بۇعان دەيىن ء«ۇش توعىز», «انا جۇرەگى», «وبراتنايا ستورونا» سەكىلدى تۋىندىلارىمەن تانىلىپ ۇلگەرگەن «MG productions» كينوكومپانياسى حح عاسىرداعى ادام قولىمەن قاساقانا جاسالعان جانتۇرشىگەرلىك قىلمىستاردىڭ ءبىرى – 1931-1933 جىلدارداعى اشارشىلىق تۋرالى فيلم ءتۇسىرۋدى قولعا الماق.
كينوكومپانيانىڭ باس پروديۋسەرى ەرنار ماليكوۆتىڭ ايتۋىنشا, اشتىقتىڭ سالدارىنان قازاق حالقىنىڭ 60 پايىزعا جۋىعى قىرىلىپ, 1,5 ميلليوننان استام ادام تۋعان جەرىن تاستاپ, شەكارا اسۋعا ءماجبۇر بولعان. تاريحي دەرەكتەردى العا تارتقان پروديۋسەردىڭ مالىمەتىنشە, 1911 جىلدارى قازاقستانداعى جەرگىلىكتى ۇلت سانى 8,5-9 ملن بولعان. قازاق حالقى سان جاعىنان تۇركى تىلدەس حالىقتاردىڭ ىشىندە وسمان تۇرىكتەرىنەن كەيىن ەكىنشى ورىن يەلەنگەن. ال 1939 جىلعى دەرەكتەرگە قاراعاندا, بۇرىن-سوڭدى بولماعان زۇلماتتان نەبارى 2,4 ملن قازاق قانا امان قالعان.
سونداي-اق فيلم ستسەناريىنىڭ اۆتورى ءارى رەجيسسەرى, ەۋروپالىق جانە حالىقارالىق ايەل-فيلممەيكەرلەر قاۋىمداستىعىنىڭ مۇشەسى مارينا قوناروۆا ۇلتتىق قۇندىلىقتاردى قۇرمەتتەۋگە, ادامگەرشىلىك, اۋىزبىرشىلىك, ادامزاتتى ءسۇيۋ سەكىلدى ىزگىلىك يدەياسىن دارىپتەۋگە دە ەرەكشە ءمان بەرىلگەنىن ايتتى.
ءفيلمنىڭ جوباسىن ول وسىدان بەس جىل بۇرىن جازعان. وسى ۋاقىتقا دەيىن ورايلى ءساتىن كۇتىپ جاتقان جوباعا ەۋروپا كينو قورى تەك بيىل عانا قولداۋ ءبىلدىرىپ, فيلم بيۋدجەتىنىڭ تەڭ جارتىسىن تولەپ بەرۋگە ۇسىنىس جاساعاننان كەيىن ءتۇسىرۋ توبى ىسكە كىرىسكەن.
ءفيلمنىڭ جارتى قاراجاتىن تابۋ ءۇشىن باس پروديۋسەر جەكە ينۆەستورلار مەن بۇل تاقىرىپقا بەيجاي قاراي المايتىن جاناشىرلاردىڭ قولداۋىنا سۇيەنەتىنىن جەتكىزدى. ءتۇسىرىلىم جۇمىسى قاراشا ايىندا باستالىپ, 2018 جىلدىڭ اقپان ايىندا اياقتالادى دەپ جوسپارلانىپ وتىر. 2018 جىلدىڭ كۇزىندە «اشارشىلىق» ءفيلمى الەمدىك پروكاتقا جول تارتپاق.
ايگۇل احانبايقىزى, «ەگەمەن قازاقستان»
الماتى