كەشە اۋىل شارۋاشىلىعى مينيسترلىگىندە بەينەكونفەرەنتسيا بايلانىسى رەجىمىندە وبلىس اكىمدىكتەرىنىڭ قاتىسۋىمەن پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى ا.مىرزاحمەتوۆتىڭ توراعالىعىمەن جيىن ءوتتى.
جيىندا وبلىس وكىلدەرىمەن بىرگە 11 ايدىڭ قورىتىندىسى بويىنشا جوسپارلانعان كورسەتكىشتەرگە قول جەتكىزۋ ماسەلەلەرى تالقىلاندى.
ايتا كەتەيىك, بيىلعى جىلدىڭ 11 ايىندا اۋىل شارۋاشىلىعى ونىمدەرىنىڭ جالپى ءونىمىنىڭ كولەمى 3,9 ترلن تەڭگەنى قۇرادى. ناقتى يندەكس كولەمى وتكەن جىلمەن سالىستىرعاندا 102,3% بولدى, جىلدىق جوسپاردا 102,5%. قىركۇيەك جانە قازان ايلارىندا سايكەسىنشە 1,9 % جانە 2,1%-عا ارتتى.
مينيسترلىك اكىمدىكتەرمەن بىرلەسە وتىرىپ, اعىمداعى جىلدىڭ باسىندا ءار اۋماق بويىنشا اۋىل شارۋاشىلىعى جالپى ءونىمىنىڭ ناقتى يندەكس كولەمى ەسەبىنىڭ بولجامدى دەرەكتەرىن دايىندادى. سونىمەن قاتار مينيسترلىك اي سايىن اكىمدىكتەردىڭ قاتىسۋىمەن جوسپارلانعان كورسەتكىشتەرگە قول جەتكىزۋ بويىنشا سەلەكتورلىق جيىن وتكىزىپ تۇرادى. سونىڭ ناتيجەسىندە 11 ايدىڭ قورىتىندىسى بويىنشا ناقتى يندەكس كولەمىنىڭ ارتۋى كۇتىلۋدە.
سونىمەن قاتار, جيىن بارىسىندا اۋىل شارۋاشىلىعى جەرلەرىن ءارتاراپتاندىرۋ, وسى جىلى جينالعان ەگىندى وتكىزۋ, وڭدەۋشى زاۋىتتاردى شيكىزاتپەن قامتاماسىز ەتۋ ماسەلەلەرى قاراستىرىلدى.
مايلى داقىلدار, مال ازىعى داقىلدارىنان كەلىپ تۇسەتىن پايدا تۋرالى ايتىلدى.
اۋىل شارۋاشىلىعى كووپەراتيۆتەرىن دامىتۋ ماسەلەسىنە كەلەتىن بولساق, 2017 جىلدىڭ 8 جەلتوقسانىنداعى كورسەتكىش بويىنشا رەسپۋبليكا كولەمىندە 777 اۋىل شارۋاشىلىعى كووپەراتيۆى تىركەلگەن نەمەسە 166% جوسپاردان ارتىق ورىندالعان. ونىڭ ىشىندە: 272 اشك-ءنىڭ ءسۇت قابىلداۋ بەكەتى, 377 اشك-ءنىڭ مال سويۋ بەكەتى, 76 اشك-ءنىڭ جەمىس-كوكونىس دايىنداۋ بەكەتى, 19 اشك-ءنىڭ قوي سويۋ جانە ءجۇن دايىنداۋ بەكەتى بار, 3 اشك ارالاردى ءوسىرۋ جانە بالدى ءوندىرۋ مەن قاپتاۋ, 13 اشك قۇستى ءوسىرۋ مەن سويۋ, 8 اشك قارقىندى باقشالىق, 5 اشك تۇيە ءسۇتىن ءوندىرۋ جانە قايتا وڭدەۋ, 4 اشك تاۋارلى بالىق وسىرۋمەن اينالىسادى, سونداي-اق 114 615 ءىرى قارا مال باسىنا ارنالعان 7 102 وتباسىلىق بورداقىلاۋ الاڭى قۇرىلدى. 83,2 مىڭ جقش جانە شفق تارتىلدى.
كووپەراتيۆتەر 103,2 مىڭ توننا ءسۇت, 16,6 مىڭ توننا ەت, 28,1 مىڭ توننا جەمىس-كوكونىس ونىمدەرى, 162 توننا بال, 31 توننا ەشكى ءسۇتى, 45,2 مىڭ دانا جۇمىرتقا ءوندىردى.
9,3 مىڭ جاڭا جوبا قارجىلاندىرىلىپ, 8723 جەكە كاسىپكەر تىركەلدى جانە 13,7 مىڭ جۇمىس ورنى اشىلدى.
2018 جىلى كووپەراتيۆكە تارتىلعاندار سانىن 200 مىڭعا جەتكىزۋ, سونىمەن قاتار 115 مىڭ باسقا وتباسىلىق بورداقىلاۋ الاڭىن قۇرۋ جوسپارلانىپ وتىر. ەتتى دايىنداۋدى 28 مىڭ تونناعا, ءسۇتتى 130,0 مىڭ تونناعا جەتكىزۋ جوسپارلانۋدا.
جيىن بارىسىندا 2018 جىلعى كوكتەمگى ەگىستىك جۇمىستارىنا دايىندىق بارىسى دا ءسوز بولدى. 2018 جىلعى كوكتەمگى ەگىستىك جۇمىستارىن نەسيەلەۋگە ءوتىنىم بەرۋ باستالدى.
ا.مىرزاحمەتوۆ جيىن سوڭىندا العا قويعان مەجەگە جەتۋ ءۇشىن وبلىس اكىمدەرىنە قارالعان ماسەلەلەردە بىرىگىپ جۇمىس ىستەۋدى كۇشەيتۋ كەرەك ەكەنىن باسا ايتىپ, ناقتى تاپسىرمالار بەردى.
«ەگەمەن-اقپارات»