ءبىزدىڭ باسقارمانىڭ 2011 جىلعا ارنالعان ءىس-شارالار جوسپارىنىڭ باسىم كوپشىلىگى قازاقستان رەسپۋبليكاسى تاۋەلسىزدىگىنىڭ 20 جىلدىعىنا ارنالعان. سونىڭ باستىسى رەتىندە ەل تاۋەلسىزدىگىنىڭ 20 جىلدىعىنا ارنالعان قازاق كۇرەسىنەن وبلىستىق «التىن بەلبەۋ» جارىسىنىڭ اقتىق سايىسى وتكىزىلىپ, وعان وبلىستىڭ 140 ەلدى مەكەنىنەن 3 جاس ەرەكشەلىگى بويىنشا 27 864 بالۋان اتسالىستى. وتكەن جىلى بۇل سايىسقا 26 780 بالۋان قاتىسقان بولاتىن. اتالمىش جارىستا جالاعاش اۋدانىنان رۋسلان ابدىرازاقوۆ «التىن بەلبەۋ» يەگەرى اتاندى. ال وسى جارىستىڭ رەسپۋبليكالىق كولەمدەگى قورىتىندىسى 20 تامىز كۇنى استانا قالاسىندا ءوتتى. قازاقستان پرەزيدەنتىنىڭ جۇلدەسىنە ارنالعان قازاق كۇرەسىنەن «قازاقستان بارىسى» رەسپۋبليكالىق جارىسىندا قىزىلوردالىق ۇلان رىسقۇل تۇڭعىش «قازاقستان بارىسى» اتاندى.
وبلىس سپورتشىلارى رەسپۋبليكالىق چەمپيوناتتار مەن بىرىنشىلىكتەرگە قاتىسىپ, 263 مەدال يەمدەندى, ونىڭ 82-ءسى التىن, 62-ءسى كۇمىس, 120-سى قولا جۇلدە.
پەرۋ استاناسى ليمادا اۋىر اتلەتيكادان جاسوسپىرىمدەر اراسىنداعى الەم چەمپيوناتىندا ادىلبەك بالحاەۆ (69 كەلى) قولا جۇلدە يەلەنسە, تايلاندتىڭ بانگكوك قالاسىندا كاراتە-دودان بالالار مەن ءجاسوسپىرىمدەر اراسىندا وتكەن ازيا چەمپيوناتىندا ءمولدىر جاڭبىرباي كۇمىس جۇلدەگە قول جەتكىزدى. تاشكەنت قالاسىندا سامبودان ءجاسوسپىرىمدەر جانە جاستار اراسىندا ازيا چەمپيوناتىندا گۇلايلىم نۇرماحانوۆا مەن مەرەكە قۇدايبەرگەنوۆا چەمپيون اتانسا, گۇلجازيرا ماحامبەتجانوۆا ءۇشىنشى ورىنعا تابان تىرەدى.
تامىز ايىندا ۋكراينانىڭ كيەۆ قالاسىندا وتكەن جاسوسپىرىمدەر اراسىندا دزيۋدودان الەم چەمپيوناتىندا اكەركە مىرزابەك پەن رەسەيدىڭ استراحان قالاسىندا جاستار اراسىندا بەلبەۋ كۇرەسىنەن ارمان سارسەنبەكوۆ قولا ءجۇلدەگەر اتاندى. وڭتۇستىك كورەيانىڭ ينچحون قالاسىندا ەرەسەكتەر اراسىندا بوكستان ازيا چەمپيوناتىندا رۇستەم سىباەۆ كۇمىس جۇلدەگە يە بولدى.
قىركۇيەك ايىندا تايلاندتىڭ پاتتايا قالاسىندا جاسوسپىرىمدەر اراسىندا وتكەن اۋىر اتلەتيكادان ازيا چەمپيوناتىندا عالىمبەك جۇباتقانوۆ چەمپيون اتانسا, وسكەمەن قالاسىندا جاسوسپىرىمدەر اراسىنداعى قول كۇرەسىنەن وتكەن ازيا چەمپيوناتىندا ارداق ماحامبەت كۇمىس جۇلدەگە قول جەتكىزدى. كانادادا پاۋەرليفتينگتەن وتكەن الەم چەمپيوناتىندا نۇرلان ەسماحانوۆ پەن ۇلان ءانۋار كۇمىس جۇلدەگە يە بولسا, سامات اسانوۆ ءۇشىنشى ورىندى يەلەندى.
12-18 قىركۇيەك ارالىعىندا ىستامبۇل قالاسىندا ەرەسەكتەر اراسىنداعى ەركىن كۇرەستەن الەم چەمپيوناتىندا 55 كەلى سالماقتا داۋلەت نيازبەكوۆ قولا جۇلدەگەر اتاندى. بۇل وبلىستىڭ لوندون وليمپياداسىنا العان ليتسەنزياسى بولىپ تابىلادى. سونداي-اق, لوندون وليمپياداسىنا باراتىن تاعى دا باسقا سپورتشىلارىمىزدىڭ بار ەكەنىن ايتقان ابزال.
جىل باسىندا قىزىلوردا قالاسىندا جوعارى سپورت شەبەرلىگى مەكتەبى اشىلدى. سونىمەن قاتار, بيىل سپورت شەبەرلەرىن دايىندايتىن جوعارى سپورت شەبەرلىگى مەكتەبىندە, №1 وبلىستىق مامانداندىرىلعان بالالار مەن جاسوسپىرىمدەر وليمپيادالىق رەزەرۆ مەكتەبىندە كوركەم گيمناستيكا, كيكبوكس جانە ستەند اتۋ, ايەلدەر كۇرەسى, سامبو, قازاق كۇرەسى ءبولىمشەلەرى اشىلدى.
سادىق مۇستافاەۆ, وبلىستىق تۋريزم, دەنەشىنىقتىرۋ جانە سپورت باسقارماسىنىڭ باستىعى.