«ەلدىڭ اتىن ەر شىعارار» دەگەن حالىق دانالىعىنا كۇن سايىن كوز جەتكىزىپ ءجۇرمىز. سپورتتىق سايىستاردا كوك بايراق كوكتە جەلبىرەپ, ءانۇران اۋانى ءتىلىپ وتكەندە كوكىرەكتى ماقتانىش سەزىمى كەرنەيدى. جات جەردە ابىرويىڭ اسقاقتاپ, مەرەيىڭ ۇستەم بولىپ جاتسا, نەگە شاتتانباسقا؟! دۇنيەنىڭ مىنا شەتىندە وتىرىپ «مەنىڭ قازاقستانىمدى» بىرگە شىرقايسىڭ.
بابى بولماسا, باعلاننىڭ باعى جانبايتىنى بەلگىلى. مايتالماندى ماي بەرىپ باپتايتىن باپكەردىڭ ءجونى بولەك. ال ونىڭ ءجۇرىپ-تۇرۋى, اس-سۋى, جاتتىعاتىن ورنىن دايارلاپ بەرۋ دە ۇلكەن جۇمىس. مۇنداي كەزدەردە وبلىستىق سپورت جانە تۋريزم باسقارمالارىنا باتپانداي جۇكتىڭ ارتىلارى بەلگىلى. دەگەنمەن, «جالعىزدىڭ ءۇنى شىقپاس» دەگەندەي تەك ءبىر عانا باسقارما جۇزدەگەن سپورتشى مەن ولاردىڭ باپكەرلەرىن بەيقام ومىرمەن قامتاماسىز ەتۋى قيىن. وسىنداي دا قولى اشىق, جانى جومارت, ەل بولاشاعىنا الاڭدايتىن اقشالى ازاماتتاردىڭ اتقارار ءرولى بولەك. ولار ادەتتە «مىنانى مەن جاسادىم» دەپ كوكىرەك كەرمەيدى. ۇندەمەي ءجۇرىپ, ۇلكەن ىستەر تىندىرادى. مىسالى, بەيجىڭدەگى جالعىز التىننىڭ يەسى باقىت سارسەكباەۆتى قازاقستانعا الدىرتىپ, جاعدايىن جاساپ, الاڭسىز جاتتىعۋىن قامتاماسىز ەتكەن كىم دەپ ويلايسىز؟ ول – ازات پەرۋاشەۆ. شەت جەردە قىسپاق كورىپ, تىرسەكتەن قاعىلعان جىگىتتى تۋعان جەرىنە الدىرتىپ, باپتاپ بايگەگە قوستى. باقىت وليمپيادانى باعىندىردى. دەگەنمەن, ازات پەرۋاشەۆ ەشقانداي مىنبەردە باقىتقا جاساعانىن بادىرايتىپ ايتقان ەمەس. ال قازاق سپورتىنا جاناشىر ونداي ازاماتتار كوپتەپ سانالادى.
قىزىلوردا وبلىسىندا «ساۋتس ويل» دەگەن كومپانيا بار. اتى ايتىپ تۇرعانداي مۇناي وندىرۋمەن اينالىسادى. وسى كومپانيا قىزىلوردا قالاسىنان تەننيس ورتالىعىن سالىپ بەرۋگە كومەكتەستى. بۇگىندە ەڭ اقشالى ويىن سانالاتىن تەننيستىڭ ءبىزدىڭ ايماقتا كەنجەلەپ قالىپ جاتقانى شىندىق. وسى كومپانيانىڭ ارقاسىندا قىزىلوردالىق جاس بالالار تەننيس كورتىنا بارىپ, راكەتكاسىن ۇستاپ, شەبەرلىگىن شىڭداپ جاتىر. مۇنداي قامقورلىقتان سوڭ اقمەشىتتىك شاراپوۆالاردىڭ شىقپاۋى مۇمكىن ەمەس.
ال «بەست-سەرۆيس» دەگەن مەكەمە جالاعاش اۋدانىنداعى №2 بالالار مەن جاسوسپىرىمدەر سپورت مەكتەبىنە كۇردەلى جوندەۋ وتكىزۋگە قولۇشىن سوزدى. اتالعان مەكتەپتە قانشاما بالا ءتالىم الىپ جاتىر. بولاشاقتا ولجا سالاتىن بالعىنداردىڭ جاعدايىن جاساۋ دا وزىندىك ساۋاپتى ءىس بولسا كەرەك. سونىمەن قاتار, «جەزكيىك ك» جشس شيەلى اۋدانىنىڭ اقتوعان اۋىلىندا فۋتبول الاڭىن سالدى. ونىمەن بىرگە, ۆولەيبول, جەڭىل اتلەتيكا الاڭدارىن دا جاساپ بەردى. جاسىل الاڭدا دوپ تەۋىپ وسكەن بالانىڭ فۋتبولدان الار ورنى دا بولەك بولۋعا ءتيىس. بايقاساڭىز, مەتسەناتتار تەك وبلىس ورتالىقتارىندا عانا ەمەس, قيىر جايلاپ, شەت قونعان اۋىلدارعا قارايلاسىپ جاتىر. «ەل ءىشى – ونەر كەنىشى» دەيتىن بولساق, مۇنداي يگىلىكتى ىستەر بۇلاقتىڭ كوزىن اشۋعا باعىتتالعانى ايدان انىق بايقالادى.
ەرجان بايتىلەس.
قىزىلوردا.