كەشە قارجى مينيسترلىگىنە قاراستى استانا قالالىق قازىناشىلىق دەپارتامەنتىندە PEM PAL قازىناشىلىق قاۋىمداستىعىنىڭ حالىقارالىق سەمينارى باستالدى. سەمينار ەل تاۋەلسىزدىگىنىڭ 20 جىلدىق مەرەيتويىنا وراي ۇيىمداستىرىلىپ وتىر.
1-14 قىركۇيەك ارالىعىندا وتكەن حالىقارالىق ۆاليۋتا قورى ميسسياسى قازاقستاندا بيۋدجەتتىڭ اتقارىلۋى جانە قازىناشىلىق قىزمەتى جالپى جانە تۇتاس العاندا حالىقارالىق ستاندارتتارعا ساي كەلەدى دەپ باعا بەرگەن بولاتىن. وعان قوسا, قازاقستان قازىناشىلىعى اقپاراتتىق جۇيەسىنىڭ تابىستى قىزمەت ەتىپ جاتقاندىعى جۇيەگە دەگەن تاياۋ جانە الىس شەتەلدەردىڭ قىزىعۋشىلىعىمەن قۋاتتالىپ وتىر.
ەلىمىزدە ءوتىپ جاتقان «قازىناشىلىق وپەراتسيالارىندا اقپاراتتىق تەحنولوگيالاردىڭ قولدانىلۋى» اتتى حالىقارالىق سەمينار PEM PAL قازىناشىلىق قاۋىمداستىعىنىڭ جەتەكشى توبى مەن قارجى مينيسترلىگىنىڭ قازىناشىلىق كوميتەتىنىڭ, سونداي-اق استاناداعى بۇكىلالەمدىك بانك كەڭسەسىنىڭ قولداۋىمەن وتكىزىلۋدە. سەمينارعا تاياۋ جانە الىس شەتەلدەردەن 70 ادام قاتىسۋدا. ولاردىڭ قاتارىندا البانيا, ارمەنيا, بەلارۋس, بوسنيا جانە گەرتسەگوۆينا, ماكەدونيا, ءوڭتۇستىك كورەيا, فرانتسيا, گەرمانيا, اۆستراليا, كەنيا, دانيا جانە باسقا دا ەلدەردىڭ ساراپشىلارى بار.
سەميناردىڭ باستى ماقساتى قازىناشىلىق قاۋىمداستىعىنا كىرەتىن ەلدەردىڭ ماماندارى مەن پراكتيكتەرىنىڭ قازىناشىلىق ءجۇيەسىنە زاماناۋي اقپاراتتىق تەحنولوگيانى ەنگىزۋ سالاسىنداعى تاجىريبە الماسۋى بولىپ تابىلادى. اتالمىش جۇيە قازىناشىلىق سالاسىنداعى اقپاراتتاندىرۋدىڭ كوكەيكەستى دەڭگەيگە شىعۋىن قامتاماسىز ەتىپ قانا قويماي, مەملەكەتتىك قارجى سالاسىن باسقارۋ جۇيەسىندە دە رەفورمالاردىڭ العا جىلجۋىنا سەبىن تيگىزۋى كەرەك. ءۇش كۇندىك سەمينار بارىسىندا بۇكىلالەمدىك بانكتىڭ مەملەكەتتىك قارجى سالاسىنداعى اقپاراتتىق جۇيەلەر بويىنشا جەتەكشى مامانى دەنەر مىرزا وسى تاقىرىپقا بايلانىستى جۋىردا جۇرگىزىلگەن زەرتتەۋلەر ءناتيجەلەرىن جاريالايدى دەپ كۇتىلىپ وتىر. شارانىڭ العاشقى كۇنىندە قارجى مينيسترلىگى قازىناشىلىق كوميتەتى توراعاسىنىڭ ورىنباسارى ايگۇل بايعوجينا, اقپاراتتىق تەحنولوگيالار باسقارماسىنىڭ باستىعى ەرلان شالعىمباەۆ ەلىمىزدىڭ قازىناشىلىق جۇيەسىندەگى اقپاراتتىق تەحنولوگيالاردىڭ ەنگىزىلۋىنىڭ تۇساۋكەسەرىن جاسادى. ال ەرتەڭ وسى ءماسەلەلەر بويىنشا ارنايى شاقىرىلعان وڭتۇستىك كورەيا, دانيا, فرانتسيا جانە رەسەي ەلدەرىنىڭ ساراپشىلارى ءوز يننوۆاتسيالىق شەشىمدەرىمەن بولىسپەك.
ۆەنەرا تۇگەلباي.