1974-1992 جىلدارى «ەگەمەن قازاقستان» (بۇرىنعى «سوتسياليستىك قازاقستان») گازەتىنىڭ باتىس قازاقستان وبلىسىنداعى مەنشىكتى ءتىلشىسى بولعان بورانعالي ىرزاباەۆتىڭ ەسىمى كەشەگى كۇنگى گازەت وقىرماندارىنا جاقسى تانىس شىعار دەگەن ويدامىز. بورەكەڭ قۇرمەتتى ەڭبەك دەمالىسىنا شىققاننان كەيىن ۇزاق ءومىر سۇرە المادى. 1995 جىلدىڭ 10 اقپانىندا, الپىس ءۇش جاسىندا, ءوزىنىڭ تۇپ-تۋرا تۋعان كۇنىندە اۋىر ناۋقاستان قايتىس بولدى.
ارادا ەكى-ءۇش جىل وتكەننەن كەيىن قالانىڭ تەمىر ماسين كوشەسىندەگى مايتالمان جۋرناليست, قازاقستان جازۋشىلار وداعىنىڭ مۇشەسى بورانعالي ىرزاباەۆ تۇرعان ۇيگە ەسكەرتكىش تاقتا ورناتىلدى. بۇل نارىقتىڭ وتپەلى كەزەڭىنىڭ قيىنشىلىعى جان-جاقتان قۇرساپ تۇرعان كەز بولاتىن. سوندىقتان سول تۇستا ەسكەرتكىش تاقتانى ۋاقىت سىنىنا توتەپ بەرە الاتىن ساپالى ءارى بەرىك ماتەريالدان جاساۋدىڭ مۇمكىندىگى بولماعانىن دا اشىق ايتۋعا تۋرا كەلەدى. ونىڭ ۇستىنە ەكى ارالىقتاعى جىلجىپ وتكەن جىلدار, تابيعاتتىڭ جاۋىنى مەن لايساڭى, شاقىرايعان ىستىق كۇندەر تاقتاداعى ارىس اعامىزدىڭ بەينەسىنە سىزات ءتۇسىرگەنىن دە جاسىرىپ قالا المايمىز.
اقپاننىڭ الاي-دۇلەي بوراندى كۇندەرىنىڭ بىرىندە ءدۇنيەگە كەلگەندىكتەن, اكە-شەشەم اتىمدى بورانعالي قويىپتى دەپ وتىرۋشى ەدى بورەكەڭ. ءيا, ول راسىندا دا اتىنا زاتى ساي ادام ەدى. جاڭعىرتىلعان ەسكەرتكىش تاقتا ءوزى تۇرعان ۇيگە قايتادان ورنالاسقان كۇنى دە اقجايىق اسپانىن قارا بۇلت قاپتاپ, نوسەر جاڭبىر توگىپ تۇرعانى بورانعالي اعامىزدىڭ تابيعاتىمەن ۇندەستىك تاپقانداي.
الدىمەن «سوتسياليستىك قازاقستان», كەيىننەن «ەگەمەندى قازاقستاندا» دۇركىن-دۇركىن, كەسەك-كەسەك جاريالانىپ جاتاتىن مەنشىكتى ءتىلشىنىڭ ماتەريالدارى نەگىزىنەن وتكىر سىنعا قۇرىلاتىنى دا ۇمىتىلا قويعان جوق.
ءسوزدىڭ قىسقاسى, تاۋەلسىزدىكتىڭ 20 جىلدىعىمەن تۇسپا-تۇس كەلىپ وتىرعان بيىلعى كۇزدە كەزىندە باس باسىلىمداعى ازۋلى ءتىلشىنىڭ ءبىرى بولعان بورانعالي ىرزاباەۆ ءوزىنىڭ ەسكەرتكىش تۇعىرىنا قايتادان كوتەرىلدى.
تەمىر قۇسايىن.
ورال.
سۋرەتتە: بورانعالي ىرزاباەۆتىڭ جاڭعىرتىلعان ەسكەرتكىش تاقتاسى وسىنداي.
سۋرەتتى تۇسىرگەن رافحات حالەلوۆ.