قازاقستان رەسپۋبليكاسىنىڭ ءتاۋەلسىزدىگىنە – 20 جىل. وسى ءبىر جاسوسپىرىمنىڭ جاسىنداي شاقتاعى ەلىمىزدىڭ جەتكەن جەتىستىكتەرى, قازاقستاندىقتاردىڭ ءبىر ءۇيدىڭ بالاسىنداي, ءبىر ساۋساقتىڭ سالاسىنداي, ەركىن ەڭبەك ەتىپ, بەيبىت ءومىر ءسۇرۋى اتا زاڭىمىزدىڭ بارشاعا تەڭ قۇقىق بەرگەندىگىنەن دەسەك, ارتىق ايتقاندىق بولماس ەدى.
كونستيتۋتسيامىزدىڭ نەگىزى سوناۋ ىقىلىم زامانداعى ەسىم حاننىڭ ەسكى جولىنان باستاۋ الىپ, قاسىم حاننىڭ قاسقا جولى مەن ءاز-تاۋكەنىڭ جەتى جارعىسىمەن جالعاسادى. سول زاماندا-اق, ورتاق زاڭعا باس ءيىپ, اۋىزدارى دۋالى, سوزدەرى ءۋالى بيلەردىڭ شەشىمىمەن كەلىسكەن ەلدىڭ بولاشاعى بۇلىڭعىرلانىپ بارىپ, اياعىنان تىك تۇرىپ كەتكەنىنە كەيبىر كورشىلەرىمىز قىزعانا دا قىزىعا قاراعانىن بىلەمىز.
قازاقستان كەلمەسكە كەتكەن كەڭەس وكىمەتىنەن ءوز الدىنا مەملەكەت بولىپ شىققاندا, كەزىندە وداقتاس بولعان ەلدەردىڭ كۇدىكپەن قاراعانى ءالى ەسىمىزدە. تەك, ءتۇپ تەگىمىز ءبىر تۇركيا مەملەكەتى العاش بولىپ قازاقستان رەسپۋبليكاسىنىڭ تاۋەلسىزدىگىن مويىنداپ, باۋىرلاستىقتارىن تانىتقان ەدى.
بىرلىگىمىز بەن تىرلىگىمىزگە جان بىتىرگەن كونستيتۋتسيا ءاربىر قازاقستاننىڭ ازاماتىنا تەڭ قۇقىق بەرەتىن ەلدىڭ باستى قۇجاتى بولىپ تابىلادى.
ءجۇزى بولەك بولسا دا جۇرەگى ءبىر, ءتىلى بولەك بولسا دا تىلەگى ءبىر 130-دان اسا ۇلىس وكىلدەرىنىڭ باسىن بىرىكتىرىپ وتىرعان قۇجاتتىڭ ماڭىزدىلىعى سول, ەل تۇرعىندارىن شەنى مەن شەكپەنىنە, تەڭى مەن تەكتىلىگىنە قاراي بولمەي, ورتاقتىعىن كورسەتىپ كەلەدى.
يىعىنا پوگون تاعىنىپ, مەملەكەتتىڭ ماڭىزدى ىستەرىن مانىمەن اتقارىپ وتىرعان كەدەنشىلەر وزدەرىنە تيەسىلى مىندەتتەرىن جاۋاپكەرشىلىكپەن ورىنداپ قانا قويماي, ەل شەكاراسىندا ەلدىڭ كونستيتۋتسياسىنىڭ بۇزىلماۋىنا باقىلاۋ جاسايتىن ورگانداردىڭ ءبىرى.
وتكەن جىلدان بەرى جۇمىسىن باستاعان كەدەن وداعىنىڭ شەتكەرى شەكارا شەبى سانالاتىن جامبىل وبلىسىنىڭ كەدەندىك شەكاراسى قازىرگى زامان تەحنولوگيالارىمەن جابدىقتالىپ, ەل شەكاراسىنداعى قىلمىستارمەن پارمەندى كۇرەستە رەسپۋبليكا بويىنشا الدا كەلەدى.
كەز كەلگەن زاڭداردىڭ نەگىزى قر كونستيتۋتسياسى بولسا, كەدەن زاڭنامالارىن بۇزۋشىلاردى انىقتاپ, بولدىرماۋ ماقساتىندا كونترابانداعا قارسى كۇرەس باسقارماسى مەن كەدەن بەكەتتەرى تاراپىنان قاڭتار-ءشىلدە ايلارى ارالىعىندا ەسىرتكى كونترابانداسىنىڭ جولىن كەسۋ كەزىندە 25 قىلمىستىق ءىس قوزعالىپ, زاڭسىز اينالىمنان جالپى سالماعى 138 كيلوگرامنان اسا ەسىرتكى زاتى تاركىلەندى.
بيىلعى جىلدىڭ رەسپۋبليكاداعى ەڭ كولەمدى پارتياسىن جامبىل وبلىسىنىڭ شەكاراشىلارى مەن كەدەنشىلەرى انىقتاپ, 30 كگ-نان اسا گەروين رەسەي جەرىنە اسپاق بولعان جەرىندە قۇرىقتالدى.
شەكارا بويىندا كەپتەلەكتەردىڭ ورىن الۋىنا سەبەپشى تاۋار «الىپ وتۋشىلەردى» اكىمشىلىك ىسكە تارتۋ شارالارى ءجىتى قولعا الىنىپ, كەدەن بەكەتتەرىندەگى كەپتەلەكتەردىڭ ءبىرشاما تومەندەگەنىن ايتۋعا بولادى.
جالپى, وتكەن 7 ايدىڭ كولەمىندە كەدەن بەكەتتەرىندە 1098 قىلمىستىق ءىس قوزعالىپ, 19 ملن. تەڭگە ءوندىرىلدى. تاركىلەنگەن تاۋارلاردىڭ جالپى قۇنى 1,8 ملن.-نان استى. مەملەكەتكە كەلتىرىلگەن زالال سوماسى – 2,3 ملن. تەڭگە.
وبلىسىمىزدىڭ كەدەنشىلەرى ەلباسى نۇرسۇلتان نازارباەۆتىڭ قازاقستان حالقىنا جولداۋىنداعى تاپسىرمالارىن بۇلجىتپاي ورىنداۋ ماقساتىندا جانە ەل قازىناسىنا كەدەندىك تولەمدەر مەن سالىقتاردى ءوندىرۋدە 7 اي ىشىندە 5 ملرد. تەڭگەدەن استام قارجىنى بيۋدجەت قورىنا قۇيدى.
مەيىرحان ساتىبالدين, جامبىل وبلىسى بويىنشا كەدەندىك باقىلاۋ دەپارتامەنتىنىڭ باستىعى, كەدەن قىزمەتىنىڭ پولكوۆنيگى.