوبالاردى جۇزەگە اسىرۋعا جانە ەلىمىزدىڭ كەن-مەتاللۋرگيا كەشەنىنىڭ باسەكەلەستىك ۇستانىمدارىن نىعايتۋعا كومەكتەسەدى. سوندىقتان دا يندۋستريا 4.0 ەلەمەنتتەرى كەن ءوندىرۋ ونەركاسىبىنە مولىنان ەنگىزىلەتىن بولادى.
بۇل تەحنولوگيانى ەۋرازيالىق توپ ءوزىنىڭ بارلىق ءوندىرۋشى كاسىپورىندارىندا ەنگىزەتىن بولادى.
ءنازيرا جارىمبەت, «ەگەمەن قازاقستان»
قوستاناي وبلىسى,
رۋدنىي قالاسى