اتتارىنا زاتتارى ساي تۇلپارلار الامان بايگەدە جۇلدەلى ورىنداردى ءبولىستى
ەل تاۋەلسىزدىگىنىڭ 20 جىلدىعىنا ارنالىپ, وبلىس ورتالىعىنداعى «قۇلاگەر» يپپودرومىندا ۇلتتىق ات سپورتى ويىن تۇرلەرىنەن 14-ءشى سپارتاكيادا بولىپ ءوتتى ال «الامان بايگەگە» قازاقى اتاۋلارى بار وسىنداي تۇلپارلار قاتىسىپ, سپارتاكيادانىڭ ءسانىن كەلتىردى.
ءۇش كۇنگە سوزىلعان سپورتتىق مەرەكە اۋدارىسپاق, قىز قۋ, بايگە, تەڭگە الۋ سياقتى قازاقتىڭ ۇلتتىق ويىندارىنا ارنالىپ, سوڭى الامان بايگەگە, كوكپارشىلار سايىسىنا ۇلاستى. اپالى-ءسىڭلىلى ءالينا, ءامينا باۋىرجانوۆالار «قىز قۋ» ويىنىنىڭ ناعىز ءوزىن كورسەتتى. ات ۇستىندە دارا شاپقان ەكى قىزعا جەتە الماي جىگىتتەر قالدى شاڭ قاۋىپ. ونىڭ ۇستىنە قىزداردان ءوز «سىباعالارىن» الدى.
ودان كەيىن جانكۇيەرلەر «ۇشقىر اتتار» جارىسىن تاماشالادى. اتىنىڭ ءوزى-اق ايتىپ تۇرعانداي, ەكى جارىم شاقىرىمعا شاپقان ءسايگۇلىكتەر اراسىنان ەكىباستۇزدىق سايات بەگاليەۆتىڭ تۇلپارى ءبىرىنشى بولىپ كەلدى. ونىڭ «ەنگيماحانت» اتتى تۇلپارى بارلىق اينالىمدى ەركىن شاۋىپ ءوتتى. ەكىنشى ورىنعا وبلىس ورتالىعىندا تۇراتىن تۇرار ساتتاروۆتىڭ «تراۋ-ماستەر» اتتى تۇلپارى يە بولدى. ال, اقتوعاي اۋدانىنان كەلگەن بوگەنباي مۇساەۆتىڭ «زالكاپۋر» اتتى جۇيرىگى ۇزدىك ۇشتىكتى قورىتىندىلادى. وسىدان-اق جۇيرىكتەردىڭ ۇنەمى بابىندا, كۇتىمدە ۇستالعانى بايقالادى. «توق بايگەگە» 15 جۇيرىك قاتىستى.
ال «الامان بايگەنىڭ» اتى – «الامان بايگە». ياعني, قاي كەزدە بولسا دا جۇرتشىلىق نازارى سوندا. ءسويتىپ, 24 شاقىرىمدىق «الامان بايگەگە» 18 جۇيرىك جىبەرىلىپ ەدى. نۇرداۋلەت توكەن ۇلى باپتاعان اتىنا زاتى ساي «بايان سۇلۋ» دەگەن تۇلپار ءبىرىنشى ورىن السا, اقسۋلىق الان ىسقاقوۆتىڭ «قارلىعاشى» سورە سىزىعىن ەكىنشى بولىپ قيدى. پاۆلودار اۋدانىنىڭ وكىلى ەرعانات شامشاەۆتىڭ «گاۋھارتاسى» ۇزدىك ۇشتىكتى قورىتىندىلادى.
جارىس سوڭىندا «بايان سۇلۋدىڭ» يەسىنە جەڭىل كولىكتىڭ كىلتى بەرىلدى.
فاريدا بىقاي.
پاۆلودار وبلىسى.