پارلامەنت ماجىلىسىندە «تاۋەلسىز قازاقستان – مەنىڭ وتانىم» اتتى رەسپۋبليكالىق جاستار فورۋمى جالعاسىن تاپتى. قازاقستان حالقى اسسامبلەياسىنان سايلانعان ءماجىلىس دەپۋتاتى, زاڭناما جانە سوت-قۇقىقتىق رەفورما كوميتەتىنىڭ مۇشەسى ليۋدميلا حوچيەۆا جەتەكشىلىك ەتكەن باسقوسۋ قازاقستان رەسپۋبليكاسىنىڭ 20 جىلدىق مەرەيتويى قارساڭىندا جاستاردىڭ قازاقستاندىق پاتريوتيزم, ۇلتارالىق تاتۋلىق پەن بىرلىك, ەل بولاشاعى تاقىرىپتارىن ورتاعا سالىپ, تالقىلاۋعا ارنالدى.
فورۋم كوكشەتاۋ جەرىنەن «قازاقستاندىق قوعامدى بىرىكتىرۋ: جاستاردىڭ كوزقاراسى» دەپ اتالاتىن سەمينار-ترەنينگپەن باستالدى. جاستار اقمولا وبلىسىنىڭ جوعارى وقۋ ورىندارىندا – كوكشەتاۋ مەملەكەتتىك ۋنيۆەرسيتەتى مەن «كوكشە» اكادەمياسىندا وقيتىن زامانداستارىمەن جۇزدەستى. پىكىرلەسىپ, وي ءبولىسىپ, ءبىر شاڭىراق استىندا «Baursak Party» شاراسىنىڭ تۇساۋكەسەرىن وتكىزدى.
استاناعا ورالعان جاستار فورۋم جۇمىسىن «وتان-انا» مونۋمەنتىنە گۇل شوعىن قويۋ سالتاناتىنان باستاپ, باسقوسىپ ەستەلىك سۋرەتكە ءتۇستى. فورۋم جاستاردى تاۋەلسىزدىگىمىزدى قاستەرلەۋگە, وتانسۇيگىشتىككە, پاتريوتيزمگە ءتاربيەلەۋ, جاستاردى تولعاندىراتىن وزەكتى ماسەلەلەردى پارلامەنت قابىرعاسىندا قاراستىرىپ, كوشباسشى جاس ۇرپاقتىڭ باسىن بىرىكتىرۋ ماسەلەسىن ماقسات ەتتى. باسقوسۋدى «باي-بارىس» ينتەللەكتۋالدىق كلۋبىنىڭ مۇشەسى ءالكەي مارعۇلان ۇلى جۇرگىزىپ وتىردى.
جاستار فورۋمىن پالاتانىڭ الەۋمەتتىك-مادەني دامۋ كوميتەتىنىڭ حاتشىسى بەكەن ءالىمجانوۆ قۇتتىقتادى. «بۇل جاستار – ءبىزدىڭ مەملەكەتىمىزدىڭ بولاشاعى, ەلىمىزگە يە بولاتىن, ونىڭ ەكونوميكالىق جانە ىشكى-سىرتقى ساياساتىن جۇزەگە اسىراتىن, وتانىمىزدىڭ ماسەلەلەرىن دۇنيەجۇزىلىك جانە حالىقارالىق دەڭگەيدە شەشەتىن قازاقستان رەسپۋبليكاسىنىڭ جاستارى.
سوندىقتان, قازىرگى تاڭدا ءبىزدىڭ الدىمىزدا كۇردەلى ماسەلەلەردىڭ ءبىرى بولىپ وسى جاستارعا وزدەرىنىڭ جىگەرلەرىن بۇدان ءارى دامىتۋ ءۇشىن, العان بىلىمدەرىن ىسكە اسىرۋ ءۇشىن, مەملەكەتىمىزگە ءوز ۇلەستەرىن قوسۋ ءۇشىن ءتيىستى جاعداي جاساۋ ماسەلەسى تۇر. «قازاقستان جاستارى» اتتى باعدارلاما قابىلدادىق. تالانتتى جاستاردى ىنتالاندىرۋ مەن شىعارماشىلىق جوبالاردى قولداۋ ءۇشىن «دارىن» سىيلىعىن 10 اتالىم بويىنشا تاعايىندادىق. جاستار ساياساتى تۋرالى كەيبىر زاڭنامالىق اكتىلەر, سونىڭ ىشىندە «مەملەكەتتىك جاستار ساياساتى تۋرالى» زاڭ ماجىلىستە قارالاتىن بولادى. ولار 5-10 جىلدان كەيىن باسەكەگە قابىلەتتى, باتىس پەن شىعىستاعى ءوز زامانداستارىنان قالىسپايتىن بولۋلارى كەرەك. سول ءۇشىن بيۋدجەتتەن 2 ميلليارد تەڭگە كولەمىندە قوسىمشا قارجى قاراستىرىلىپ جاتىر», – دەدى دەپۋتات.
جاستاردىڭ جەتەكشىسى, ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ مۇشەسى ليۋدميلا حوچيەۆا ءۇش كۇنگى جۇمىس بارىسىنا توقتالا كەلىپ بىلاي دەدى: «جاستار دەگەنىمىز كىمدەر؟ ولار – ءبىزدىڭ مەملەكەتىمىزدىڭ ىرگەتاسى. ءۇش كۇنگى رەسپۋبليكالىق جاستار فورۋمىنا قاتىسۋشىلار ەلىمىزدىڭ ەڭ جوعارعى زاڭ شىعارۋشى ورگانىنىڭ قابىرعاسىندا وتىرىپ, ارقايسىسىنىڭ ەل كەلەشەگىنە جاۋاپكەرشىلىك سەزىنگەنىن سۇرار ەدىم. قازاقستاننىڭ بولاشاعىن جاسايتىن بۇگىنگى جاستار. ەندى ارقايسىلارىڭىز الدارىڭىزدا تۇرعان جۇرەكشەنى جاعىڭىزدار. سىزدەردىڭ ءجۇرەكتەرىڭىز ەل دەگەندە, قازاقستان دەگەندە وسىلاي جانىپ تۇرسا ەكەن دەپ تىلەيمىن. وتانىمىز بەن حالقىمىزعا سول جانعان جۇرەكپەن قىزمەت ەتىڭىزدەر».
دەپۋتات وسىلاي دەي كەلىپ, وسى فورۋمنىڭ مەملەكەتىمىزدىڭ ىرگەتاسىنىڭ ءبىر كىرپىشى بولىپ قالاناتىنىنا ءوزىنىڭ سەنىمىن ءبىلدىردى جانە جاستارعا ىزگى تىلەگىن ايتىپ, «اق نيەتپەن» دەگەن ايشىقتى جازۋى بار البوم ۇسىندى. وعان فورۋمعا قاتىسۋشىلار تىلەكتەرى مەن ۇسىنىستارىن جازادى. البوم ەلباسى – قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆقا جولداناتىن بولادى. كەلەسى قۇتتىقتاۋدى «جاس وتان» جاستار قاناتىنىڭ اتقارۋشى حاتشىسى نۇرلان وتەشوۆ جولدادى.
* * *
رەسپۋبليكالىق جاستار فورۋمى پارلامەنت ءماجىلىسىنىڭ قولداۋىمەن «باي-بارىس» ينتەللەكتۋالدىق كلۋبىن ۇيىمداستىرىپ, شاراعا پارلامەنت دەپۋتاتتارى, ۇكىمەتتىك ەمەس ۇيىمداردىڭ وكىلدەرى جانە «جاس وتان» جاستار قاناتىنىڭ مۇشەلەرى, ستۋدەنتتەر اليانسىنىڭ جاستارى مەن جوعارى وقۋ ورىندارىنىڭ ستۋدەنتتەرى قاتىستى. فورۋمدى قورىتىندىلاعان جاستار «بايتەرەك» مونۋمەنتىن تاماشالاپ, «سۇيىكتى ەلىم, ارداقتى قازاقستانىم» اتتى فلەش-موب تاسىلىمەن استانا كوگىنە شارلار ۇشىردى.
ساۋلە دوسجانوۆا, جۋرناليست.