كەشە قايرات ءماميدىڭ توراعالىق ەتۋىمەن پارلامەنت سەناتىنىڭ كەزەكتى جالپى وتىرىسى بولىپ, وندا ءتورت ماسەلە قارالدى. كۇن تارتىبىندەگى حاتتامالاردى راتيفيكاتسيالاۋدان ءوتكىزگەن دەپۋتاتتار ءبىلىم بەرۋ ماسەلەسىنە ەرەكشە نازار اۋداردى.
«ءبىلىم تۋرالى» زاڭعا وزگەرىستەر مەن تولىقتىرۋلاردى قاراستىراتىن زاڭ جوباسى بويىنشا باياندامانى ءبىلىم جانە عىلىم ءمينيسترى باقىتجان جۇماعۇلوۆ جاسادى. ءمينيستردىڭ مالىمدەۋىنشە, ەلىمىز 2015 جىلدان باستاپ كەزەڭ-كەزەڭىمەن 12 جىلدىق ءبىلىم بەرۋ جۇيەسىنە كوشەتىن بولادى. سوندىقتان دا زاڭ جوباسىندا ورتا ءبىلىم ساپاسىن ارتتىرۋعا ەرەكشە كوڭىل ءبولىنىپتى. ءبىلىم ساپاسىن باقىلاۋ تەتىگىنىڭ بولماۋىنان وسى سالادا كەمشىلىكتەر كوبەيىپ كەتكەندىگىن العا تارتقان ب.جۇماعۇلوۆ دامىعان ەلدەردە (فينليانديا, نورۆەگيا, جاپونيا, فرانتسيا جانە تاعى باسقالارىندا) باقىلاۋ ورتالىق اتقارۋشى ورگانعا جۇكتەلگەندىگىن ەرەكشە ايتىپ كەتتى. وسىعان سايكەس وبلىستاردا ءبىلىم ساپاسىن باقىلاۋدىڭ ۆەرتيكالى قۇرىلاتىنى بەلگىلى بولدى.
وقۋلىقتار مەن وقۋ-ادىستەمەلىك قۇرالداردىڭ ساپاسىنا قويىلاتىن تالاپتار كۇشەيىپ وتىر. ەندىگى جەردە بۇل باعىتتا قاتاڭ سىناق وتكىزىلىپ, مونيتورينگ جاسالادى دەپ كۇتىلۋدە. مينيستر بەيىندىك مەكتەپتەردىڭ قۇقىقتىق مارتەبەسى انىقتالعاندىعىن دا تىلگە تيەك ەتە كەتتى. وسى ورايدا پەداگوگتاردىڭ مارتەبەسىن كوتەرۋ, ولاردىڭ بىلىكتىلىگىن ارتتىرۋ ۋاقىت تالابىنا اينالعاندىعىن ايتقان ءجون. بۇل ءۇشىن ۆاۋچەرلىك مودۋلدىك جۇيە ەنگىزىلىپتى. ەندى ۇستازدار بىلىكتىلىگىن ارتتىرۋ ءۇشىن قالاعان وقۋ ورنىن, ءتىپتى شەتەلدىك ورتالىقتاردى دا تاڭداۋ قۇقىنا يە.
مۇعالىمدەردىڭ الەۋمەتتىك جاعىنان قورعالۋىن كۇشەيتەتىن باپتار دا زاڭ جوباسىنان كورىنىس تاپقان. وقۋشىلاردىڭ بىلىمىنە سىرتتاي باقىلاۋ ەنگىزىلىپ, ول كومپيۋتەرلىك تەستىلەۋ ادىسىمەن جۇزەگە اسىرىلادى. سىرتتاي باعالاۋ مەكتەپتەر مەن جوعارى وقۋ ورىندارىندا دا قولعا الىنباقشى. جوعارى وقۋ ورىندارى التى ساناتقا بولىنەتىنى بەلگىلى بولىپ وتىر. ەندى ۇلتتىق زەرتتەۋ ۋنيۆەرسيتەتى, ۇلتتىق جوعارى وقۋ ورىندارى, زەرتتەۋ ۋنيۆەرسيتەتتەرى, ۋنيۆەرسيتەتتەر, اكادەميالار جانە ينستيتۋتتار بولادى.
زاڭ جوباسىندا مەملەكەتتىك تاپسىرىس بويىنشا وقىعان مەديتسينالىق جانە پەداگوگيكالىق ماماندىقتاردىڭ تۇلەكتەرىنە ەرەكشە كوڭىل بولىنگەن. ولاردى مىندەتتى تۇردە جۇمىسقا ورنالاستىرۋ قاراستىرىلسا, بۇل – الەۋمەتتىك سالا ءۇشىن وتە ماڭىزدى. جوعارى وقۋ ورىندارىمەن قاۋىمداستىرىلعان پروفەسسور (دوتسەنت) اتاقتارىن بەرۋ قۇزىرەتى الىنىپ تاستالدى. بۇدان بىلاي وسى عىلىمي اتاقتار جاڭا تالاپتارعا سايكەس بەرىلەتىن بولادى. ءبىلىم بەرۋ ۇيىمدارىنىڭ ەرەكشە ءمارتەبەسى دە نازاردان تىس قالماپتى. مينيستردىڭ پايىمىنشا, بۇل – الەمدەگى ۇزدىك ۋنيۆەرسيتەتتەرگە ءتان اكادەميالىق ەركىندىككە قول جەتكىزۋ ءۇشىن جاسالعان ۇلكەن قادام. زاڭ جوباسىنا تەحنيكالىق جانە كاسىپتىك ءبىلىم بەرۋ ماسەلەسىندە الەۋمەتتىك ارىپتەستىك جانە كووپەراتيۆتىك وقىتۋ نورمالارى ەنگىزىلگەن. الەۋمەتتىك كومەك الاتىن ازاماتتار ساناتتارىنىڭ ناقتى تىزبەسى جاسالىپ, مەملەكەتتىك ستيپەندياعا قۇقىعى بار ءبىلىم الۋشىلاردىڭ ساناتتارى دا انىقتالىپتى.
مينيستر وسىنداي قىسقاشا بايانداماسىنان كەيىن دەپۋتاتتاردىڭ ساۋالدارىنا جاۋاپ بەردى. وقۋ قۇنىنىڭ قىمباتتىعى مەن تەستىلەۋ تاسىلىنە قاتىستى سۇراقتار كوپ قويىلدى. سونداي-اق اۋىل مەكتەپتەرىنىڭ تەحنيكالىق بازاسىنىڭ ناشارلىعى, مۇعالىمدەر بىلىكتىلىگىنىڭ تومەندىگى كوتەرىلدى. سەنات توراعاسى قايرات ءمامي دە ءوزى تاراپىنان بىرقاتار سۇراقتار قويىپ, زاڭ جوباسىنىڭ بارىنشا ساپالى شىعۋىنا ءمۇددەلىلىك تانىتىپ وتىردى. ءسويتىپ, زاڭ جوباسى سەنات ەنگىزگەن وزگەرىستەرىمەن ءماجىلىسكە جىبەرىلدى.
«قازاقستان رەسپۋبليكاسىنىڭ كەيبىر زاڭنامالىق اكتىلەرىنە قۇقىق قورعاۋ قىزمەتىن جەتىلدىرۋ جانە قىلمىستىق زاڭنامانى ودان ءارى ىزگىلەندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى پارلامەنت ءماجىلىسىنە جىبەرىلدى. ءماجىلىس ماقۇلداعان زاڭ جوباسىنا سەنات 70-تەن استام وزگەرىستەر مەن تولىقتىرۋلار ەنگىزدى.
اسقار تۇراپباي ۇلى.