قازاقستان حالقى اسسامبلەياسى استانادا قايىرىمدىلىق ۇيىمدارى وكىلدەرى مەن دونورلاردىڭ رەسپۋبليكالىق فورۋمىن وتكىزدى.
ءىس-شاراعا قحا توراعاسىنىڭ ورىنباسارى – حاتشىلىق مەڭگەرۋشىسى د.مىڭباي مەن پارلامەنت ءماجىلىسى توراعاسىنىڭ ورىنباسارى ۆ.بوجكو, قازاقستان رەسپۋبليكاسى كاسىپوداقتار فەدەراتسياسىنىڭ توراعاسى ب.ءابدىرايىم, پارلامەنت دەپۋتاتتارى, الەۋمەتتىك باعىتتاعى مەملەكەتتىك ورگانداردىڭ باسشىلارى, قحا مۇشەلەرى, دەمەۋشىلەر قاتىستى.
«مەن قازاقستانداعى بارلىق قايىرىمدى ازاماتتاردىڭ اتىن جەكە-جەكە اتاپ وتكىم كەلەدى. بىراق بۇل مۇمكىن ەمەس. سەبەبى, ولاردىڭ سانى كوپ, جىلدان-جىلعا ارتىپ كەلەدى. بارلىق قايىرىمدى جاندارعا العىس ايتامىن. وسىنداي ازاماتتاردىڭ بەلسەندى ارەكەتتەرىمەن ءبىر جارىم مىڭعا جۋىق ءىس-شارا ۇيىمداستىرىلدى. قايىرىمدىلىق ارقىلى ءبىز بارشا ادامدى بىرىكتىرە الامىز», دەدى د.مىڭباي.
ايتا كەتەيىك, فورۋمدا قازاقستان حالقى اسسامبلەياسىنىڭ «قايىرىمدىلىق كەرۋەنى» رەسپۋبليكالىق اكتسياسىنىڭ قورىتىندىسى شىعارىلىپ, قايىرىمدىلىق ءىسىن دامىتۋدىڭ جانە «تۋعان جەر» باعدارلاماسىن ىسكە اسىرۋدىڭ وزەكتى ماسەلەلەرى دە تالقىلاندى. ودان باسقا, ءىس-شارا اياسىندا بيىلعى جىلى مەملەكەت باسشىسى ازاماتتاردىڭ مەتسەناتتىق جانە قايىرىمدىلىق قىزمەتتى دامىتۋداعى ەڭبەگىن كوپكە تانىتۋ جانە ىنتالاندىرۋ ءۇشىن تاعايىنداعان قازاقستان حالقى اسسامبلەياسىنىڭ «جومارت جان» توسبەلگىسى تۇڭعىش رەت سالتاناتتى تۇردە تاپسىرىلدى.
ەستەرىڭىزدە بولسا, قحا-نىڭ XXII سەسسياسىندا مەملەكەت باسشىسى مۇددەلى ورگاندارمەن بىرلەسىپ, ەلدەگى بارلىق قايىرىمدىلىق اكتسيالارىن قحا قامقورلىعى اياسىندا جۇرگىزۋ ماسەلەسىن پىسىقتاۋعا تاپسىرما بەرگەن. ال «قايىرىمدىلىق كەرۋەنى» اكتسياسى – قوعامدا مەيىرىمدىلىكتى, گۋمانيزم مەن ءوزارا رياسىز كومەك جاساۋدى ورنىقتىرۋ مەن قازاقستاندىقتاردىڭ ءومىر جاعدايلارى مەن دەنساۋلىعىنا قامقورلىقتى كۇشەيتۋگە باعىتتالعان جوبا. ول اسسامبلەيانىڭ الەۋمەتتىك جوبالارىنىڭ جالعاسى بولىپ تابىلادى.
نۇرلىبەك دوسىباي, «ەگەمەن قازاقستان»