وتكەن اپتادا تمد قالالارى اراسىنداعى حالىقارالىق بايقاۋدىڭ جەڭىمپازى, ەلىمىزدىڭ باتىستاعى قاقپاسى ورال قالاسىنىڭ كۇنى كەڭ اۋقىمدا اتالىپ ءوتتى. بۇگىندە قاي شاھاردىڭ مەرەكەسى وتپەي جاتىر. قۇدايعا شۇكىر, قازىر رەسپۋبليكانىڭ قاي قالاسىندا دا مەرەكە-دۋمان بارشىلىق. بۇل قازىر ەشكىمگە تاڭسىق ەمەس, ارينە. ءبىزدىڭ ايتايىن دەگەنىمىز دە وسىنداي شىرايلى شارانىڭ وتكەنىن جەلپىلدەتۋ ەمەس-ءتى.
گاپ مۇلدەم باسقادا. ياعني, اتالعان باعدارلاما اياسىندا ورال قالاسىنىڭ اكىمى ساميعوللا ورازوۆ اكە دەگەن قۇرمەتتى اتتى ابىرويمەن الىپ جۇرگەن, ءارى ەسىمدەرى قالا, وبلىس كولەمىنە كەڭىنەن تانىمال مەڭجان ابدراحمانوۆ, ساتىبالدى تاسپيحوۆ جانە ساعىن جۇبانىشەۆ ەسىمدى ازاماتتارعا «اكە داڭقى» توسبەلگىسىن تاپسىردى.
بۇل شەشىم ورال قالاسى اكىمدىگىنىڭ ارنايى قاۋلىسىنا سايكەس قابىلدانىپتى. اتالعان قاۋلىنىڭ تارماقتارى مەن ەرەجەلەرىنە سايكەس توسبەلگى ءۇش جانە ودان دا كوپ ۇل-قىزدى دۇنيەگە اكەلىپ, تاربيەلەپ وسىرگەن وتباسى يەلەرىنە بەرىلمەك. كەز كەلگەن وتباسى ءۇشىن اكەنىڭ ورنى مەن ءرولى قاشاندا بولەك ەكەنى بەلگىلى. اكە – قامقورشى, اسىراۋشى. اكە – اسقار تاۋ ەكەنىنە ەشكىمنىڭ تالاسى جوق شىعار. وتباسىلىق قارىم-قاتىناستا كوپ جاعدايدا انالاردىڭ ءرولى بىرجاقتى دارىپتەلىپ, اكەلەر تاسادا قالىپ قويىپ جۇرگەنى دە جاسىرىن ەمەس.
سوندىقتان دا قوعام مەن مەملەكەت تاراپىنان ءبىر كەزەك اكەلەرگە دە نازار اۋدارعاننىڭ ەش ارتىقشىلىعى بولماس ەدى. مۇنداي قادام وتباسىنىڭ دىڭگەگى ودان ءارى قاتايا تۇسۋىنە سەپتىگىن تيگىزەرى حاق. وسى تۇرعىدا ورال قالالىق اكىمدىگىندە قابىلدانعان ارنايى قاۋلى تەك قۇپتاۋعا, قولداۋعا لايىقتى. ورال قالالىق جۇمىسپەن قامتۋ باسقارماسىنىڭ باستىعى ايگۇل توكەشەۆا گازەت تىلشىسىنە مالىمدەگەندەي, «اكە داڭقى» توسبەلگىسى ەكىنىڭ بىرىنە بەرىلە بەرمەيدى. وعان تەك لايىقتىلار عانا تاڭدالىپ الىنادى. ءبىرىنشى كەزەكتە قالانىڭ قوعامدىق-ساياسي ءومىرى مەن كوپ سالالى شارۋاشىلىعىنا بەلسەنە ارالاسىپ جۇرگەن ازامات-اكەلەر, ءوز پەرزەنتتەرىن وقۋ مەن سپورتقا جانە ونەرگە بەيىمدەي بىلگەن ونەگەلى وتباسى يەلەرى توسبەلگىگە يە بولا الارى انىق.
تاعى ءبىر ايتارىمىز, كوپ بالالى اكەلەردى ىنتالاندىرۋ جونىندەگى ورال قالاسى اكىمدىگىنىڭ قاۋلىسىنا سايكەس «اكە داڭقى» توسبەلگىسىنە يە بولعاندار كوممۋنالدىق تولەمدەردى تولەۋدەن بوساتىلماق. ءسوز جوق, بۇل ايتارلىقتاي الەۋمەتتىك جەڭىلدىك ەكەنى انىق. مۇندايدا بارەكەلدى دەمەگەندە, نە دەمەكپىز.
تەمىر قۇسايىن.
ورال.