بۇۇ قاۋىپسىزدىك كەڭەسى 2011 جىلدىڭ 1 قاراشاسىنان ليۆيانىڭ ۇستىنەن ۇشىپ وتۋگە بولمايتىن ايماقتى اشۋ جونىندە شەشىم قابىلدادى.
قاۋىپسىزدىك كەڭەسى وسى ماسەلەگە بايلانىستى ارنايى قارار قابىلداپ وتىر. ول ناتو-نىڭ ليۆياداعى وپەراتسيالارىنىڭ اياقتالعانىن بىلدىرەدى. ناتو-نىڭ سولتۇستىكاتلانتيكالىق كەڭەسى 28 قازان كۇنى وتىرىس وتكىزىپ, وندا ليۆياداعى اسكەري-اۋە ناۋقانىنىڭ اياقتالعاندىعى رەسمي تۇردە ءمالىم ەتىلەتىن بولادى. وسى ورايدا رەسەي سىرتقى ىستەر مينيسترلىگىنىڭ بۇۇ قاۋىپسىزدىك كەڭەسىن ءوز مانداتىن اسىرىپ جىبەرگەنى ءۇشىن سىنعا العانىن ايتا كەتۋ كەرەك.
تاسقىن تىنىشتىق بەرمەي تۇر
تايلاند استاناسى بانگكوك سەنبى كۇنى كەشكە بولاتىن سۋ تاسقىنىنىڭ شارىقتاۋ شەگىنە دايىندالۋدا.
ونسىز دا ايتارلىقتاي قاڭىراپ قالعان قالادان تۇرعىنداردى باسقا جەرلەرگە كوشىرۋ ودان ءارى جالعاسۋدا. تۇرعىندار سۋدىڭ كوبەيە بەرۋىن توقتاتۋ ءۇشىن چاو پرايا وزەنىنىڭ جاعالاۋىن قاپشىقپەن جانە قۇممەن بەكىتۋدە. ۇلتتىق مەتەوقىزمەتتىڭ حابارلاۋىنشا, وزەن دەڭگەيلەرى ءالى دە كوتەرىلە تۇسپەك. قالا سىرتىندا 200 مىڭ ادامدى قابىلدايتىن ءىرى ەۆاكۋاتسيالىق ورتالىقتار بوي كوتەرۋدە.
جاڭا مۇراگەر حانزادا انىقتالدى
ساۋد ارابياسىنىڭ جاڭا مۇراگەر حانزاداسىنىڭ ەسىمى بەلگىلى بولدى.
ول – نايف يبن ابدەل ازيز اس-ساۋد. مۇنداي شەشىم تاياۋدا ۇزاققا سوزىلعان اۋىر ناۋقاستان حانزادا سۇلتان بين ابدۋللا ءازيزدىڭ اقش-تا قايتىس بولۋىنا بايلانىستى قابىلداندى. جاڭا كرونپرينتستىڭ جاسى 78-دە. 1975 جىلدان بەرى ول ىشكى ىستەر ءمينيسترى قىزمەتىن اتقارادى. بۇدان بىلاي وعان پرەمەر-ءمينيستردىڭ ورىنباسارى مىندەتى دە جۇكتەلەتىن بولادى.
يسلاميستەر بيلىككە كەلدى
وتكەن جەكسەنبىدە ءتۋنيستىڭ ۇلتتىق قۇرىلتاي اسسامبلەياسىنىڭ سايلاۋىندا «ان-ناحدا» يسلاميستىك پارتياسى جەڭىسكە جەتتى.
باتىس ءۇمىت ارتقان پروگرەسسيۆتى-دەموكراتيالىق پارتيا ءتورتىنشى ورىندا قالىپ, سايلاۋ ناۋقانىندا جەڭىلىس تاپتى. داۋىستاردى ساناۋ ناتيجەلەرى بويىنشا يسلاميستەر 41,47 پايىز داۋىس العان. ءسويتىپ, ولار قۇرىلتايشى اسسامبلەياداعى 217 ورىننىڭ 90-ىنا يە بولدى. ەكىنشى جانە ءۇشىنشى ورىنداردى تيىسىنشە 13,82 جانە 9,68 پايىز داۋىس جيناعان ەكى سولشىل پارتيالار – «رەسپۋبليكالىق كونگرەسس» جانە «ەڭبەك پەن ەركىندىك ءۇشىن دەموكراتيالىق بلوگى» يەلەندى.
ەگيپەت پەن يزرايل تۇتقىندار الماستى
ءيزرايلدىڭ «موسساد» بارلاۋ ۇيىمىنىڭ وفيتسەرى دەلىنگەن يلان گراپەلدى ەگيپەت وكىمەتى يزرايلدەگى 25 ەگيپەتتىك تۇتقىنعا ايىرباس رەتىندە بوساتتى.
27 جاسار گراپەلدى ەگيپەت وكىمەتى شپيوندىق جاسادى دەگەن كۇدىكپەن ماۋسىم ايىندا قاماۋعا العان بولاتىن. ۆۆس اگەنتتىگىنىڭ حابارلاۋىنشا, گراپەل بەيسەنبى كۇنى كايردەن وتانىنا ۇشىپ شىعىپ, ونىڭ ورنىنا 25 تۇتقىن ەگيپەت وكىمەتىنە قايتارىلعان. ءيزرايلدىڭ جانە اقش-تىڭ ازاماتى بولىپ تابىلاتىن گراپەل يزرايل پرەمەر-مينيسترىمەن كەزدەسكەن سوڭ اقش-قا ۇشادى دەپ كۇتىلۋدە.
كلينتون وباماعا قولداۋ ءبىلدىردى
اقش-تىڭ مەملەكەتتىك حاتشىسى حيللاري كلينتون وكىلدەر پالاتاسىنىڭ سىرتقى ىستەر جونىندەگى كوميتەتىندە ءسوز سويلەدى.
ءوز سوزىندە ول وباما اكىمشىلىگىنىڭ پاكستان مەن اۋعانستانعا قاتىستى ساياساتىنا قولداۋ ءبىلدىردى. اۋعانستان مەن پاكستاندا ۇلتتىق قاۋىپسىزدىكتى قامتاماسىز ەتۋدەگى ستراتەگيالىق مىندەتتى شەشۋدە اقش قانشالىقتى العا ىلگەرىلەدى دەگەن ساۋالعا كلينتون اتالعان ەلدەرمەن اراداعى قارىم-قاتىناس ءدال ويلاعانداي دارەجەدە ەمەس, سونىمەن بىرگە بەلگىلى ءبىر تابىستار دا بار دەپ جاۋاپ قايتارعان.
فورۋمعا قاتىسۋشىلاردى قۇتتىقتادى
تۇركى مەملەكەتتەرى اراسىنداعى دوستىق قارىم-قاتىناستاردى ودان ءارى كەڭەيتۋدە بۇقارالىق اقپارات قۇرالدارىنا ماڭىزدى مىندەتتەر جۇكتەلەدى.
جۇما كۇنى باكۋدە اشىلعان تۇركى تىلدەس مەملەكەتتەر مەن ۇيىمداردىڭ ءىى مەديا-فورۋمىنا جولداعان ۇندەۋىندە تۇركيا پرەمەر-ءمينيسترى رەدجەپ تايىپ ەردوعان وسىلاي دەپ اتاپ كورسەتكەن. قۇتتىقتاۋدى فورۋمعا جينالعاندار الدىندا تۇركيا مينيسترلەر كابينەتى ءباسپاسوز قىزمەتىنىڭ باسشىسى مۇرات كاراكايا وقىپ بەردى. ەردوعان فورۋمنىڭ قىزمەتتەستىكتى ارتتىرۋدا وتە ماڭىزدى ناتيجەلەر بەرەتىنىنە سەنىم بىلدىرگەن.
ەستونيا تۇركياعا 100 مىڭ ەۋرو ءبولدى
ەستونيا سىرتقى ىستەر مينيسترلىگى الاپات ءزىلزالادان زاپا شەككەندەرگە جانە ونىڭ زارداپتارىن جويۋعا كومەك رەتىندە تۇركياعا 100 مىڭ ەۋرو ءبولدى.
ەستونيا سىرتقى ىستەر ءمينيسترى ۋرماس پاەتتىڭ ايتۋىنشا, بولىنگەن كومەكتىڭ ەلەۋلى بولىگى باسپانالارىنان ايىرىلعان ادامداردى تۇرعىن جايىمەن قامتاماسىز ەتۋگە ارنالعان. ايتا كەتۋ كەرەك, قازىرگى كۇنى باسپاناسىز قالعاندار سانى شامامەن 600 مىڭ ادامدى قۇراپ وتىر. احۋالدى جالعاسىپ جاتقان جەر استى دۇمپۋلەرى مەن كۇننىڭ سالقىنداپ كەتۋى, سول سياقتى ەپيدەميانىڭ تارالۋ قاۋپى ودان بەتەر كۇردەلەندىرە تۇسۋدە.
ساياساتكەرلەر قالاي جۇدىرىقتاسادى؟
بريتاندىق The Guardian گازەتى ساياساتكەرلەردىڭ قاتىسۋىمەن بولعان ەڭ قىزۋ توبەلەستەردى جاريالادى.
2005 جىلى «رودينا» فراكتسياسى مۇشەلەرى مەن رلدپ دەپۋتاتتارى اراسىنداعى قاقتىعىس ارقاسىندا رەسەيلىك دەپۋتاتتار اتالعان تىزىمدە ەكىنشى ورىن الدى. رەسەيلىك ساياساتكەرلەردى جۇدىرىقتاسۋ رەيتينگىندە تەك يتاليالىق ارىپتەستەرى عانا ارتتا قالدىرعان. پراگاداعى نارازى ستوماتولوگتار اراسىنداعى جانجال ءۇشىنشى ورىندا كورىنەدى.
ينتەرنەت ماتەريالدارى نەگىزىندە ازىرلەندى.