كاسىپكەرلەردى تەكسەرۋدى ازايتۋ, بيزنەسكە قولايلى جاعداي جاساۋ ماقساتىندا ەلىمىزدەگى سانيتارلىق-ەپيدەميولوگيالىق قاداعالاۋ نورمالارى مەن ەرەجەلەرىنە بىرقاتار وزگەرىستەر ەنگىزىلدى. بۇل تۋرالى كەشە ۇكىمەت ۇيىندە وتكەن ءباسپاسوز ءماسليحاتىندا دەنساۋلىق ساقتاۋ مينيسترلىگى قوعامدىق دەنساۋلىق ساقتاۋ كوميتەتى توراعاسىنىڭ ورىنباسارى بەرىك ءشارىپ ايتتى.
قوعامدىق دەنساۋلىق ساقتاۋ كوميتەتىندە قۇرىلعان جۇمىس توبى بيىلعى مامىر ايىنان باستاپ 66 سانيتارلىق تالاپقا ارنايى رەۆيزيا جۇرگىزىپ, 29 ەرەجەنى قولدانىستان الىپ تاستاعان. تاعى 29 سانيتارلىق قاداعالاۋ نورماسىنا وزگەرىستەر ەنگىزگەن. بۇل وزگەرىستەردىڭ كوبى بيزنەستى دامىتۋعا قولايلى جاعداي جاساۋ, كەدەرگىلەردى ازايتۋ ماقساتىندا تۋىنداپ وتىر. «دەنساۋلىق ساقتاۋ نىساندارىنا ارنالعان 34 تارماق ەسكىردى دەپ تانىلىپ, قولدانىستان الىندى. بۇعان قوسا 12 تارماق ىرىقتاندىرۋ ماقساتىندا قايتا قارالدى. وسىلايشا, سانيتارلىق تالاپتاردى وڭتايلاندىرۋ مەديتسينالىق نىساندار قۇرىلىسىن تۇرعىزۋعا كەتەتىن شىعىنداردى 30 پايىزعا قىسقارتتى. سونداي-اق جەر تەلىمى اۋقىمىن 30-50 پايىزعا ازايتۋعا مۇمكىندىك بەردى. ونىڭ سىرتىندا زەرتحانالاردى قاداعالاۋ تالاپتارىنا دا وزگەرىستەر ەنگىزىلدى», دەدى ب.ءشارىپ.
سانيتارلىق تالاپتارعا ەنگىزىلگەن وزگەرىستەرگە سايكەس, بيىلدان باستاپ سۋپەرماركەتتەر, ءىرى ساۋدا نۇكتەلەرى ەرەكشە تەكسەرىلۋگە جاتاتىن نىساندار تىزىمىنەن الىندى. وسى نىسان اۋماعىندا ورنالاسقان كونديتەرلىك تسەحتار, ناۋبايحانا دا جەكە تەكسەرىلۋ نىسانى بولىپ ەسەپتەلمەيدى. بۇرىن بۇل ءوندىرىس وشاقتارى سانيتارلىق-ەپيدەميولوگيالىق قاداعالاۋ ماماندارى تاراپىنان جىلىنا ءبىر رەت مىندەتتى تۇردە تەكسەرىلىپ كەلگەن. «اتالعان وبەكتىلەر بۇرىن ەرەكشە تەكسەرىستەن وتەتىن. ال قازىر جاڭا تالاپتارعا سايكەس ولار «قاۋپى جوعارى» نىساندار قاتارىنان «قاۋپى تومەن» وبەكتىلەرگە ءوتتى. دەمەك, سۋپەرماركەتتەر بۇرىنعىداي ءجيى تەكسەرىلمەيدى. ال ەگەر وندا پايدالانۋ مەرزىمى وتكەن ونىمدەر ساتىلعان جاعداي تىركەلسە نەمەسە تۇتىنۋشىلار تاراپىنان ارىز-شاعىمدار تۇسسە, سوندا عانا تەكسەرىلەدى ءارى ساۋدا ورىندارى كەمشىلىكتەردى جويعانعا دەيىن ايرىقشا تەكسەرىلەتىن اۋماققا كىرەدى», دەدى ب.ءشارىپ.
ول, سونداي-اق قازاقستاندا مەديتسينالىق ۇيىمداردىڭ قىزمەت كورسەتۋ ساپاسىنا دا ارىز-شاعىمدار از ەمەستىگىن ايتتى. قالالار مەن وڭىرلەردە قۇرىلعان call-ورتالىقتارعا كەلىپ تۇسەتىن قوڭىراۋلاردىڭ 90 پايىزدان استامى انىقتامالىق سيپاتتا بولسا, كەبىرەۋى شاعىم رەتىندە دە تىركەلەدى. ولاردىڭ 40 پايىزى دالەلدەنىپ, ءتيىستى شارالار قولدانىلادى ەكەن.
سانيتارلىق-ەپيدەميولوگيالىق قاداعالاۋ ماماندارى جۇرتشىلىقتىڭ ارىز-شاعىمى بويىنشا مەديتسينالىق ۇيىمداردى دا تەكسەرەدى. ەمدەلۋشىنىڭ قۇقى ەرەكشە بۇزىلعان جاعداي انىقتالسا, وندا ماتەريال جەرگىلىكتى ىشكى ىستەر ورگانىنا جىبەرىلەدى نەمەسە سول مەكەمە اكىمشىلىك جاۋاپكەرشىلىككە تارتىلادى.
قىمبات توقتامۇرات, «ەگەمەن قازاقستان»