سولتۇستىك قازاقستان وبلىسىنىڭ اكىمى قۇمار اقساقالوۆ قىتاي حالىق رەسپۋبليكاسىنىڭ حۋبەي پروۆينتسياسىندا بولىپ, ينۆەستيتسيالىق كەلىسىمدەرگە قول جەتكىزدى. كەزدەسۋ تامىز ايىندا پەتروپاۆل قالاسىندا وتكەن ايماقتىق كەڭەس كەلىسىمدەرى شەڭبەرىندە ۇيىمداستىرىلدى.
قىتايدىڭ حۋبەي پروۆينتسياسىندا 61 ميلليون ادام تۇرادى. ەل ەكونوميكاسىندا بەسىنشى ورىنعا, ىشكى ءونىم وندىرۋدە جەتىنشى ورىنعا يە. ۋحان قالاسىندا جەرگىلىكتى كومپانيا باسشىلارى قاتىسقان كەلىسسوزدەر بارىسىندا بىرلەسكەن جوبالاردى جۇزەگە اسىرۋدىڭ ستراتەگيالىق باعىتتارى تالقىلاندى. ازىق-ت ۇلىك ونىمدەرىن يمپورتقا شىعاراتىن ءىرى ساۋدا جەلىلەرىنىڭ جەتەكشىلەرى ارىپتەستىك قارىم-قاتىناستىڭ دامۋىنا نيەتتەستىك ءبىلدىردى. بەيجىڭ قالاسى مەن شاندۋن, حەنان, تسزيانسۋ, شەنسي پروۆينتسيالارىنان كەلگەن كاسىپكەرلەر ءوڭىردىڭ اۋىلشارۋاشىلىق سالاسىنا قارجى قۇيۋعا قىزىعۋشىلىق تانىتتى. قازاقستاننىڭ ينۆەستيتسيالىق مۇمكىندىكتەرى وتە اۋقىمدى. ول ءۇشىن بارلىق جاعداي جاسالعانىن جاقسى بىلەمىز, دەستى ولار ءوز سوزدەرىندە. قىتايلىق بيزنەس وكىلدەرىمەن بولعان كەزدەسۋدە بىرلەسكەن جوبالارعا باسىمدىق بەرىلدى. تاياۋ ارادا بەيجىڭدە ءوزارا ۋاعدالاستىق ماسەلەلەرىن رەتتەپ وتىراتىن وبلىس كەڭسەسى اشىلاتىن بولادى.
– ءبىز بىرنەشە باعىتتا ەكونوميكالىق ىنتىماقتاستىق شارتتارىن ۇسىنامىز. اۋىل شارۋاشىلىعى, ونەركاسىپ, يننوۆاتسيا, ساۋدا سالالارى بويىنشا تارتىلعان ينۆەستيتسيالارعا مەملەكەت ەسەبىنەن وندىرىستىك ينفراقۇرىلىمدار سالىنادى. ءار جوبا اياسىندا جول كارتاسى ازىرلەنەدى, – دەدى قۇمار ىرگەباي ۇلى.
حۋبەي پروۆينتسياسىنىڭ گۋبەرناتورى ۆان سياودۋنمەن كەزدەسۋ قوس تاراپتىڭ كاسىپورىندارى جانە بيزنەس وكىلدەرىمەن بايلانىستى ورىستەتۋ, ولارعا جاعداي جاساۋ تاقىرىبىنا ارنالدى. جوعارى وندىرىستىك بازاعا, عىلىم مەن ءبىلىم الەۋەتىنە يە حۋبەي پروۆينتسياسى مەن تابيعي رەسۋرستارعا باي, اۋىل شارۋاشىلىعى وركەندەگەن سولتۇستىك قازاقستان وبلىسى ءبىر-ءبىرىنىڭ ەكونوميكاسىن تولىقتىراتىنىنا سەنىم ءبىلدىرىستى. كەزدەسۋ سوڭىندا وبلىستىق اكىمدىك پەن پروۆينتسيا حالىق ۇكىمەتى اراسىنداعى ىنتىماقتاستىق جونىندەگى مەموراندۋمعا قول قويىلدى.
ق.اقساقالوۆ شيان قالاسىنىڭ باسشىسى زانگ ۆەيگۋامەن كەزدەسىپ, اۆتوموبيل جاساۋمەن جانە ونىڭ ساۋداسىمەن اينالىساتىن «Dongfemd Motor Corporation» زاۋىتىنىڭ جۇمىسىمەن تانىستى. ءسوز اراسىندا ون ءبىر ايدا ءوڭىر ەكونوميكاسىنا 144 ميلليارد تەڭگە ينۆەستيتسيا قۇيىلعانىن ايتا كەتكەن ءجون.
ءومىر ەسقالي, «ەگەمەن قازاقستان»
سولتۇستىك قازاقستان وبلىسى