قوستانايدا ەكى جىلدان بەرى «ءبادريسافا» ەكسپەديتسياسى قۇرىلىپ, الاش ارداقتىسى, ۇلت ۇستازى احمەت بايتۇرسىنوۆتىڭ جارى ءبادريسافا انامىزدىڭ ومىردەرەكتەرىن انىقتاۋدا ءبىرسىپىرا ءىس تىندىرىپ كەلەدى. جاقىندا ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتى, «نۇر وتان» حدپ قوستاناي قالالىق فيليالى بىرلەسىپ, «ءبادريسافا تاعدىرى – تاۋەلسىزدىك تاريحىنىڭ بولشەگى» اتتى دوڭگەلەك ۇستەل ءماجىلىسىن وتكىزدى. وعان احاڭنىڭ الماتى قالاسىنداعى مۋزەيىنىڭ ديرەكتورى, فيلولوگيا عىلىمدارىنىڭ كانديداتى رايحان يماحانبەتوۆا, ل.ن.گۋميلەۆ اتىنداعى ەۋرازيا ۋنيۆەرسيتەتىنىڭ وقىتۋشىسى, تاريح عىلىمدارىنىڭ دوكتورى, پروفەسسور ماحسات الپىسبەس جانە قوستانايدىڭ زيالى قاۋىمى, ءبادريسافانىڭ كوزىن كورگەن قاريالار, ستۋدەنتتەر قاتىستى.
دوڭگەلەك ۇستەل ماجىلىسىندە الدىمەن «ءبادريسافا» ەكسپەديتسياسىنىڭ قۇرىلعالى بەرگى ەكى جىل ىشىندە اتقارعان جۇمىسى كوپشىلىككە حاباردار ەتىلدى. وسى ۋاقىت ىشىندە ونىڭ مۇشەلەرى احاڭ مەن ءبادريسافا شەشەمىزدىڭ تابانى تيگەن الماتى, توم, ورىنبور شاھارلارىنا بارىپ قايتتى. ولجاسىز دا ەمەس. ساياسي قۋعىن-سۇرگىن جىلدارىنىڭ جازىقسىز قۇربانى بولعان قوس مۇڭلىقتىڭ ءىزى قالعان جەرلەردەن ارحيۆ ماتەريالدارىمەن قاتار, ولاردىڭ كوزىن كورگەن جانداردىڭ اڭگىمەلەرى جازىلىپ الىندى, باسقا دا جاناما دەرەكتەر تابىلدى.
ماجىلىستە ءسوز العان ر.يماحانبەتوۆا «ءبادريسافا» ەكسپەديتسياسىنىڭ جۇمىسى احمەتتانۋ ىسىنە قوسىلاتىن ۇلەس ەكەنىن ايتسا, م.الپىسبەس تەك قۇجاتناما عانا ەمەس, قازاق تاريحىن جازۋدا اۋىزشا جەتكەن دەرەكتەرگە دە ءمان بەرۋ كەرەكتىگىنە توقتالدى. ال وسى باسقوسۋعا شالعايدا جاتقان تورعاي كەنتىنەن كەلىپ قاتىسقان جانگەلدين اۋداندىق ارداگەرلەر كەڭەسىنىڭ توراعاسى ورەكەن الماتوۆ اقىن, اۋدارماشى قاسىم توعىزاقوۆتىڭ اسا اۋىر كۇندەردى باسىنان كەشىپ جۇرگەن بادريسافاعا قول ۇشىن سوزعانىنا كۇمان كەلتىرۋگە بولمايتىنىن ناقتى مىسالدارمەن جەتكىزدى. ول ءوزى دە سودىر ساياساتتىڭ توقپاعىن كورگەن قاسىمنىڭ تەك اقىن عانا ەمەس, ادامگەرشىلىكتى تۋ ەتىپ وتكەن ازامات بولعانىن ايتتى. باسقوسۋدا بۇرىنعى ەكپىندى اۋىلىندا ايانىشتى حالدە كوز جۇمعان الەكساندرانىڭ احاڭنىڭ اياۋلى جارى ءبادريسافا ەكەنى تۋرالى پىكىرلەر توعىسىپ جاتتى.
«نۇر وتان» حدپ قوستاناي قالالىق فيليالىنىڭ ءتورايىمى, پروفەسسور ريمما بەكتۇرعانوۆا جەتەكشىلىك ەتەتىن «ءبادريسافا» ەكسپەديتسياسىنىڭ جۇمىسىنا قازىر قوستاناي وبلىسىنداعى ورىس ينتەلليگەنتسياسى دا اتسالىسىپ وتىر. سۋرەتشى نيكولاي تورشين ءبادريسافا شەشەمىزدىڭ پورترەتىن سالىپ شىقتى. بۇل قىلقالام يەسى ەلىمىز تاۋەلسىزدىگىنىڭ ەلەڭ-الاڭىندا احاڭ پورترەتىن العاشقى سالعانداردىڭ دا ءبىرى بولاتىن. ال م.گوركي اتىنداعى ورىس دراما تەاترىنىڭ باس رەجيسسەرى الەكساندر ليوپا ەگەر ستسەناري جازىلسا احاڭ مەن ءبادريسافا تۋرالى سپەكتاكل قويۋعا دايىن ەكەنىن ءبىلدىردى.
الداعى ۋاقىتتا «ءبادريسافا» ەكسپەديتسياسى قولعا العان جۇمىستى ودان ءارى جالعاستىراتىن بولادى. سونىمەن قاتار, كەلەسى جىلى وسى تاقىرىپقا عىلىمي-پراكتيكالىق كونفەرەنتسيا وتكىزىپ, مەڭدىعارا اۋدانىنداعى بۇرىنعى ەكپىندى اۋىلىنداعى انامىزدىڭ سۇيەگى جاتقان قىردىڭ ۇستىنە ەسكەرتكىش بەلگى ورناتۋعا ءباتۋالاستى. بۇگىنگى ۇرپاققا تاعىلىم بولارلىقتاي وزگە دە جۇمىستار جۇرگىزىلەتىن بولادى.
ءنازيرا جارىمبەتوۆا.
قوستاناي.