وتاندىق باق پەن ۇكىمەتتىك ەمەس ۇيىمداردى دامىتۋ ءتورتىنشى بلوكقا جاتقىزىلدى. سولاردىڭ الدىڭعىسى – باق-قا قاتىستى ايتاتىن بولسام, قوعام دامۋى بارىسىندا بۇقارالىق اقپارات قۇرالدارىنىڭ الاتىن ورنى زور ەكەنى كۇمان تۋعىزبايدى. سوندىقتان دا بولار, ەلىمىزدە باق-تار سانى جىلدان جىلعا ارتىپ كەلەدى. سول سياقتى ۇكىمەتتىك ەمەس ۇيىمدار ۇلكەن كۇشكە اينالىپ وتىر. ەلباسى سەسسيانى اشاردا سويلەگەن ءسوزىندە وسى ءماسەلەلەرگە ەرەكشە نازار اۋدارىپ, دەپۋتاتتار الدىنا زاڭداردى جەتىلدىرۋ مىندەتىن قويدى. وزدەرىڭىزگە ءمالىم, ۇكىمەت وسى ورايدا «تەلەراديو حابارلارىن تاراتۋ تۋرالى» زاڭ جوباسىن ازىرلەدى. ەندى اتالعان زاڭدىق قۇجات تەلەراديو حابارلارىن تاراتۋ ساپاسىن ارتتىرۋعا وزىندىك سەرپىن قوسادى دەپ كۇتىلۋدە.
ءبىز بۇعان دەيىن دە بۇقارالىق اقپارات قۇرالدارىنا قاتىستى زاڭعا بىرقاتار وزگەرىستەر ەنگىزگەن بولاتىنبىز. الايدا, ۋاقىتتىڭ ءوز تالابى بار, ياعني وسى ورايدا شەشىمىن كۇتكەن ءماسەلەلەر دە از ەمەس دەگەن ويدامىن. راديو جانە تەلەحابارلارىن تاراتۋدى ءبىر جۇيەگە ءتۇسىرۋدىڭ ۋاقىتى جەتتى. وكىنىشتىسى سول, ءبىز ءالى كۇنگە شەتەلدىك اقپارات قۇرالدارىنىڭ ىقپالىنان ارىلا الماي وتىرمىز. وتاندىق تەلەارنالار مەن راديوەفيرلەرىمىز سولاردىڭ حابارلارىن, جەلىلەرىن پايدالانادى. ال بىزگە ءوزىمىزدىڭ ەلدىك ءمۇددەنى, ۇلتتىق مۇددەنى كوزدەيتىن اقپارات قۇرالدارىنىڭ بولعانى اۋاداي قاجەت.
مەملەكەتتىك ءتىل ماسەلەسىن ۇدايى كوتەرىپ كەلەمىز. تاۋەلسىزدىك تۋرالى ايتقاندا, سونىڭ ءبىر تۇعىرى, سۇيەنىشى مەن تىرەگى ءتىل بولۋى كەرەك. بۇل ورايدا, وسى سالاداعى بەلگىلەنگەن شارالار تۇگەل ورىندالىپ جاتقان جوق. كەزىندە قويىلعان تالاپتار كەيبىر ارنالار ءۇشىن ورىندالمايتىن نورماعا اينالدى. ەسەسىنە «قازاقستان» تەلەارناسى تۇگەلدەي قازاقشاعا كوشتى. بۇل – كوڭىل قۋانتاتىن ءجايت. مەنىڭ ويىمشا, بۇل باستاما جالعاسىن تابۋى ءتيىس. ۇكىمەتتىك ۇيىمدار جۇمىسىنا كەلەر بولساق, ولاردىڭ ءبىر ماقساتقا قىزمەت ەتۋىن قامتاماسىز ەتۋ ءۇشىن زاڭنامالىق بازا كەرەك. دەپۋتاتتار اراسىندا وسى سالا وكىلدەرى دە بار. زاڭ جوباسىن تالقىلاۋ ءوز ناتيجەسىن بەرەدى دەپ سەنەمىن.
جاراسباي سۇلەيمەنوۆ, ءماجىلىس دەپۋتاتى.