تامىزدىڭ 28-31-ءى ارالىعىندا قازاقستان رەسپۋبليكاسىنىڭ مەملەكەتتىك حاتشىسى قانات ساۋداباەۆتىڭ نيدەرلاندى كورولدىگىنە رەسمي ساپارى وتۋدە. ونىڭ بارىسىندا مەملەكەتتىك حاتشى «يادرولىق ديللەمالار: بۇگىن جانە ەرتەڭ» اتتى حالىقارالىق كونفەرەنتسياعا دا قاتىسادى دەپ كۇتىلۋدە.
نيدەرلاندى جەرىندەگى مەملەكەتتىك حاتشىنىڭ العاشقى جۇزدەسۋى نيدەرلاندى پارلامەنتى سەناتىنىڭ ۆيتسە-پرەزيدەنتى ح. فرانكەنمەن بولدى. ونىڭ بارىسىندا تاراپتار ەكى ەل اراسىنداعى بايلانىستاردى تەرەڭدەتۋ ماسەلەلەرىن ءسوز ەتىپ, قارىم-قاتىناستاردىڭ سەرپىندى بولۋىنىڭ ەكى جاققا دا ءتيىمدى بولاتىنىن اتاپ ءوتتى.
مۇنان سوڭ مەملەكەتتىك حاتشى نەگىزى 1997 جىلدىڭ 29 ساۋىرىندە قالانعان حالىقارالىق ۇيىم – حيميالىق قارۋعا تىيىم سالۋ ۇيىمىنىڭ باس ديرەكتورى احمەت ۋزيۋمدجيۋمەن كەزدەستى. بۇگىنگى كۇنى بۇل ۇيىمعا 188 ەل مۇشە بولسا, ەگيپەت, سيريا, سولتۇستىك كورەيا, سومالي مەن انگولا عانا مۇشەلىككە وتپەگەن ەكەن.
كەزدەسۋ بارىسىندا تاراپتار ادامزات بالاسىنىڭ ومىرىنە زاقىم كەلتىرەتىن قانداي دا ءبىر قارۋ قولدانۋدىڭ جانتۇرشىگەرلىك ءجايت ەكەنىنە توقتالىپ, حيميالىق قارۋدى مۇلدەم پايدالانباۋدىڭ وزەكتىلىگىن ءسوز ەتتى.
30 تامىز كۇنى ساپار جالعاسىن تاۋىپ, ق.ساۋداباەۆ جوعارىدا اتالعان كونفەرەنتسياعا قاتىسىپ, نورۆەگيا پارلامەنتىنىڭ ۆيتسە-پرەزيدەنتى م.نيۋباكپەن, نيدەرلاندى سىرتقى ىستەر ءمينيسترى ۋ.روزەنتالمەن كەزدەسۋى بولادى دەپ كۇتىلۋدە.
وسى ساپار جايىنداعى تولىق ماقالانى گازەتتىڭ الداعى سانىنان وقي الاسىزدار.
انار تولەۋحانقىزى, «ەگەمەن قازاقستان» – گااگادان.