وتكەن جەكسەنبى كۇنى قازاقستان پارلامەنتى ءماجىلىسىنىڭ توراعاسى ورال مۇحامەدجانوۆ قىتاي حالىق رەسپۋبليكاسى حالىق وكىلدەرى بۇكىلقىتايلىق جينالىسى تۇراقتى كوميتەتىنىڭ توراعاسى ۋ بانگومەن كەزدەسىپ, كەلىسسوز جۇرگىزدى.
و.مۇحامەدجانوۆ ءوزىنىڭ ءسوزىندە پارلامەنت ءماجىلىسى قازاقستان مەن قىتاي اراسىنداعى ستراتەگيالىق ارىپتەستىككە ەرەكشە كوڭىل بولەتىنىن جانە ونىڭ دامۋىنا ۇلەس قوساتىنىن ايتا كەلە, قوس مەملەكەت اراسىنداعى ىنتىماقتاستىق بايلانىس ەكى ەل مەن ەكى ەل حالىقتارىنىڭ تالاپتارىنا تولىق جاۋاپ بەرەتىنىن جەتكىزدى. قازاقستان مەن قىتاي اراسىنداعى كورشىلەس ەلدەردىڭ تۇراقتى دوستىق قارىم-قاتىناسى – حالىقارالىق جانە ايماقتىق قاۋىپسىزدىكتى قامتاماسىز ەتۋدىڭ ماڭىزدى تەتىگى, دەدى پارلامەنت ءماجىلىسىنىڭ توراعاسى.
و.مۇحامەدجانوۆ سونداي-اق سوڭعى جىلدارى قوس مەملەكەت اراسىندا جوعارى دەڭگەيدە ءجۇرگىزىلگەن كەزدەسۋلەر مەن كەلىسسوزدەر ىنتىماقتاستىقتىڭ وركەندەي تۇسۋىنە جول اشقانىن اتاپ كورسەتتى جانە مارتەبەلى مەيماندى قىتاي حالىق رەسپۋبليكاسىنىڭ قۇرىلعانىنا 62 جىل تولۋىمەن قۇتتىقتادى.
ۋ بانگونىڭ رەسمي ساپارمەن ەل تاۋەلسىزدىگىنىڭ 20 جىلدىعى قارساڭىندا كەلىپ وتىرعانىن ايتا كەلىپ, وسى كەزەڭ ىشىندە مەملەكەتىمىزدىڭ تۇڭعىش پرەزيدەنتى نۇرسۇلتان نازارباەۆ جۇرگىزگەن سارابدال ساياسات ارقاسىندا قازاقستان حالىقارالىق دەڭگەيدە بەيبىتشىلىك پەن قاۋىپسىزدىكتى, ۇلتارالىق جانە دىنارالىق ۇنقاتىسۋدى نىعايتۋعا, يادروسىز الەم ورناتۋ ىسىنە ايتارلىقتاي ۇلەس قوسقانىن كولدەنەڭ تارتتى.
بۇل كۇنگى ەكىجاقتى كەزدەسۋ شەڭبەرىندە قازاقستاننىڭ 2010 جىلى تمد ەلدەرىنىڭ اراسىنان ءبىرىنشى بولىپ ەقىۇ-عا توراعالىق ەتكەندىگى, سونىڭ ناتيجەسىندە اتالعان ۇيىمنىڭ قىزمەتىنە جاڭا سەرپىلىس بەرىلگەندىگى, سوڭعى 11 جىلدان بەرى وتپەي كەلگەن ەقىۇ ءسامميتىن استانا قالاسىندا شاقىرۋعا ءمۇمكىندىك تۋعاندىعى, قابىلدانعان استانا دەكلاراتسياسىنىڭ ەقىۇ-نىڭ بەدەلىن كوتەرە تۇسۋگە نەگىز قالاعانى اتاپ كورسەتىلدى.
بيىل قازاقستان يسلام ىنتىماقتاستىعى ۇيىمىنا جەتەكشىلىك ەتۋ جونىندەگى ماڭىزدى مىندەتتى ءوز جاۋاپكەرشىلىگىنە العاندىعى بەلگىلى. وسى تۇرعىدا حالىقارالىق جانە ايماقتىق قاۋىپسىزدىكتى نىعايتۋ, يسلام الەمى مەن باتىس اراسىنداعى ۇنقاتىسۋدى جاقىنداستىرۋ باعىتىندا قانداي ماسەلەلەرگە كوڭىل ءبولىنىپ وتىرعاندىعى دا نازاردان تىس قالمادى. ءماجىلىس توراعاسى بۇل رەتتە ەلىمىزدىڭ ەكونوميكالىق جانە مادەني-گۋمانيتارلىق سالالارداعى جەتىستىكتەرىن مىسالعا كەلتىردى.
قوس مەملەكەتتىڭ قارىم-قاتىناسىن ارتتىرۋدا پارلامەنتارالىق بايلانىستىڭ ءرولى دە زور ەكەنى انىق. 2007 جىلدان بەرى قازاقستان پارلامەنتىنىڭ ءماجىلىسىندە 24 دەپۋتاتتان تۇراتىن حالىق وكىلدەرى بۇكىلقىتايلىق جينالىسىمەن ىنتىماقتاستىق توبى جۇمىس ىستەيدى. ال وتكەن جىلعى قاراشا ايىندا قىتاي حالىقتىق ساياسي كونسۋلتاتيۆتىك كەڭەسى بۇكىلقىتايلىق كوميتەتىنىڭ ءتوراعاسى تسزيا تسينلين ەلىمىزگە كەلگەن بولاتىن. قازاقستان پارلامەنتى قىتايلىق ارىپتەستەرىمەن ەكونوميكالىق ورلەۋ جانە الەۋمەتتىك تۇراقتىلىقتى ساقتاۋدىڭ زاڭنامالىق قامتاماسىز ەتىلۋى تۇرعىسىندا تىعىز بايلانىس ورناتىپ كەلەدى.
ءماجىلىس توراعاسى, اتاپ ايتقاندا, ءبىرىككەن ۇلتتار ۇيىمى, شانحاي ىنتىماقتاستىق ۇيىمى, ازياداعى ءوزارا ءىس-قيمىل جانە سەنىم شارالارى ءجونىندەگى كەڭەس سەكىلدى بىرقاتار حالىقارالىق ۇيىمدار مەن فورۋمدار شەڭبەرىندە قازاقستان مەن قىتايدىڭ ءوزارا قارىم-قاتىناسى جوعارى دەڭگەيدە ەكەنىن جەتكىزدى. الداعى ۋاقىتتا دا ەكى ەلدىڭ حالىقارالىق ىستەردە ءبىر-بىرىنە ستراتەگيالىق ارىپتەستىك قولداۋ كورسەتىپ وتىراتىنىنا سەنىم ءبىلدىردى. ءسوزىنىڭ سوڭىندا و.مۇحامەدجانوۆ ەكى ەلدىڭ اراسىنداعى بايلانىس الداعى ۋاقىتتا تەرەڭدەي تۇسەتىندىگىنە ءۇمىت ارتتى.
ۋ بانگو ەڭ الدىمەن جىلى قابىلداپ, ەلىنە ىقىلاس تانىتقاندارى ءۇشىن قوناقجاي قازاق ەلىنە العىس ءبىلدىردى. كوپ جىلدان بەرى قازاقستان قىتايمەن اراداعى ىنتىماقتاستىقتىڭ دامۋىنا ايرىقشا نازار اۋدارىپ كەلگەنى انىق. جانە وسى جىلدار بەدەرىندە قازاق جۇرتى قوس ەلدىڭ سان سالالى بايلانىسىنىڭ ورىستەۋىنە ايتارلىقتاي ۇلەس قوستى. مۇنداي ارىپتەستىك بولاشاقتا دا دامي تۇسەدى دەگەن ويدامىز. قىتاي ءسىزدەردىڭ قوس تاراپ اراسىنداعى بايلانىستىڭ دامۋى باعىتىندا اتقارىپ جاتقان جۇمىستارىڭىزدى جوعارى باعالايدى. بۇل – قازاقستانعا جاساعان العاشقى ساپارىم. مەن الماتى قالاسىندا بولىپ, ەندى مىنە, استانا قالاسىنا كەلدىم. از عانا ۋاقىت بولعان كۇننىڭ وزىندە ءسىزدەردىڭ ەلدەرىڭىز, اسىرەسە, استانا ماعان ۇلكەن اسەر قالدىردى, دەدى ۋ بانگو.
بۇدان كەيىن ول قازاقستان مەن قىتاي اراسىنداعى قالىپتاسقان بايلانىستى دامىتۋدىڭ جولدارى, سونىڭ ءىشىندە, پارلامەنتارالىق ىنتىماقتاستىق, حالىقارالىق پارلامەنتارالىق ۇيىمداردا ءوزارا ىقپالداستىقتى نىعايتا ءتۇسۋ جونىندەگى ءوز ويلارىمەن ءبولىستى. بۇگىندە پرەزيدەنت ن. نازارباەۆتىڭ جەتەكشىلىگىمەن قازاقستانداعى قوعامدىق-ساياسي تۇراقتىلىق بەرىك قالىپتاسىپ كەلەدى. ەل ىشىندە جوعارى ەكونوميكالىق ورلەۋ بار. قازاقستاننىڭ ۇستانىمى نىعايىپ, الەمدىك بەدەلى وسۋدە. الەۋمەتتىك-ەكونوميكالىق كورسەتكىش رەتىندە سىزدەردىڭ ەلدەرىڭىز ورتالىق ازيادا جەتەكشى ەلگە اينالدى. سول سەبەپتى ءبىز ءوز تاراپىمىزدان سىزدەردى جەتكەن جەتىستىكتەرىڭىزبەن قۇتتىقتايمىز. بولاشاقتا بۇل جەتىستىكتەرىڭىز ەسەلەنە تۇسەدى دەگەن سەنىمدەمىز, دەدى تۇراقتى كوميتەت توراعاسى. ءسوزىنىڭ سوڭىندا ۋ بانگو ءماجىلىس توراعاسى ورال مۇحامەدجانوۆتى رەسمي پارلامەنتتىك ساپارمەن قىتايعا كەلىپ كەتۋگە شاقىردى.
كەزدەسۋدەن كەيىن ءماجىلىس توراعاسىنىڭ شاقىرۋىمەن ۋ بانگو ءماجىلىستىڭ قۇرمەتتى قوناقتار كىتابىنا تىلەگىن جازىپ, قولتاڭباسىن قالدىردى.
ءلايلا ەدىلقىزى.