قالا كۇنى: اپتا ايشىقتارى

ءبىر كەزدەرى بار قازاققا استانا بولعان قىزىلوردا وتكەن اپتادا قالا كۇنىن اتاپ ءوتتى.  قالا كۇنى قۇر دابى­رامەن وتپەدى. ءبىزدى وسى ءجايت قۋانتتى. وسى كۇنى بىرنەشە زاۋىتتىڭ لەنتاسى قيىلدى. قيىرشىقتاس شىعاراتىن, اسفالت-بەتون وڭدەيتىن زاۋىتتار ەل يگىلىگىنە بەرىلدى. بۇل – جاڭا جۇمىس ورىندارى اشىلىپ, جۇمىسسىزدار سانى ەداۋىر قىسقارادى دەگەن ءسوز. بارلىق ايماق تۇرعىندارىنا ءتان ءبىر دۇنيە بار. ول – باسپانا ماسەلەسى. «بەرسەڭ بەر, بەرمەسەڭ قوي باسپاناڭدى», دەپ قاسىم اقىن­شا جىرلاپ جۇرگەندەردىڭ سانى از ەمەس. مەرەيلى مەرەكە قارساڭىندا 30 وتباسى جاڭا پاتەردىڭ تابالدىرىعىنان اتتادى.

ەرجان بايتىلەس. قىزىلوردا. 

اباي ۇرپاقتارىن ەسكە الدى. اباي اۋدانىنداعى ابايدىڭ مەملەكەتتىك قورىق-مۇراجايىندا اقىلباي اباي ۇلىنىڭ 150 جىلدىعىنا جانە اۋباكىر اقىلباي­ ۇلىنىڭ 130 جىلدىعىنا ارنالعان ادەبي-تانىمدىق كەش ءوتتى. بۇل كەشتى مۇراجاي ديرەكتورىنىڭ ورىنباسارى ش.سادىقوۆا اشىپ, جينالعاندارعا  ابايدىڭ اقىندىق مەكتەبى جانە ونىڭ ۇرپاق­تارى جايلى ايتىپ بەردى.  تانىمدىق كەشكە جينالعاندارعا قوس اقىن­نىڭ شىعارماشىلىعى جايلى جازىلعان كىتاپ سىيعا تاراتىلدى. ونەر ادامدارى اباي اندەرى جايلى لەكتسيا وقىسا, ولەڭدەرى دە جاتقا ايتىلدى.

وڭداسىن ەلۋباي. شىعىس قازاقستان وبلىسى. 

ءوزارا تاجىريبە الماسىلدى. «نۇر وتان» حدپ وبلىستىق فيليالىندا وبلىستىق, قالالىق جانە اۋداندىق سوتتاردىڭ, سونداي-اق, كورشىلەس رەسەيدىڭ ورىنبور وبلىسى سوتتارى سۋديالارىنىڭ قاتىسۋىمەن قازاقستان تاۋەلسىزدى­گىنىڭ 20 جىلدىعىنا ارنالعان عىلىمي-پراكتيكالىق كونفەرەنتسيا وتكىزىلدى. كونفەرەنتسيادا وبلىستىق سوتتىڭ توراعاسى ەرلان ايتجانوۆ بايانداما جاساپ, وڭىردەگى سوت جۇيەسىنىڭ بۇگىنگى تىنىس-تىرشىلى­گىنەن حاباردار ەتتى. القالى جيىندا  ەكى ەلدىڭ  سوت جۇيەسىندەگى  يگىلىكتى ىزدەنىستەرى مەن پروبلەمالارى ءسوز بولدى, ءوزارا تاجىريبە الماسىلدى. شارا بارىسىندا «اقتوبە وبلىسىنىڭ سوتى تاۋەلسىزدىك جىلدا­رىندا» اتتى  جۋرنال  كوپشىلىك نازارىنا ۇسىنىلدى. كونفەرەنتسياعا قاتىسۋشىلار العا اۋداندىق سوتى مەن پروكۋراتۋراسىنىڭ جاڭا عيماراتتارىندا بولدى.

ساتىبالدى ءساۋىرباي. اقتوبە وبلىسى. 

تاۋار وندىرۋشىلەر كورمە-كونكۋرسى. مۇنايلى وڭىردە وتكىزىلگەن «اتىراۋدىڭ ۇزدىك تاۋارلارى» كورمە-كونكۋرسىندا ءار سالادا تاۋار وندىرەتىن 23  كاسىپورىن سىنعا ءتۇستى. بۇلاردىڭ اراسىندا قۇرىلىس يندۋسترياسىن, جەڭىل ونەركاسىپتى وركەندەتۋگە جانە ازىق-ت ۇلىك قاۋىپسىزدىگىن قامتاماسىز ەتۋگە اتسالى­سىپ جۇرگەندەر بار. وتكەن اپتادا كورمە-كونكۋرستىڭ قورىتىن­دىسىمەن جەڭىمپاز اتانعان ۇزدىك تاۋار وندىرۋشىلەر انىقتالدى. «وندىرىستىك ماقساتتاعى ۇزدىك تاۋارلار» نوميناتسياسىندا مەتال­پلاستيكالىق قوندىرعىلار شىعاراتىن «اليانس سك» سەرىكتەستىگىنىڭ باعى جاندى. ال «حالىق تۇتىناتىن ۇزدىك تاۋارلار» نوميناتسيا­سى­نىڭ ءبىرىنشى جۇلدەسى «ونەرپاز» سەرىكتەستىگىنە بەرىلسە, «ۇزدىك ازىق-ت ۇلىك تاۋارلارىن» شىعارۋدا ء«ىنجۋ-مارجان» سەرىكتەستىگىنىڭ ابىرويى اسقاقتادى.

جولداسبەك شوپەعۇل. اتىراۋ وبلىسى. 

كىشكەنتاي نيۋ-يورككە – 25 جىل. وتكەن اپتادا ءبىر كەزدەرى كوپ قاباتتى بيىك تۇرعىن ۇيلەردەن تۇراتىن قالاشىقتارىن وسىلاي دەپ اتاعان سولنەچنىي كەنتىنىڭ تۇرعىندارى مەرەكەگە جينالدى. ءوندىرىستى قالاشىق وتپەلى كەزەڭ قيىندىقتارىن باستان وتكەردى. ەلەكتر ەنەرگياسىن وندىرەتىن, بيىكتىگى 420 مەترلىك  تۇرباسى بار  گرەس-2 ستانساسى ەكىباستۇزدىڭ وسى كەنتىندە ورنالاسقان. الاڭدا اباي ەسكەرتكىشى تۇر. كوك كۇمبەزدى مەشىت ورىن تەپكەن. تۇرعىنداردى قۇت­تىقتاعان  ەكىباستۇز قالاسىنىڭ اكىمى الەكساندر ۆەربنياك, ستانسا باس­شىسى عاني ءسالىمجۋاروۆ ستانسانىڭ №3 ەنەرگوبلوك قۇرىلىسى باس­تالعانىن, كەنتتىڭ  ومىرىنە ۇلكەن وزگەرىس كەلە جاتقانىن اتاپ ءوتتى. بۇل كۇندەرى كەنتتە 5 مىڭداي حالىق تۇرادى. ەلگە ورالعان ورالمان اعايىندار بار. زامانعا ساي بارلىق الەۋمەتتىك نىساندار جۇمىس جاسايدى.

فاريدا بىقاي. پاۆلودار وبلىسى. 

قىرىمنان  ولجالى   ورالدى. وسى ايماقتا وتكەن «تەاتر. چەحوۆ. يالتا» حالىقارالىق تەاتر ونەرىنىڭ  ءىV فەستيۆالى   ساكەن سەيفۋللين  اتىنداعى  وبلىستىق قازاق دراما تەاترى جۇلدىزىن تاعى ءبىر  جارقىراتتى. 14 ەلدىڭ ساحنا ساڭ­لاقتارى  ونەر سىناسقان سايىستا  كورەرمەندەر نازارىنا ۇسىنىلعان گ. گاپاروۆا مەن م. گاپاروۆتىڭ «قيامەت-قايىم كيوتو» قويىلىمى جوعارى باعالانىپ, جۇلدەلى ورىننان كورىندى. قانداي دا بولسىن بايقاۋلاردان قالمايتىن, ودان ولجاسىز ورال­مايتىن قاراعاندى تەاترىنىڭ بۇل جاڭا جەتىستىگى 80 جىلدىعى  الدىن­داعى شەجىرەسىنە جارقىن بەت بولىپ قوسىلدى. تاماشا تابىس­پەن قاناتتانعان قاراعاندىلىق  ارتىستەر بۇل كۇندە ومبى قالاسىندا ونەر كورسەتۋدە.

ايقىن نەسىپباي. قاراعاندى. 

ءبىر عانا ماسەلەگە ارنالدى. وبلىستىق ىشكى ساياسات باسقارماسى مەن  «پروزرەنيە-كوزجەتۋ» قوعامدىق بىرلەستىگىنىڭ ۇيىمداستىرۋىمەن ء«دىني ەكسترەميزم: ءمانى, قاينار كوزى, قازىرگى جايى» دەگەن تاقىرىپتا سەمينار ءوتتى. وعان  عالىمدار, ءدىنتانۋشىلار, ساياساتكەرلەر, ءتۇرلى ۇيىم وكىلدەرى قاتىسىپ, وزدەرىن تولعاندىرعان پروبلەمالار جونىندە  ويلارىن ورتاعا سالدى. باسقارما باستىعى رۋسلان الىشەۆ كونفەسسيا جانە دىنارالىق كەلىسىمنىڭ ساقتالۋىنا كوڭىل اۋدارسا, سقمۋ پروفەسسورى, فيلوسوفيا عىلىمدارىنىڭ دوكتورى, الەكساندر نيكيفوروۆ   دىندەردىڭ شىعۋ, قازىرگى تارالۋ بارىسى جايلى ايتىپ بەردى. باسقا قاتىسۋشىلار دا دىنگە قاتىستى ءتۇرلى تاقىرىپتاردا بايانداما جاسادى.

ءومىر ەسقالي. سولتۇستىك قازاقستان وبلىسى.