كەشە اقوردادا ەلباسى نۇرسۇلتان نازارباەۆ «سىتىك GROUP» كومپانياسىنىڭ باس ديرەكتورى تيان گۋوليدى قابىلدادى.
«سىتىك GROUP» – قىتايدىڭ حالىقارالىق تراست جانە ينۆەستيتسيا جونىندەگى مەملەكەتتىك كومپانياسى. كومپانيا ەلدىڭ مەمكەڭەسىنە تىكەلەي باعىنادى. ونىڭ جۇمىس باعىتتارى كوپ, سونىڭ ىشىندە قارجى, ەنەرگەتيكا جانە رەسۋرستار, ينفراقۇرىلىم, اۋە كولىگى, حالىقارالىق ينجينيرينگ, ماشينە جاساۋ, اقپارات جانە ت.ب. سالالار بار. كومپانيانىڭ 40-تان استام ەنشىلەس كاسىپورىندارى جانە فيليالدارى تىركەلگەن. سونىڭ ىشىندە 11-ءى امەريكا, اۆستراليا سەكىلدى شەت ەلدەردە جۇمىس ىستەيدى. ونىڭ جالپى كاپيتالى 122 ملرد. اقش دوللارىن قۇرايدى, قاراماعىندا 70 مىڭنان ارتىق ادام ەڭبەك ەتەدى.
قازاقستاندا بۇل كومپانيا مۇناي-گاز كەشەنى سالاسىندا ىنتىماقتاستىق ورناتقان. «قاراجامباسمۇناي» اق-تىڭ 50 پايىزدىق ۇلەسى وسى كومپانيانىڭ يەلىگىندە, ال قالعانى «قازمۇنايگاز» ۇك» اق-تىڭ قۇزىرىندا. كومپانيا اقتاۋدا جول بيتۋمى زاۋىتىن سالۋدى قولعا العان.
ەلباسى مەن كومپانيا باسشىسىنىڭ كەزدەسۋى كەزىندە ينۆەستيتسيالىق ىنتىماقتاستىقتىڭ ءبىرقاتار ماسەلەلەرى تالقىلاندى. كەزدەسۋدەن شىققان سوڭ تيان گۋولي جۋرناليستەرمەن شاعىن بريفينگ وتكىزدى.
– بۇل مەنىڭ قازاقستانعا جاساعان العاشقى ساپارىم. ءبىز وسىنداعى ءوزىمىز بولعان بارلىق جەردە دە قۇرىلىس الاڭدارىن, مۇنارالاردى كوردىك. بۇل – قازاقستاندىق ەكونوميكانىڭ سەرپىندى دامىپ وتىرعاندىعىنىڭ بەلگىسى. وسى كورىنىس قىتايدا رەفورمالار مەن اشىقتىق ساياساتى باستالعان جانە ەكونوميكامىزدىڭ شاپشاڭ دامي باستاعان كەزەڭىن ەسكە تۇسىرەدى. مەن پرەزيدەنت نۇرسۇلتان نازارباەۆپەن, پرەمەر-مينيستر كارىم ءماسىموۆپەن, مينيسترلەرمەن, قازاقستاندىق كاسىپورىنداردىڭ باسشىلارىمەن كەزدەسۋىم كەزىندە ءبارىنىڭ دە قازاقستان ەكونوميكاسىنىڭ تاماشا بولاشاعىنا دەگەن سەنىمدەرىن بايقادىم. ءبىز قازىر قازاقستاندىق ارىپتەستەرىمىزبەن بىرقاتار ءبىرلەسكەن جوبالاردى جۇزەگە اسىرۋدامىز, – دەدى.
وسى ورايدا ول «قاراجامباس» كەنىشىن يگەرۋگە قاتىسىپ جاتقاندارىن ايتتى. مۇنايدان باسقا ءبىز قازاقستاننىڭ شيكىزاتتىق ەمەس سەكتورىمەن ىنتىماقتاستىقتى دامىتۋدى قولعا الدىق. بۇل قازاقستان ەكونوميكاسىنىڭ دامۋىنا جول اشادى دەپ سانايمىز. سونداي-اق, پرەزيدەنت نۇرسۇلتان نازارباەۆتىڭ ۇسىنىسى بويىنشا قازاقستاندىق ارىپتەستەرىمىزبەن ءبىرلەسە وتىرىپ, بيتۋم زاۋىتى جوباسىن جۇزەگە اسىرىپ جاتىرمىز. وسى زاۋىتتى پايدالانۋعا بەرگەننەن كەيىن قازاقستان بيتۋمدى سىرتتان تاسىمايتىن بولادى. ءبىز «سامۇرىق-قازىنامەن» بىرلەسىپ «سيتيك-قازىنا» بىرلەسكەن ينۆەستيتسيالىق قورىن قۇردىق. ونىڭ ماقساتى – قازاقستاندا جانە قىتايدا, سونداي-اق باسقا شەتەلدەردە پەرسپەكتيۆالى ينۆەستيتسيالىق جوبالاردى ىزدەستىرۋ. مەنىڭ ساپار كەزىندەگى بايقاعانىم, قازاقستاندا قازىر شەتەلدىك ينۆەستيتسيالار ءۇشىن جاقسى زاڭدىق بازا جاسالعان. ءبىزدىڭ مەملەكەتتەرىمىز اراسىندا وتە جاقسى ساياسي قاتىناستار, حالىقتارىمىز اراسىندا ەجەلدەن تاتۋ جانە جىلى شىرايلى كورشىلىك قارىم-قاتىناستار ورنىققان. مۇنىڭ ءبارى ءبىزدىڭ بىرلەسكەن ينۆەستيتسيالارىمىزدى العا جىلجىتۋعا قىزمەت ەتەدى, دەدى ت.گۋولي.
جاقسىباي سامرات.