24 قىركۇيەكتە نيۋ-يوركتە قازاقستان سىرتقى ىستەر ءمينيسترىنىڭ ورىنباسارى قايرات وماروۆتىڭ جانە اقش مەملەكەتتىك حاتشىسىنىڭ وڭتۇستىك جانە ورتالىق ازيا بويىنشا كومەكشىسى روبەرت بلەيكتىڭ توراعالىعىمەن 2010 جىلدىڭ ناۋرىز ايىنان بەرى ىسكە قوسىلعان جىل سايىنعى قازاقستان-امەريكا كونسۋلتاتسيالار قۇرىلىمى اياسىنداعى كەلىسىمدەردىڭ ورىندالۋ بارىسى جايىندا جوسپارلى «ساعات تۋرالاۋى» ءوتتى.
شارا بارىسىندا قازاقستاندىق جانە امەريكالىق تاراپتار قازاقستان مەن اقش اراسىنداعى ستراتەگيالىق ارىپتەستىكتىڭ نەگىزىن قۇرايتىن ەكىجاقتى كونسۋلتاتسيالار تەتىگىنىڭ نەگىزگى بەس باعىتتا شيراق دامىپ كەلە جاتقانىنا توقتالدى. اتاپ ايتساق, ولار: جاھاندىق جانە اۋماقتىق قاۋىپسىزدىك, ساياسي ءماسەلەلەر, دەموكراتيا مەن ادام قۇقىقتارى, ەكونوميكا جانە الەۋمەتتىك دامۋ, ەنەرگەتيكا.
سونىمەن بىرگە, ق.وماروۆ پەن ر.بلەيك كۇن تارتىبىندەگى جانە بۇۇ باس اسسامبلەياسىنىڭ 66-سەسسياسى شەڭبەرىندە پرەزيدەنت نۇرسۇلتان نازارباەۆ پەن پرەزيدەنت باراك وبامانىڭ ەكىجاقتى كونسۋلتاتسيالار ماتىنىندەگى قازىرگى زامانعى جاھاندىق ماسەلەلەر مەن اۋماقتىق قاۋىپتەردى شەشۋدەگى جولدارىنىڭ ۇقساستىعىن تاعى دا راستاعانىن اتاپ ءوتتى.
قازاقستان جانە امەريكا ديپلوماتتارى اڭگىمەنىڭ جالعاسىندا كەلەشەكتە جاپپاي قىرىپ-جويۋ قارۋىن تاراتپاۋ جانە يادرولىق قاۋىپسىزدىكتى قامتاماسىز ەتۋ, اۋماقتىق قاۋىپسىزدىك ماسەلەلەرىن شەشۋ, اۋعانستان ماسەلەسى سياقتى جۇمىستاردىڭ بىرىككەن قادامدارىن تالقىلادى.