يادرولىق سىناقتارعا قارسى ءىس-قيمىلدىڭ حالىقارالىق كۇنى بۇۇ باس حاتشىسى پان گي مۋن «قاۋىپسىز الەم ءۇشىن» يادرولىق سىناقتارعا جاپپاي تىيىم سالۋ تۋرالى شارتتى (ياسجتش) راتيفيكاتسيالاۋعا شاقىردى.
ءوزىنىڭ ۇندەۋىندە پان گي مۋن بىلاي دەدى: وسى جىلى يادرولىق سىناقتارعا قارسى ءىس-قيمىلدىڭ حالىقارالىق كۇنىن اتاپ وتە وتىرىپ, ءبىز قازاقستانداعى سەمەي يادرولىق سىناق پوليگونى جابىلۋىنىڭ 20 جىلدىعىن دا اتاپ وتۋدەمىز. «قىرعي-قاباق سوعىس» ۋاقىتىندا ءجۇزدەگەن يادرولىق سىناقتار جەرگىلىكتى تۇرعىندار مەن قورشاعان ورتاعا ۇلكەن زارداپ اكەلدى. ادامزات تاريحىنداعى وسى قانقۇيلى ارەكەت جۇزەگە اسىرىلعان جەر – پوليگوندا بولعان ادام رەتىندە مەن يادرولىق سىناقتار سالدارلارىمەن كۇرەستى جالعاستىرىپ كەلە جاتقان قازاقستان ۇكىمەتى مەن حالقىن قولداعىم كەلەدى جانە بۇل كۇش-جىگەردى جوعارى باعالايمىن.
بىزگە يادرولىق سىناقتاردان, سونداي-اق يادرولىق قارۋدان ازات الەم قۇرۋ جولىندا ودان ارعى پروگرەستىڭ ومىرلىك ماڭىزى زور. يادرولىق سىناقتاردى جۇرگىزۋگە ءوز ەركىڭمەن موراتوري جاريالاۋدىڭ دا ماڭىزى ايتارلىقتاي, بىراق ول جاھاندىق تىيىم سالۋدى الماستىرا المايدى. مىنە, ءدال سوندىقتان دا يادرولىق سىناقتارعا جاپپاي تىيىم سالۋ تۋرالى شارتتىڭ ءمۇمكىندىگىنشە جەدەل كۇشىنە ەنۋىنىڭ ماڭىزى زور. ويتكەنى, ول يادرولىق قارۋسىزدانۋ مەن تاراتپاۋدىڭ حالىقارالىق رەجىمىنىڭ شەشۋشى قۇرامداسى بولىپ تابىلادى جانە الەمدەگى بارلىق مەملەكەتتەردىڭ بەلسەندى قولداۋىن قاجەتسىنەدى.
ياسجتش-نىڭ كۇشىنە ەنۋىنىڭ زور ماڭىزى بار ەكەنى 2010 جىلى وتكەن, قورىتىندىسى بويىنشا ءىس-قيمىل جوسپارى قابىلدانعان يادرولىق قارۋدى تاراتپاۋ تۋرالى شارت (ياقتش) مىندەتتەمەلەرىن ورىنداۋ ءجونىندەگى شولۋ كونفەرەنتسياسىندا تاعى دا قۋاتتالعان بولاتىن. ياقتش رەجىمىن تەكسەرۋ حالىقارالىق ىنتىماقتاستىقتىڭ قۇندى قۇرالى بولدى. مەن ونىڭ ءارى قاراي دا ءتاۋەلسىز, سەنىمدى جانە ەكونوميكالىق ءتيىمدى, سايكەسىنشە شارت ەرەجەلەرىن ساقتاماۋشىلىقتىڭ كەز كەلگەن ءتۇرىنىڭ الدىن الۋدى قامتاماسىز ەتۋگە قابىلەتتى تەكسەرۋ جۇرگىزە الاتىنىنا تولىقتاي سەنىمدىمىن.
سوندىقتان مەن ياسجتش-عا قول قويماعان نەمەسە ونى راتيفيكاتسيالاماعان الەمنىڭ بارلىق مەملەكەتتەرىن مۇنى ءبىرىنشى كەزەكتە جاساۋعا شاقىرامىن. اتالعان ماقساتقا قول جەتكىزۋ يادرولىق قارۋدان ازات الەم قۇرۋ جولىنداعى بۇگىنگى كۇش-جىگەردى نىعايتا تۇسۋگە مۇمكىندىك بەرەتىن بولادى.