«نۇر وتان» حالىقتىق-دەموكراتيالىق پارتياسىنىڭ دەلەگاتسياسى پارتيا توراعاسىنىڭ ءبىرىنشى ورىنباسارى نۇرلان نىعماتۋليننىڭ جەتەكشىلىگىمەن ماسكەۋ قالاسىندا وتكىزىلگەن «ەدينايا روسسيا» پارتياسى سەزىنىڭ جۇمىسىنا قاتىستى.
سەزد 11 مىڭ قاتىسۋشىلاردىڭ باسىن قوسىپ, جاي عانا پارتيالىق ءىس-شارا شەگىنەن شىقتى. «ەدينايا روسسيا» پارتياسىنىڭ ءحىى سەزى قازىردىڭ وزىندە ەڭ اۋقىمدى جانە كوپ تالقىلاناتىن ءىس-شارا دەپ اتالدى. ونىڭ باستى قورىتىندىسى ەكى نەگىزگى جاڭالىق: پرەمەر-مينيستر ۆلاديمير ءپۋتيننىڭ كانديداتۋراسى ەل پرەزيدەنتى لاۋازىمىنا ۇسىنىلىپ, جەلتوقسان ايىندا وتكىزىلەتىن مەملەكەتتىك دۋما سايلاۋىندا «ەدينايا روسسيانىڭ» پارتيالىق ءتىزىمىن پرەزيدەنت دميتري مەدۆەدەۆ باسقاراتىن بولدى. جالپى, وسى تىزىمگە 600 ادام كىردى. سايلاۋ ءتىزىمىنىڭ ەرەكشەلىگى – ونىڭ 53 پايىزىن قازىرگى مەملەكەتتىك دۋما دەپۋتاتتارى قۇراسا, ال ۇشتەن ءبىر بولىگى – جالپىۇلتتىق حالىقتىق مايدان ارقىلى وتكەن ەشبىر پارتياعا كىرمەيتىن ازاماتتار بولىپ وتىر. وسىنىڭ ارقاسىندا تىزىمگە ايماقتاردان ءمۇلدەم جاڭا قىزىقتى ادامدار كىردى. بۇل جاعداي دۋمانىڭ جاڭا قۇرامىنان جاڭاشا وي-پىكىرلەر مەن كوزقاراستاردى كۇتۋگە ءمۇمكىندىك بەرمەك.
دميتري مەدۆەدەۆ پەن ۆلاديمير ءپۋتيننىڭ سەزد بارىسىندا سويلەگەن سوزدەرىنىڭ ءماتىنىن پارتيانىڭ سايلاۋالدى باعدارلاماسى دەپ ەسەپتەۋ ۇسىنىلدى. ونىڭ ۇلكەن بولىگى الەۋمەتتىك سالاعا, ەڭبەكاقى, زەينەتاقى ءمولشەرىن كوبەيتۋ, يپوتەكالىق نەسيەنىڭ پايىزدىق مولشەرلەمەلەرىن ازايتۋ, تۇرعىن ءۇي سالۋ جانە بايلاردىڭ سالىق كولەمىن كوبەيتۋگە ارنالعان.
الايدا, كوشباسشىلاردىڭ ءوزدەرىنىڭ ايتۋىنشا, ەڭ ماڭىزدىسى – وسىعان قالاي قول جەتكىزۋگە بولاتىنى جانە رەسەي ازاماتتارىنىڭ بۇعان قاتىستى كوزقاراستارى قانداي بولاتىنى. فورۋم پارتيانىڭ سايلاۋالدى تاكتيكاسىن ايقىنداپ قانا قويماي, سونىمەن قاتار, ەلدە ورناعان بيلىك مودەلىنىڭ تيىمدىلىگىن كورسەتتى. ەڭ جاقىن كورشىلەرمەن جاقىنداسۋ دا باستى باسىمدىقتاردىڭ ءبىرى بولىپ تابىلادى.
«ەدينايا روسسيا» پارتياسى مەن ەلباسى نۇرسۇلتان نازارباەۆ باسقاراتىن «نۇر وتان» حالىقتىق-دەموكراتيالىق پارتياسى اراسىندا ارىپتەستىك قاتىناستار قالىپتاسىپ ۇلگەرگەن. سول سەبەپتى شەتەلدىك پارتيا وكىلدەرىنىڭ العاشقىسى بولىپ قازاقستاندىق دەلەگاتسيا جەتەكشىسىنىڭ ءسوز ءسويلەگەنى كەزدەيسوقتىق ەمەس. نۇرلان نىعماتۋلين مەملەكەت باسشىسىنىڭ قۇتتىقتاۋ ءسوزىن وقىدى. قۇتتىقتاۋ ماتىنىندە سوڭعى جىلدارى ەكى ەل اراسىنداعى سىندارلى جان-جاقتى ارىپتەستىك پەن ستراتەگيالىق ىنتىماقتاستىق جاڭا دەڭگەيگە شىققانى تۋرالى ايتىلعان. بۇعان كەدەن وداعىنىڭ قۇرىلىپ, بىرىڭعاي ەكونوميكالىق كەڭىستىكتىڭ قالىپتاسۋى ءدالەل بولا الادى.
پارتياارالىق قارىم-قاتىناستارعا قاتىستى: «ءوز ەلدەرىندەگى ساياسي ۇدەرىستەردىڭ كوشباسشىلارى بولىپ تابىلاتىن «نۇر وتان» مەن «ەدينايا روسسيا» پارتيالارى اراسىنداعى بايلانىستار دا كۇن سايىن كۇشەيىپ كەلەدى. وسىلايشا ەكى ەلدىڭ باۋىرلاس حالىقتارى اراسىنداعى دوستىق قارىم-قاتىناستارىن ودان ءارى دامىتۋعا ءبىزدىڭ پارتيالارىمىز ءوز ۇلەسىن قوسۋدا. الداعى ۋاقىتتا دا رەسەيلىك دوستارىمىزبەن ءارىپتەستىگىمىزدى دامىتىپ, پارتياارالىق قارىم-قاتىناستارىمىزدى نىعايتۋدى كوزدەپ وتىرمىز», دەلىنگەن.
قازاقستان مەن رەسەي جاي عانا كورشى ەلدەر ەمەس, ءبىزدىڭ دامۋ جولدارىمىز ورتاق. بۇل تۋرالى «ەدينايا روسسيا» وكىلدەرى بىرنەشە رەت ايتقان بولاتىن. ال ينتەگراتسيالىق بايلانىستار كەڭەيىپ, ناقتى ناتيجەلەر بەرۋدە.
مەملەكەتتىك دۋما دەپۋتاتى ولەگ ساۆچەنكو قازاقستاندىق پارتيانىڭ العاشقى بولىپ ءسوز ءسويلەگەنى رەسەيدىڭ ەلباسىمىز نۇرسۇلتان ءابىش ۇلى نازارباەۆقا دەگەن ايرىقشا كوزقاراسىنىڭ دالەلى ەكەنىن اتاپ ءوتتى. ول – بىرەگەي تۇلعا, ءبىزدىڭ ستراتەگيالىق ءارىپتەستىگىمىز دە ونىڭ اتىمەن بايلانىستى.
– باسقا شەتەلدىك پارتيالارعا قاراعاندا, ءبىزدىڭ «نۇر وتان» پارتياسىمەن قارىم-قاتىناستارىمىز الدا كەلەدى. «نۇر وتان» – بۇل ءبىزدىڭ ناعىز ارىپتەسىمىز, ناعىز دوسىمىز. ءبىز وتكەن ۋاقىتتا جاساعان ىستەرىمىزبەن ماقتانا الامىز جانە دە بولاشاقتا ودان دا قىرۋار جۇمىس اتقاراتىنىمىزعا سەنىمدىمىن. الا المايتىن اسۋلارىمىز جوق, – دەدى مەملەكەتتىك دۋما دەپۋتاتى كونستانتين كوساچەۆ.
پارتياارالىق بايلانىستار قارقىندى دامىپ كەلەدى. وعان ءدالەل – ىنتىماقتاستىق جايلى جاڭا كەلىسىمگە قول قويىلعانى. وعان «نۇر وتان» پارتياسى ءتوراعاسىنىڭ ءبىرىنشى ورىنباسارى نۇرلان نىعماتۋلين مەن «ەدينايا روسسيا» جوعارعى كەڭەسىنىڭ ءتوراعاسى بوريس گرىزلوۆ قول قويدى. قۇجاتقا ءوزارا قارىم-قاتىناس ورناتۋدىڭ, الداعى جىلدارى ءتاجىريبە الماسۋدىڭ ناقتى شارالارى كىرگەن جانە دە بۇل قۇجات ەكى پارتيا بايلانىستارى تاريحىنىڭ جاڭا تاراۋىن اشادى دەپ ايتۋعا بولادى.
«ەگەمەن-اقپارات».