يەمەن پرەزيدەنتى الي ابدۋللا سالەح پارسى شىعاناعىنداعى اراب مەملەكەتتەرى ىنتىماقتاستىعى كەڭەسى ۇسىنعان ءوزىنىڭ بيلىكتەن كەتۋى تۋرالى ۇسىنىستى قابىلدايتىن جوسپار قۇرعانى تۋرالى مالىمدەدى.
مەملەكەتتىك تەلەۆيزياعا بەرگەن سۇحباتىندا ول ۆيتسە-پرەزيدەنت ابدۋراب مانسۇر حاديگە وپپوزيتسيامەن جوعارىداعى جوسپارعا قول قويۋ تۋرالى كەلىسسوز جۇرگىزۋ وكىلەتتىگىن بەرگەنىن اتاپ كورسەتتى. سالەح جاقىن ارادا ەلدە پرەزيدەنتتىك, پارلامەنتتىك جانە جەرگىلىكتى سايلاۋلار بولاتىنىنا ۇمىتتەنىپ وتىر. بىراق ول ءدال قاي كەزدە رەسمي تۇردە ورنىنان كەتەتىنىن ناقتىلاعان جوق.
قوسىمشا ماندات اپەردى
25 قىركۇيەكتە بولىپ وتكەن فرانتسيا سەناتىنىڭ سايلاۋىندا وپپوزيتسيالىق سولشىل پارتيالار وزدەرىن تۇڭعىش رەت كوپشىلىك ورىنمەن قامتاماسىز ەتتى. الدىن الا دەرەك بويىنشا, 348 ورىننىڭ 170-ءىنىڭ تاعدىرى شەشىلگەن سايلاۋ سولشىل كواليتسياعا 24-تەن 26-عا دەيىن قوسىمشا ماندات اپەردى.
وسىلايشا سولشىل پارتيالار سەناتتاعى كوپشىلىككە 1958 جىلدان بەرى تۇڭعىش رەت قول جەتكىزە الدى. بايقاۋشىلاردىڭ پىكىرىنشە, سايلاۋ ناتيجەلەرى 2012 جىلدىڭ مامىرىنداعى پرەزيدەنتتىك سايلاۋ الدىندا سوتسياليستەردىڭ پوزيتسياسىن ايتارلىقتاي نىعايتاتىن بولادى. ەل پرەزيدەنتى نيكوليا ساركوزي سايلاۋدىڭ قورىتىندىلارىنان كوڭىلى قالعانىن اشىق ءبىلدىردى.
تەلەارنا ستۋدياسىن باسىپ الدى
گرەك ستۋدەنتتەرىنىڭ ءبىر توبى جەكسەنبى كۇنى كەشكىسىن مەملەكەتتىك NET تەلەارناسىنىڭ ستۋدياسىنا باسىپ كىردى. 50 ادامنان تۇراتىن توپ تەلەارنا باسشىلىعىنان جوعارى ءبىلىم بەرۋ رەفورماسىنا قارسى نارازىلىقتارىن ءبىلدىرۋ ءۇشىن وزدەرىنە ەفير بەرىلۋىن تالاپ ەتتى.
تەلەارنا باسشىلىعى ستۋدەنتتەردىڭ تالابىن ورىنداۋدان باس تارتىپ, كەشكى جاڭالىقتار شىعارىلىمىن ەفيردەن الىپ تاستاۋ تۋرالى شەشىم قابىلدادى جانە ونىڭ ورنىنا دەرەكتى فيلم كورسەتتى. ال پارلامەنت جانىنا جينالعان جاستاردى قۋىپ تاراتۋ ءۇشىن پوليتسيا كوزدەن جاس اعىزاتىن گاز قولدانۋعا ءماجبۇر بولدى. جالپى, گرەكيادا الەۋمەتتىك-ەكونوميكالىق جاعداي كۇن وتكەن سايىن كۇردەلەنە تۇسۋدە.
مەدۆەدەۆ ۇكىمەتىندە جۇمىس ىستەمەيدى
رەسەي ۆيتسە-پرەمەرى, قارجى ءمينيسترى الەكسەي كۋدرين دميتري مەدۆەدەۆتىڭ ۇكىمەتىندە جۇمىس ىستەمەيتىنىن مالىمدەپ وتىر. مەن ءوزىمدى جاڭا ۇكىمەتتەن كورمەيمىن. بۇل جەردە ماسەلە ماعان ەشكىمنىڭ ۇسىنىس جاساعانى-جاساماعانىندا دا ەمەس, دەيدى ول.
ا.كۋدريننىڭ ايتۋىنشا, ءوزىنىڭ قازىرگى پرەزيدەنتپەن اراداعى پىكىر قايشىلىعى وعان جاڭا ۇكىمەتكە بارۋعا مۇمكىندىك بەرمەيدى. ول قانداي قايشىلىق دەگەنگە كەلسەك, ەكونوميكالىق ساياساتتاعى, ونىڭ ىشىندە اسكەري ماقساتتارعا ايتارلىقتاي قارجى قاجەت ەتەتىن ساياساتقا قاتىستى قايشىلىقتار كورىنەدى. ۆيتسە-پرەمەردىڭ پىكىرىنشە, ۆ.پۋتين پرەزيدەنتتىككە سايلانعان جاعدايدا, رەفورمالاردى بەلسەندىرەك جۇرگىزەتىن بولادى.
لاڭكەستىك توپتار قۇردى دەپ ايىپتادى
پاكستان سىرتقى ىستەر ءمينيسترى حينا رابباني حار كابۋلداعى اقش ەلشىلىگىنە شابۋىل ءۇشىن موينىنا جاۋاپكەرشىلىك العان «حاككاني» توبىن اقش-تىڭ ورتالىق بارلاۋ باسقارماسى سەكىلدى ارنايى قىزمەتتەرى ۇيىمداستىرعان دەپ مالىمدەدى. ونىڭ سوزىنە قاراعاندا, وبب-نىڭ باسقا دا لاڭكەستىك توپتارمەن بايلانىسى بار.
بۇعان دەيىن اقش بيلىگى «حاككانيدى» پاكستاننىڭ ۆەدومستۆوارالىق بارلاۋ قىزمەتى قولداپ وتىر دەپ ايىپ تاققان بولاتىن. پاكستان ءوزىنىڭ لاڭكەستەرمەن بايلانىسى جوق ەكەنىن ايتىپ اقتالعان ەدى. ەندى حينا رابباني حار مۇنداي ايىپتاۋلار تىيىلمايتىن بولسا, اقش-پەن وداقتاستىق قاتىناسى ۇزىلەتىنىن مالىمدەدى.
حالىقتى ءۇشىنشى توڭكەرىسكە شاقىردى
قىرعىزستان پرەزيدەنتتىگىنە تىركەۋ تۋرالى پروتسەدۋرادان 20 ۇمىتكەر تابىستى ءوتتى. ۇمىتكەرلەردى تىركەۋ 24 قىركۇيەكتە اياقتالعان بولاتىن. بارلىعى سايلاۋعا قاتىسۋعا 83 كانديدات نيەت بىلدىرسە, ىرىكتەلىپ تەك 20-سى عانا قالدى.
كانديداتتاردىڭ كوپشىلىگى 30 مىڭ قول جيناي الماسا, بىرقاتارى 100 مىڭ سوم كولەمىندەگى كەپىلدىك اقشا تاپپاعان. مەملەكەتتىك ءتىلدى ءبىلۋ تۋرالى ەمتيحاننان سۇرىنگەندەرى دە بار. كەيبىر ۇمىتكەرلەر ءوز ۇسىنىستارىنان ساياسي سارىنمەن باس تارتتى. سونداي جولى بولماعانداردىڭ ءبىرى كۋبانىچبەك اپاس وتانداستارىن كوشەلەرگە شىعۋعا ۇندەپ, ءىس باسىنداعى بيلىكتى تاعىنان تايدىرۋعا شاقىردى.
قىسقا قايىرىپ ايتقاندا:
كەنيادا 72 جاسقا قاراعان شاعىندا 2004 جىلعى نوبەل سىيلىعىنىڭ لاۋرەاتى ۆانگاري مااتاي قايتىس بولدى. ول – نوبەلدىڭ بەيبىتشىلىك سىيلىعىن العان العاشقى افريكالىق ايەل.
اقش 2009 جىلى يزرايلگە قۇپيا تۇردە 55 GBU-28 باسقارىلاتىن اۆيابومبا بەرگەن. بۇل تۋرالى The Daily Beast باسىلىمى جاريا ەتتى.
تۇركىمەنستان باس پروكۋراتۋراسىنىڭ 5 قىزمەتكەرى رەسەي ازاماتتارى بولعاندىقتارى ءۇشىن قىزمەتتەرىنەن بوساتىلدى. ولاردىڭ قانداي لاۋازىمدار اتقارعاندىقتارى ناقتىلانبايدى.
ۇكىمەت اسكەرلەرى دۇيسەنبىگە قاراعان ءتۇنى سيريانىڭ ورتالىق بولىگىندەگى راستان قالاسىن قورشاۋعا الدى. ولار شاھارعا باعىتتاپ ءتۇرلى قارۋدان وق جاۋدىرعان.
26 قىركۇيەكتە بولعان ساۋدا-ساتتىق بارىسىندا التىننىڭ باعاسى 6,4 پايىزعا ءتۇسىپ, ۋنتسياسى ءۇشىن 1552 دوللار تولەندى. ءسويتىپ, باعاسى شارىقتاۋ شەگىنە جەتكەن ءۇش اپتادان بەرى التىننىڭ قۇنى 19 پايىزعا ارزاندادى.
كابۋلداعى اقش ەلشىلىگىن اتقىلاۋ سالدارىنان ءبىر امەريكا ازاماتى وپات بولسا, تاعى بىرەۋى جاراقات العان. وق جاۋدىرعان اۋعانستان ازاماتى كورىنەدى. ول دا وققا ۇشىپتى.
رەسەيلىكتەر قارجى رىنوكتارىنداعى جاعدايدىڭ ۋشىعۋىنا بايلانىستى جاپپاي دوللار ساتىپ الا باستاعان. سوڭعى ەكى اپتادا قولما-قول ۆاليۋتاعا سۇرانىس 30 پايىزعا دەيىن ءوسىپ كەتكەن.
ينتەرنەت ماتەريالدارى نەگىزىندە ازىرلەندى.