«قازاقستان دامۋ بانكى» ەۋرووبليگاتسيا شىعاردى

– ءبىز بۇل كەلىسىمشارتتى دەبيۋتتىك دەپ وتىرمىز, سەبەبى تەڭگەگە دەنوميناتسيالانعان ەۋرووبليگاتسيالاردى شىعارۋ بانك ءۇشىن شىن مانىندە تىرناقالدى قادام بولىپ وتىر,– دەدى بولات جامىشەۆ.

ونىڭ ايتۋىنشا, قۇندى قاعازداردىڭ اينالىمدا بولۋ مەرزىمى 3 جىلدى قۇرايدى. وتەۋ مەرزىمى 2020 جىلدىڭ 14 قىركۇيەگىنە بەلگىلەنگەن. ونىڭ ەسەپ ايىرىسۋ مامىلەسى اعىمداعى جىلدىڭ 14 جەلتوقسانىندا جۇرگىزىلمەك. وتەلۋىنە قاراي كىرىستىلىگى 9,625 پايىزدى قۇرايدى.

– ءۇش جىلدىق وبليگاتسيالار بويىنشا 9,625 پايىزدىق مولشەرلەمە ءبىزدىڭ ءوز ەلىمىزدەگى مۇمكىندىكتەن تومەن,– دەدى «قازاقستان دامۋ بانكى» اق باسقارما توراعاسى.

بانك ۇسىنىپ وتىرعان بوندتاردى ورنالاستىرۋ گەوگرافياسى بىرنەشە مەملەكەتتى قامتيدى. اتاپ ايتقاندا, ۇلىبريتانيادا شىعارىلىم كولەمى 63 پايىزدى, اقش-تاعى ۇلەس 21 پايىزدى, گەرمانيادا 8 پايىزدى, باسقا دا ەۋروپا ەلدەرىندەگى شىعارىلىم كولەمى 6 پايىزدى قۇرايدى.

بولات جامىشەۆ ايتىپ وتكەندەي, ينۆەستورلاردىڭ قاتارى ءبىرشاما كەڭ. باسىم بولىگى ينۆەستيتسيالىق اكتيۆتەردى باسقاراتىن 29 ينۆەستور بار.  باعالى قاعازداردىڭ ەميسسيا كولەمىنىڭ 97 پايىزىن اكتيۆتەردى باسقارۋ قورلارى, 2 پايىزىن حەدج-قورلار, 1 پايىزىن بانكتەر الاتىن بولادى.

«بايتەرەك» حولدينگىنىڭ ەنشىلەسى «قبد» ەل ەكونوميكاسىنىڭ شيكىزات ەمەس جانە ينفراقۇرىلىم سەكتورىن جاڭعىرتۋ مەن دامىتۋ جۇمىستارىمەن اينالىساتىنىن ايتا كەتەيىك. اكتسيونەرلىك قوعام ەكونوميكاعا ىشكى جانە سىرتقى ينۆەستيتسيا تارتۋ, وندىرىستىك ينفراقۇرىلىم مەن وڭدەۋ ونەركاسىبىن دامىتۋ سىندى باعىتتارعا باسىمدىق بەرەدى.

ارنۇر اسقار, «ەگەمەن قازاقستان»