پارلامەنت ءماجىلىسىنىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ توراعاسى امزەبەك جولشىبەكوۆ الداعى اپتادا وتەتىن حالىقارالىق عىلىمي-ءتاجىريبەلىك كونفەرەنتسيانىڭ دايىندىعى ءجونىندە جۇمىس توبىنىڭ وتىرىسىن وتكىزدى.
وتىرىستا اتالعان كوميتەتتىڭ حاتشىسى ۆيكتور روگالەۆ قانداي ءىس-شارالار اتقارىلىپ جاتقانىن بايانداپ بەردى. ءماجىلىس اپپاراتىنىڭ سالالىق ءبولىمدەرىنە كونفەرەنتسيانى ۇيىمداستىرۋعا قاتىستى بىرقاتار مىندەتتەر جۇكتەلدى.
قازاقستان پارلامەنتىنىڭ ۇيىمداستىرۋىمەن 29 قىركۇيەكتە بولاتىن «جاڭا الەمدەگى جاڭا قازاقستان: تاۋەلسىزدىككە 20 جىل» اتتى حالىقارالىق عىلىمي-تاجىريبەلىك كونفەرەنتسياعا شەتەلدەن بىرقاتار پارلامەنتشىلەر, عالىمدار مەن ساراپشىلار شاقىرىلعان.
«قازاقستان مەملەكەتىنىڭ 20 جىلداعى وركەندەۋ جولى, قول جەتكىزگەن تابىستارى جاريا ەتىلەتىن القالى باسقوسۋدى جوعارى دەڭگەيدە وتكىزۋ – بارشامىزدىڭ ابىرويلى مىندەتىمىز», – دەدى امزەبەك جولشىبەكوۆ, دەپ حابارلادى وسى پالاتانىڭ باسپاسوز قىزمەتى.