كەشەگى قولىنا نايزا ۇستاپ, ەل مەن جەردى قورعاعان باتىرلاردىڭ جالعاسى – قازىرگى پوليتسيا قىزمەتكەرلەرى دەسەك قاتە ايتپايمىز. ولار تاۋەلسىز ەلدىڭ تىنىشتىعى مەن بەيبىتشىلىگىن كۇزەتۋدە كۇنى-ءتۇنى كىرپىك قاقپاي قىزمەت ەتىپ كەلەدى.
قاپەلىمدە قاستىق قىلعاندارعا قارسى تۇرام دەپ جانىن قيعاندارى قانشاما؟! مۇنداي باتىل قادامعا شەشۋشى ساتتە حالىق مۇددەسىن بارىنەن جوعارى قوياتىن ناعىز ەلجاندى, وتانسۇيگىش ازاماتتار عانا بارا الاتىندىعىنا كوزىمىز جەتتى. ال قارا باسىنان حالقىنىڭ قامىن ويلاعان بۇل ازاماتتار قانداي قۇرمەتكە بولسا دا لايىق!
جامبىل وبلىسى ىشكى ىستەر دەپارتامەنتى باسشىلىعىنىڭ باستاماسىمەن قىزمەتتىك بورىشىن اتقارۋ بارىسىندا قازا بولعان قىزمەتكەرلەردى كەيىنگى ۇرپاققا دارىپتەۋ ماقساتىندا «12 قاراشا - ەسكە الۋ كۇنى» رەتىندە اتاپ ءوتۋ داستۇرگە اينالىپ وتىر.
قىزمەت جولىندا جانىن قيعان پوليتسەيلەردىڭ وتباسىلارى مەن ىشكى ىستەر ورگاندارىندا بىرنەشە جىل قىزمەت جاساپ, قۇرمەتتى زەينەتكەرلىككە شىققان ارداگەرلەردىڭ تىنىس تىرشىلىكتەرى تاراز قالاسى ىشكى ىستەر باسقارماسى باسشىلارىنىڭ دا ۇدايى نازارىندا.
سونىڭ ءبىر دالەلى رەتىندە بيىل دا «ميليتسيا قىزمەتىنىڭ قۇرىلعانىنا 100 جىل» تولۋىنا وراي يگى ءىس ءوز جالعاسىن تاپتى. تاراز قالاسى ىشكى ىستەر باسقارماسىنىڭ باسشىسى پوليتسيا پولكوۆنيگى ەرلان مىرزاحان ۇلى باستاعان جەكە قۇرام 2011 جىلعى 12 قاراشاداعى لاڭكەستىك وقيعادا قاندىقول تەررورشىنىڭ قولىنان قازا بولعان وبلىستىق مامانداندىرىلعان كۇزەت قىزمەتى باسقارماسى مەملەكەتتىك مەكەمەسىنىڭ جەدەل دەن قويۋ ۆزۆودىنىڭ قىزمەتكەرى, پوليتسيا اعا سەرجانتى پولات ايانقۇلوۆ پەن قارۋلى كۇدىكتىلەردى قۇرىقتاۋ بارىسىندا وققا ۇشقان تاراز قالاسى ىشكى ىستەر باسقارماسى 1 پوليتسيا ءبولىمىنىڭ ۋچاسكەلىك پوليتسيا ينسپەكتورى, پوليتسيا كاپيتانى جاندوس بەكدايىروۆتىڭ وتباسىلارىنا بارىپ, جاعدايىمەن تانىستى. ەلى ءۇشىن تۋعان ەرلەردى تاربيەلەپ وسىرگەن اتا-انالارىنا, وتباسىلارىنا العىسىن ءبىلدىرىپ, باعالى سىيلىقتارىن تاپسىردى.
سونداي-اق ىشكى ىستەر ورگانىنىڭ ارداگەرى تىنىشتىق يلياسوۆتىڭ وتباسىنا بارىپ, قاريانىڭ ماعىنالى اڭگىمەلەرىن تىڭداپ, ىشكى ىستەر باسقارماسىنىڭ ارنايى دايىنداعان قۇتتىقتاۋ قاعازى مەن سىيلىعىن تاپسىردى.
بەيبىت تۇرعىنداردىڭ ءومىرىن قاندىقول لاڭكەستەردىڭ قاۋىپ-قاتەرىنەن ساقتاۋ جولىندا مەرت بولعان قۇقىق قورعاۋ ورگاندارى قىزمەتكەرلەرىنە قۇرمەت ەشقاشان تولاستامايدى. قايتا جىلدار وتكەن سايىن جاڭعىرىپ, جاس ۇرپاققا وتانشىلدىق رۋحىنىڭ بەلگىسىندەي جارقىراي بەرەتىنى حاق.