قازىردىڭ وزىندە شامامەن 900 مىڭ قازاقستاندىق «نۇر وتان» پارتياسىنىڭ «حالىق داۋىسى» رەسپۋبليكالىق اكتسياسىنا بەلسەندى قاتىستى.
پاۆلودار مۇناي حيمياسى زاۋىتى سياقتى ونەركاسىپتىك ءىرى كاسىپورىنداردىڭ جۇمىسشىلارى, ەتنومادەني بىرلەستىكتەردىڭ وكىلدەرى, جاستار, سونداي-اق ىنتا بىلدىرگەندەردىڭ بارلىعى حالىققا قىزمەت كورسەتۋ ورتالىقتارىندا, قالالاردىڭ ورتالىق الاڭدارى مەن دەنساۋلىق ساقتاۋ جانە ءبىلىم بەرۋ مەكەمەلەرىندە جايعاسقان ساۋالداما جيناۋ بەكەتتەرى ارقىلى تاۋەلسىزدىكتىڭ 20 جىلدىعى قارساڭىندا بيلەۋشى پارتياعا ءوز ۇسىنىستارىن ءبىلدىرىپ, ەلگە تىلەكتەرىن ايتتى.
مەملەكەت باسشىسى, «نۇر وتان» پارتياسىنىڭ كوشباسشىسى نۇرسۇلتان نازارباەۆتىڭ ۇلتارالىق كەلىسىم مەن بەيبىتشىلىكتى ساقتاۋ, انا مەن بالانى قولداۋ ماسەلەلەرىنە باسا نازار اۋدارىپ وتىرعانىنا كوپشىلىك ءوز ريزاشىلىعىن ءبىلدىردى. قازاقستاندىقتار ەلىمىزدە تاۋەلسىز 20 جىلدا جۇزەگە اسقان وڭ ءوزگەرىستەر تۋرالى ايتا وتىرىپ, ءبىزدى جارقىن بولاشاق كۇتىپ تۇرعانىنا سەنىم ءبىلدىردى.
قازاقستاندىقتاردىڭ ۇسىنىستارى مەن تىلەكتەرىن جيناۋدى «نۇر وتان» پارتياسى ودان ءارى جالعاستىرۋدا.
«ەگەمەن-اقپارات».