وتكەن سەنبىدە پرەمەر-مينيستر كارىم ءماسىموۆتىڭ توراعالىعىمەن قارجى-ەكونوميكالىق بلوكتىڭ زاڭ جوبالارى, سونداي-اق حالىقارالىق ىنتىماقتاستىق ماسەلەلەرى قارالعان ۇكىمەت وتىرىسى ءوتتى. وندا ەكونوميكالىق دامۋ جانە ساۋدا ءمينيسترى قايرات كەلىمبەتوۆ ەلىمىزدىڭ 2012-2016 جىلدارعا ارنالعان الەۋمەتتىك-ەكونوميكالىق دامۋىنىڭ بولجامى تۋرالى بايانداما جاسادى. وسى كەزەڭدەگى ۇكىمەتتىڭ ەكونوميكالىق ساياساتىنىڭ باستى مىندەتتەرى تەڭدەستىرىلگەن ەكونوميكالىق ءوسۋدى جىل سايىن 7 پايىزدان كەم ەمەس دەڭگەيدە قامتاماسىز ەتۋ بولىپ تابىلادى. قويىلعان ماقساتتار ماكروەكونوميكالىق تۇراقتىلىقتى قامتاماسىز ەتۋ, ايماقتاردىڭ ورنىقتى دامۋى, مەملەكەتتىك باسقارۋ جۇيەسىن دامىتۋ, ادامي كاپيتالدىڭ باسەكەگە قابىلەتتىگىن ارتتىرۋ, سونداي-اق يندۋستريالاندىرۋ ارقىلى ءارتاراپتاندىرۋدى جەدەلدەتۋ جولىمەن تۇراقتى ەكونوميكالىق ءوسۋ ءۇشىن نەگىز جاساۋ ەسەبىنەن جۇزەگە اسادى. ەكونوميكالىق ساياسات ەكونوميكانىڭ شيكىزاتتىق ەمەس سەكتورىن دامىتۋدى ىنتالاندىرۋعا, ەڭ الدىمەن, ەكونوميكانىڭ ناقتى سەكتورى كاسىپورىندارىنىڭ يننوۆاتسيالىق قىزمەتىنە, قولايلى ينۆەستيتسيالىق احۋال قۇرۋعا, جەكە ينۆەستيتسيالاردى ىنتالاندىرۋعا باعىتتالاتىن بولسا, مەملەكەتتىك ورگانداردىڭ ليتسەنزيالىق-رۇقسات بەرۋ جۇيەسىن جانە باقىلاۋ-قاداعالاۋ قىزمەتىن جەتىلدىرۋ ارقىلى بيزنەس-احۋالدى جاقسارتۋ بويىنشا جۇمىستار جالعاسپاق. بيۋدجەت تاپشىلىعىن بولجامدى ءىجو-گە قاتىستى 2012 جىلعى 2,6 پايىزدان 2014 جىلى 1,3 پايىزعا دەيىن نەمەسە 758,5 ملرد. تەڭگەدەن 460,2 ملرد. تەڭگەگە دەيىنگى قىسقارتۋ جوسپارلانعان. ەلباسى تاپسىرمالارىن جۇزەگە اسىرۋ اياسىندا 2012-2014 جىلدارى بيۋدجەت شىعىستارى ساياساتىنىڭ نەگىزگى باسىمدىقتارى يندۋستريالاندىرۋ باعدارلاماسىن قارجىلاندىرۋ, الەۋمەتتىك سالانى جاڭعىرتۋ, حالىقتىڭ تۇرمىس جاعدايىن جاقسارتۋ مەن مەملەكەتتىك قىزمەت ساپاسىن كوتەرۋ, سونداي-اق ءوسۋ نۇكتەلەرىن قالىپتاستىرۋ (ينفراقۇرىلىمداردى, الەۋمەتتىك سالالاردى دامىتۋ جانە تۇرعىن-ءۇي-كوممۋنالدىق شارۋاشىلىعىن جاڭعىرتۋ ارقىلى ايماقتاردىڭ باسەكەگە قابىلەتتىگىن ارتتىرۋعا باعىتتالعان جوبالاردى جۇزەگە اسىرۋ) بولىپ تابىلادى. بەرىلگەن تاپسىرمالاردى جۇزەگە اسىرۋ اياسىندا 2012-2014 جىلدارعا ارنالعان باسىمدىقتى رەسپۋبليكالىق بيۋدجەتتىك ينۆەستيتسيالار تىزبەسى قالىپتاستىرىلسا, 2012 جىلى 1066,1 ملرد. تەڭگە, 2013 جىلى – 866,1 ملرد. تەڭگە, ال 2014 جىلى 707,4 ملرد. تەڭگە قاراجات ءبولۋ قاراستىرىلىپ وتىر. الەمدىك ەكونوميكاداعى جاعدايدىڭ وزگەرۋىن ەسەپكە الا وتىرىپ, ورتا مەرزىمدى كەلەشەكتە ۇلتتىق قور قاراجاتتارىن قالىپتاستىرۋ مەن پايدالانۋ جونىندەگى تۇجىرىمداماعا سايكەس, 8 ملرد. اقش دوللارى كولەمىندە كەپىلدەندىرىلگەن ترانسفەرتتى شەكتەۋ ارقىلى ۇلتتىق قوردا قارجى قاراجاتتارىن جيناقتاۋ ساياساتى جالعاساتىن بولادى. ۇلتتىق قوردىڭ اكتيۆتەرى 2015 جىلعا قاراي 72,5 ملرد. اقش دوللارىنا دەيىن ءوسۋى قاجەت, بۇل ءىجو-ءنىڭ 30,4%-نان كەم ەمەس بولىكتى قۇرايدى. وسىعان بايلانىستى 2012-2014 جىلدارى ۇلتتىق قوردان بولىنەتىن كەپىلدەندىرىلگەن ترانسفەرت 1200,0 ملرد. تەڭگە كولەمىندە جوسپارلانعان. وتىرىس بارىسىندا ق.كەلىمبەتوۆ ۇسىنعان «قازاقستان رەسپۋبليكاسى ۇلتتىق قورىنان 2012 - 2014 جىلدارعا ارنالعان كەپىلدەندىرىلگەن ترانسفەرت تۋرالى» زاڭ جوباسى ءبىراۋىزدان ماقۇلداندى. سونىمەن قاتار, اتالعان جيىندا قارجى ءمينيسترى بولات جامىشەۆ ۇسىنعان «2012-2014 جىلدارعا ارنالعان رەسپۋبليكالىق بيۋدجەت تۋرالى» زاڭ جوباسى دا قولداۋ تاپتى. ەلىمىزدىڭ ماكروەكونوميكالىق دامۋىنىڭ بازالىق ستسەناريى نەگىزىندە 2012-2014 جىلدارعا ارنالعان رەسپۋبليكالىق بيۋدجەتتىڭ 2012 جىلى – 4751 ملرد. تەڭگەنى (2011 جىلدىڭ بيۋدجەتىنە 502 ملرد. تەڭگەگە وسە وتىرىپ), – 2013 جىلى –5031 ملرد. تەڭگەنى (280 ملرد. تەڭگەگە وسە وتىرىپ) جانە 2014 جىلى – 5424 ملرد. تەڭگەنى (387 ملرد. تەڭگەگە وسە وتىرىپ) قۇرايتىن ولشەمدەرى قالىپتاستىرىلعان. 2012 جىلعا ارنالعان رەسپۋبليكالىق بيۋدجەت كىرىستەرىنىڭ بولجامى (ترانسفەرتتەردىڭ ءتۇسىمىن ەسەپكە الماعاندا) اعىمداعى جىل تۇسىمدەرىن باعالاۋدان 274 ملرد. تەڭگەگە ارتا وتىرىپ, 3310 ملرد. تەڭگە سوماسىندا انىقتالعان. 2012 جىلعى رەسپۋبليكالىق بيۋدجەت كىرىستەرىندە سالىق تۇسىمدەرى اناعۇرلىم كوپ ۇلەس سالماققا يە (97,3 %). 2012 جىلعى سالىق تۇسىمدەرىنىڭ ەلەۋلى ۇلەسى كورپوراتيۆتىك تابىس سالىعى (37,5%) جانە قوسىلعان قۇن سالىعى بويىنشا (30,3 %) تۇسىمدەرگە كەلەدى. 2012 جىلى الەۋمەتتىك قامسىزداندىرۋ جانە الەۋمەتتىك كومەككە جۇمسالاتىن شىعىستار 134 ملرد. تەڭگەگە (12,5 پايىزعا) وسە وتىرىپ, 1209 ملرد.تەڭگەنى قۇرايدى. 2012-2014 جىلدارى ءبىلىم مەن عىلىمعا جۇمسالاتىن شىعىستار 1 132 ملرد. تەڭگەنى قۇرايدى, ونىڭ ىشىندە 2012 جىلى – 365 ملرد. تەڭگە نەمەسە 2011 جىلدىڭ جوسپارلى كورسەتكىشتەرىنەن 105 ملرد. تەڭگەگە جوعارى. 2012-2014 جىلدارى دەنساۋلىق ساقتاۋ جۇيەسىنە شىعىستار 1303 ملرد. تەڭگەنى, ونىڭ ىشىندە 2012 جىلى 437 ملرد. تەڭگەنى قۇرايدى نەمەسە اعىمداعى جىلعا قاراعاندا 36 ملرد. تەڭگەگە وسەدى. ال, مادەنيەت سالاسىنداعى شىعىستاردىڭ جالپى سوماسى 61 ملرد. تەڭگەنى قۇراسا, 2012 جىلى – 30,5 ملرد. تەڭگە, 2013 جىلى – 17 ملرد. تەڭگە جانە 2014 جىلعا – 13,5 ملرد. تەڭگە بولماق. جيىن بارىسىندا «ەنەرگيا ۇنەمدەۋ جانە ەنەرگيا تيىمدىلىگىن ارتتىرۋ تۋرالى» جانە «ەنەرگيا ۇنەمدەۋ جانە ەنەرگيا تيىمدىلىگىن ارتتىرۋ ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرتۋلەر مەن تولىقتىرۋلار ەنگىزۋ تۋرالى» زاڭ جوبالارى دا تالقىلاندى. سونىمەن قاتار, پرەمەر-ءمينيستردىڭ ورىنباسارى ەربول ورىنباەۆتىڭ ەكونوميكالىق ىنتىماقتاستىق جانە دامۋ ۇيىمىمەن ءوزارا ىقپالداستىق جونىندەگى ۇسىنىستارى دا قولداۋ تاپتى. ءابدىراحمان قىدىربەك.