جاپونيانىڭ جاڭا پرەمەر-ءمينيسترى ەلدىڭ قارجى ءمينيسترى يوسوحيكو نودا بولادى. كەشە ول جاپونيانىڭ بيلەۋشى دەموكراتيالىق پارتياسىنىڭ جاڭا توراعاسى بولىپ سايلاندى. داۋىس بەرۋدىڭ ەكىنشى كەزەڭىندە ي.نودا پارلامەنت مۇشەلەرىنىڭ 215 داۋىسىنا يە بولدى.
ال ي.نودانىڭ نەگىزگى قارسىلاسى, جاپونيانىڭ ءوندىرىس ىستەرى جونىندەگى ءمينيسترى بانري كايەدۋدى بيلەۋشى پارتيانىڭ پارلامەنتتەگى 107 دەپۋتاتى قولدادى. بۇل ۇدەرىس ەلدىڭ پرەمەر-ءمينيسترى بولعان ناوتو كان 26 تامىزدا وتستاۆكاعا كەتكەننەن كەيىن جۇزەگە اسىرىلدى. ال يوسوحيكو نودا ۇكىمەت باسشىسى لاۋازىمىنا بۇگىن بەكىتىلۋى ءتيىس. جالپى, ول جاپونيانىڭ سوڭعى بەس جىلداعى التىنشى ۇكىمەت باسشىسى بولماق.
كەلىسسوز تۋرالى ۇسىنىسىن قابىلدامادى
ليۆياداعى كوتەرىلىسشىلەر مۋاممار كاددافيدىڭ بيلىكتى وتكىزۋگە بايلانىستى كەلىسسوز جۇرگىزۋ ۇسىنىسىنان باس تارتقان. م.كاددافيدىڭ ءدال قازىر قاي جەردە جاسىرىنىپ جۇرگەنى دە بەلگىسىز. ىزدەستىرۋ وپەراتسيالارى ازىرگە ەش ناتيجە بەرمەي وتىر.
وسى ارالىقتا ليۆيا كوتەرىلىسشىلەرى اسكەري كوماندوۆانيەسىنىڭ وكىلى احمەد باني سوڭعى كۇندەرى ليۆيا ءتۇرمەلەرىنەن 10 مىڭنان استام ادام بوساتىلعانىن حابارلادى. ونىڭ ايتۋىنشا, بۇرىنعى بيلىك تۇتقىنداعان 50 مىڭداي ادام ءىس جۇزىندە ءىز-ءتۇزسىز جوعالىپ كەتكەن. كوتەرىلىسشىلەردىڭ پىكىرلەرىنشە, ولاردىڭ كوپشىلىگى بۇگىندە ءتىرى بولماۋلارى دا مۇمكىن. تۇتاستاي العاندا, ليۆياداعى سوعىس اياقتالعان جوق.
ەلدىڭ سولتۇستىك-باتىسىنا رەيد جۇرگىزدى
سيريا پرەزيدەنتى باشار اسادقا سەنىمدى جاساق بۇرناعى كۇنى ەلدىڭ سولتۇستىك-باتىسىنداعى يدليب پروۆينتسياسىندا قارۋلى رەيد جۇرگىزدى. اسكەريلەر مەن قاۋىپسىزدىك قىزمەتى ءىس-ارەكەتىنىڭ سالدارىنان كەم دەگەندە ەكى ادام قازا تاۋىپ, توعىزى جاراقاتتانعان.
قۇقىق قورعاۋشىلاردىڭ سوزدەرىنە قاراعاندا, يدليب قالاسىندا جەرگىلىكتى تۇرعىندارعا 10 تانكىدەن جانە اۆتوماتتى قارۋلاردان وق جاۋدىرىلعان. قازا تاپقاندار مەن زارداپ شەككەندەردىڭ سانى ءوسۋى مۇمكىن دەلىنىپ وتىر. كەشە داماسكىگە رەسەي سىرتقى ىستەر ءمينيسترىنىڭ ورىنباسارى ۇشىپ كەلدى. ساپار ماقساتى تۋرالى ناقتى مالىمەت جوق.
زاڭدىلىعىن مويىنداۋدان باس تارتتى
26 تامىزدا ابحازيادا پرەزيدەنتتىك سايلاۋ ءوتىپ, وندا الەكساندر انكۆاب 54,9 پايىز داۋىسپەن جەڭىسكە جەتتى دەپ جاريالانعان ەدى. رەسەي 2008 جىلدىڭ تامىزىنداعى گرۋزيامەن قارۋلى قاقتىعىس ناتيجەسىندە جاريالانعان ابحازيانىڭ جانە وڭتۇستىك وسەتيانىڭ تاۋەلسىزدىگىن تانىعان بولاتىن.
ەۋروپالىق وداقتىڭ سىرتقى ساياسات جانە قاۋىپسىزدىك جونىندەگى جوعارعى كوميسسارى كەترين ەشتون مەن ناتو-نىڭ باس حاتشىسى اندەرس فوگ راسمۋسسەن ابحازياداعى پرەزيدەنتتىك سايلاۋدىڭ زاڭدىلىعى مويىندالمايتىندىعىن مالىمدەدى. ولاردىڭ پىكىرلەرىنشە, اتالعان ۇيىمدار حالىقارالىق قۇقىق نورمالارى تالاپ ەتەتىنىندەي, گرۋزيانىڭ اۋماقتىق تۇتاستىعىن قولدايدى.
پرەزيدەنتتىكتەن جولى بولماعان اقتالدى
قىرعىزستاندا بيزنەسمەن, پرەزيدەنتتىكتەن بۇرىنعى ۇمىتكەر ۋرمات بارىكتاباسوۆ تۇرمەدەن بوساتىلدى. ول ءوزىنىڭ جاقتاستارىمەن 2010 جىلى بىشكەككە قارۋ جەتكىزبەك بولعانى ءۇشىن 4 جىلعا سوتتالعان ەدى. ەندى ول ساياساتپەن مۇلدەم اينالىسپايتىنىن مالىمدەپ وتىر.
ۋرمات بارىكتاباسوۆ بۇرىندارى قىرعىزستانعا جانار-جاعار ماي جەتكىزۋمەن اينالىسقان. جەرگىلىكتى بۇقارالىق اقپارات قۇرالدارىنىڭ دەرەكتەرىنشە, 1991 جىلدىڭ وزىندە-اق ول دوللارلى ميلليونەر بولعان ەكەن. 2005 جىلعى «قىزعالداق توڭكەرىسى» الدىندا وپپوزيتسيالىق پارتيا قۇرىپ, پرەزيدەنتتىككە تۇسپەك نيەت تانىتقان. ۋ.بارىكتاباسوۆتىڭ ادۆوكاتى ەندى ونى تولىق اقتاۋعا كۇش سالماق.
3,7 مىڭ تۇتقىنعا كەشىرىم جاسالدى
تۇركىمەنستان پرەزيدەنتى گۋربانگۋلى بەردىمۇحامەدوۆ «قادىر تۇنىنە» وراي بىرقاتار سوتتالعاندارعا كەشىرىم جاساۋ تۋرالى جارلىق شىعاردى. رەسپۋبليكادا «قادىر ءتۇنىنىڭ» قۇرمەتىنە مۇنداي اقتاۋ شارالارى جىل سايىن جۇزەگە اسىرىلادى.
بۇعان ەلدىڭ بۇرىنعى پرەزيدەنتى ساپارمۇرات نيازوۆ داڭعىل جول سالىپ كەتكەن بولاتىن. بۇل جولى قاماۋ ورىندارىنان شامامەن 3,7 مىڭ ادام بوساتىلدى. وتكەن جىلى اتالعان شارا اياسىندا اقتالعاندار سانى شامامەن 4 مىڭ ادامدى قۇراعان ەدى. پرەزيدەنت جەرگىلىكتى بيلىك ورگاندارىنا بۇرىنعى سوتتالعانداردى جۇمىسقا ورنالاستىرۋ جاعىنان كومەكتەسۋدى تاپسىردى.
قىسقا قايىرىپ ايتقاندا:
يراكتىڭ استاناسى باعداد قالاسىنداعى سۇننيتتەردىڭ ۋمم ءال-كۋرا مەشىتىندە جارىلىس جاسالدى. لاڭكەستىك سالدارىنان 28 ادام وپات بولسا, 37-ءسى جارالانعان. بومبانى جانكەشتى ىسكە قوسقان.
وزبەكستاندا 1 قىركۇيەكتە اتاپ وتىلەتىن تاۋەلسىزدىك كۇنى مەرەكەسىنە وراي بارلىق اڭشىلاردان قارۋلارى ۋاقىتشا تارتىپ الىندى. بۇل شارا قاۋىپسىزدىك ماقساتىندا جاسالىپ وتىرسا كەرەك. ەلدە اڭشىلىق ماۋسىمى 15 تامىزدا اشىلعان بولاتىن.
اقش-تا «يرەن» داۋىلىنان قازا تاپقاندار سانى 14 ادامعا جەتتى. ەلدىڭ اتلانت مۇحيتى جاعالاۋلارىنداعى 9 شتاتىندا توتەنشە جاعداي جاريالانىپ, بارلىق اۋەجايلار مەن تەڭىز پورتتارى جابىلدى. 1,5 ملن.-عا جۋىق ادام قاۋىپسىز جەرلەرگە كوشىرىلدى. كەشە «يرەن» السىرەگەندەي قالىپ تانىتتى.
26 تامىزدا ءالجيردىڭ شەرشەل قالاسىندا لاڭكەستىك جاسالىپ, جارىلىس سالدارىنان 18 ادام كوز جۇمعان ەدى. لاڭكەستىككە جاۋاپكەرشىلىكتى كەشە «ءال-كايدانىڭ» سولتۇستىك افريكاداعى بولىمشەسى موينىنا الدى.
رەسەيدىڭ تۆەر وبلىستىق سوتىندا «نەۆسكي ەكسپرەسس» پويىزى جارىلۋىنا قاتىستى الدىن الا تىڭداۋ باستالدى. ءىس جابىق رەجىمدە قارالۋدا. لاڭكەستىككە بايلانىستى ينگۋشەتيانىڭ ون تۋماسى ايىپتالىپ وتىر. 2009 جىلدىڭ 27 قاراشاسىندا بولعان لاڭكەستىك سالدارىنان 27 ادام ءولىپ, 130-ى جارالانعان بولاتىن.
ينتەرنەت ماتەريالدارى نەگىزىندە ازىرلەندى.