بوكس ساڭلاقتارى گولوۆكين-الۆارەس جەكپە-جەگىنە قاتىستى پىكىر ايتتى

سەرىك ساپيەۆ اتالعان جەكپە-جەكتى قاراعاندىداعى بوكس ورتالىعىندا جانكۇيەرلەرمەن بىرگە تاماشالاعان. ونىڭ ايتۋىنشا, گولوۆكين بۇل كەزدەسۋدە 7:5 ەسەبىمەن جەڭىسكە جەتكەن. «مەنىڭشە, گەننادي العاشقى راۋندتاردا-اق سوققى جاساۋعا كوپ ءمان بەرگەن سەكىلدى. ونىڭ ءبىر عانا سوققى جاساپ, جەكپە-جەكتى اياقتاۋدى كوزدەگەنى كورىنىپ تۇردى. ال الۆارەس بۇل ايقاسقا وتە جاقسى دايىندالعان ەكەن», دەدى ول. سونداي-اق, سەرىك ساپيەۆ ەگەر قارىمتا كەزدەسۋ وتەتىن بولسا, وندا وتانداسىمىز جەڭىسكە جەتەدى دەپ ەسەپتەيدى. ويتكەنى, ونىڭ جاتتىقتىرۋشىسى تاجىريبەلى. الداعى جەكپە-جەگىنە جاقسى جوسپار قويىپ بەرە الادى دەيدى. سونداي-اق, ول تورەشىلەردىڭ شەشىمى جانكۇيەرلەردىڭ بوكسقا دەگەن قىزىعۋشىلىعىڭ تومەندەتەدى دەپ ەسەپتەيدى. «تورەشىلەر قاتەلەستى دەيتىندەي كوپتەگەن فاكتورلار بار. بۇل – ادامي فاكتور. بالكىم, بىرەۋلەرگە بۇل شەشىم پايدالى شىعار. ءار ادام قاتەلەسۋى مۇمكىن. مۇنداي شەشىم تەك بوكستا ەمەس, سپورتتىڭ وزگە دە تۇرلەرىندە دە كەزدەسەدى. شەشىم كوبىنەسە تورەشىلەرگە ەمەس, جانكۇيەرلەرگە قاتتى اسەر ەتەدى», دەدى س.ساپيەۆ.

سونىمەن قاتار, وتاندىق تەلەارنادا گولوۆكين-الۆارەس جەكپە-جەگىندە  كوممەنتاتور بولعان افينى وليمپياداسىنىڭ چەمپيونى باقتيار ارتاەۆ تا كەزدەسۋ تۋرالى پىكىرىن ورتاعا سالدى. ارتاەۆتىڭ پىكىرىنشە, گولوۆكين مەكسيكالىق بوكسشىدان باسىمداۋ بولعان. بىراق, تورەشىلەر جەڭىستى وتانداسىمىزعا قيماعان. سونداي-اق, ول ەگەر قارىمتا كەزدەسۋ وتەتىن بولسا, گولوۆكينگە وڭاي بولمايتىنىن ايتتى. «ەگەر ەكى بوكسشى كەلەسى جىلدىڭ مامىر نەمەسە قىركۇيەك ايلارىندا كەزدەسىپ جاتسا, گەننادي گولوۆكينگە قيىنداۋ بولاتىن سەكىلدى. ەشقايدا بۇرا تارتپاي, ءوزىمنىڭ جەكە پىكىرىمدى ايتقىم كەلەدى. ونىڭ جاسى ۇلعايعان سايىن, وزىنە كەرى اسەرىن تيگىزەدى. ال جاسى كەمەلىنە كەلىپ, ءارى كۇشەيىپ كەلە جاتقان الۆارەس ءۇشىن بۇل وتە پايدالى. اشىعىن ايتۋ كەرەك, قارىمتانىڭ وسىنداي كەرى جاعى بار. دەگەنمەن, باعى جانسا, اۋىر سوققىسى بار گولوۆكين ماسەلەنى ءبىر سوققىمەن شەشىپ كەتۋى مۇمكىن», دەدى باقتيار ارتاەۆ.

ءالي بيتورە, «ەگەمەن قازاقستان»