كەشە جاپونيانىڭ پرەمەر-ءمينيسترى ناوتو كان ءوزىنىڭ وتستاۆكاعا كەتەتىنىن مالىمدەدى. وعان سەبەپ قوعامدىق پىكىردىڭ ن.كان ۇكىمەتىنە سەنىم بىلدىرمەيتىندىگىندە بولىپ وتىر. سوڭعى ساۋالداماعا قاراعاندا, قازىرگى ۇكىمەتتىڭ ءىسىن حالىقتىڭ 15-اق پايىزى قولدايدى ەكەن.
حالىق سەنىمىنىڭ تومەندەپ كەتۋىنە ناۋرىز ايىنداعى جەر سىلكىنىسىنىڭ كەسىرىنەن بولعان ءتسۋناميدىڭ جانە سونىڭ سالدارىنان «فۋكۋسيما-1» اەس-ىندە ورىن العان جارىلىس سەبەپ بولىپ وتىر. ناوتو كان بيلىكتەگى دەموكراتيالىق پارتيانىڭ توراعالىعى قىزمەتىنەن دە باس تارتۋدا. ۇكىمەتتى ەندى پارتيانىڭ جاڭا توراعاسى جاساقتايدى. ءسويتىپ, جاپونيادا سوڭعى بەس جىلدا التىنشى ۇكىمەت وتستاۆكاعا كەتتى.
بىرەۋدىكى بىرەۋگە بايلىق بولمايدى
ليۆيادا سوعىس اياقتالعان سوڭ ەڭبەكاقى تولەۋ كەشەۋىلدەۋى مۇمكىن. سوعىس باستالعالى حالىق ونسىز دا ەڭبەكاقى كورۋدەن قالدى دەپ كوتەرىلىسشىلەر مۇڭىن شاعۋى سول ەكەن, بۇۇ قاۋىپسىزدىك كەڭەسى اقش-قا ليۆيا ەسەپ-شوتتارىنا تيەسىلى تۇتقىنعا الىنعان 1,5 ملرد. دوللاردى بوساتۋعا رۇقسات بەردى.
بىراق بۇل قاراجات كوتەرىلىسشىلەردىڭ قولىنا ەمەس, امەريكالىق جانە حالىقارالىق دەلدال اگەنتتىكتەردىڭ قولىنا بەرىلمەكشى. ءسويتىپ, كاددافيدىڭ بايلىعىن قىزعانىپ, ونى تارتىپ الۋدى كوزدەگەندەر قۇرالاقان قالعالى وتىر. ال ەۋروپالىقتار ليۆياعا قايىرىمدىلىق كومەك جاسايمىز دەپ دامەلەندىرۋدە.
قۇرمەتتى اتاق قۇردان-قۇر بەرىلمەيدى
تاجىكستان پرەزيدەنتى ەمومالي راحمون ەۋروپا قاۋىمداستىعى حالىقارالىق بايلانىستار ءجونىندەگى كەڭەسىنىڭ شەشىمىمەن «ءححى عاسىردىڭ كوشباسشىسى» دەگەن قۇرمەتتى اتاققا يە بولدى. ماراپاتتى وسى كەڭەستىڭ پرەزيدەنتى انتون كاراجاتابتىڭ ءوزى دۋشانبەگە كەلىپ تاپسىردى.
بۇل جوعارى اتاققا تاجىكستان پرەزيدەنتى ەلدىڭ تۇتاستىعىن ساقتاۋدا, ازاماتتاردىڭ ابىرويى مەن ادامگەرشىلىگىنە نۇقسان كەلتىرمەۋدە, دەموكراتيالىق ۇدەرىستەردى قولداۋدا جەتكەن تابىستارى ءۇشىن يە بولدى, دەپ جاريالادى مەملەكەت باسشىسىنىڭ ءباسپاسوز قىزمەتى. جالپى, سوڭعى كەزدە تاجىكستاننىڭ حالىقارالىق شارالارعا قاتىسۋ بەلسەندىلىگى ايتارلىقتاي ارتىپ كەلەدى.
تانىلماعان ەل پرەزيدەنتىن تاڭداماق
ابحازيانىڭ بۇرىنعى پرەزيدەنتى سەرگەي باگاپش مامىر ايىندا ماسكەۋدە قايتىس بولعانى بەلگىلى. كەشە مۇندا جاڭا پرەزيدەنتتىك سايلاۋ بولىپ, وعان ءۇش ادام ءوز كانديداتۋراسىن ۇسىنعان ەدى. سايلاۋدىڭ العاشقى قورىتىندىسى بۇگىن شىعادى.
رەسەي جاعى بۇل سايلاۋعا اشىق ىقپال ەتپەي, ءۇش كانديداتقا دا قارسى ەمەستىگىن جاريالاسا دا, باق ونىڭ س.شامباعا بۇيرەگى بۇراتىنىن ايتادى. ۇشەۋدىڭ قاتارىندا پرەزيدەنتتىڭ مىندەتىن اتقارۋشى الەكساندر انكۆاب, پرەمەر-مينيستر سەرگەي شامبا جانە وپپوزيتسيالىق قايراتكەر راۋل حادجيمبا بار. ءاربىر كىشكەنتاي ەلدىڭ ۇلكەن پروبلەماسى بولاتىنى سەكىلدى, مۇنداعى سايلاۋالدى تارتىس تا بارىنشا قىزۋ وتكەن-ءتىن.
پروبلەمادان قۇتىلعان قۇرىمايدى
چەشەنستاننىڭ بۇرىنعى پرەزيدەنتى احماد قادىروۆ مارقۇمنىڭ 60 جاسقا تولۋىنا بايلانىستى وسى رەسپۋبليكانىڭ باق وكىلدەرىنە بەرگەن سۇحباتىندا رەسەي پرەمەر-ءمينيسترى ۆلاديمير پۋتين جۋرناليستەردى تاعى دا ءوزىنىڭ وداعايلاۋ سوزىمەن ءماز ەتتى.
جۋرناليستەردىڭ: «قاپ تاۋىن رەسەيدەن قيىپ الۋ تۋرالى پىكىر ايتۋشىلارعا قالاي قارايسىز؟» دەگەن سۇراعىنا ول: «ونداي ادامداردىڭ وزدەرىنىڭ ءبىر جەرىن قيىپ الۋ كەرەك», دەپ ازىلدەگەن. ىلە ايتقان ساليقالى سوزىندە: «پروبلەمالى اۋماعىنان قۇتىلعىسى كەلگەن مەملەكەتتىڭ قۇرۋى دا وڭاي», دەگەن. بىراق باق-تار پروبلەمالى اۋماقتان قۇتىلعان مەملەكەتتەردىڭ قۇرىعانى تاريحتا بولماعانىن, كەرىسىنشە, گۇلدەنە باستاعانىن اۋىزعا الادى. سونىڭ مىسالى رەتىندە 1918 جىلى لەنيننىڭ فينليانديادان قۇتىلعانىن ايتادى.
جازىقسىزداردى جارعاندا نە ۇتتى؟
نيگەريانىڭ استاناسى ابۋدجا قالاسىنداعى بۇۇ عيماراتىنىڭ الدىندا جويقىن جارىلىس بولدى. الدىن الا بولجامدارعا قاراعاندا, بومبا جارىلعان دەلىنىپ وتىر. ازىرگە ادام شىعىنى مەن كەلتىرىلگەن زالال تۋرالى اقپارات جوق.
افريكانىڭ وسى مەملەكەتىن سوڭعى ۋاقىتتاردا تەرروريستەر وزدەرىنىڭ قىرىنا قاتتى الىپ وتىر. ۇستىمىزدەگى جىلعى ماۋسىم ايىنىڭ باسىندا پوليتسيا عيماراتى تۇراتىن اۋدانعا شابۋىل جاسالدى. وندا 5 ادام ءولىپ, 10 ادام جاراقات العان ەدى. ال ماۋسىمنىڭ اياعىندا حالىقتىڭ سىرا ءىشىپ وتىرعان الاڭىنا موتوتسيكلمەن كەلگەن قاراقشىلار جارىلعىش زات لاقتىرعان بولاتىن. بۇل جولى 25 ادام ءولىپ, 20 شاقتىسى جارالاندى.
قىسقا قايىرىپ ايتقاندا:
* ماسكەۋدىڭ سولتۇستىك-باتىس وكرۋگىنىڭ ءىىب الدىندا بالاما كۇشى 150 گرامدىق تروتيلگە تەڭ جارىلىس بولدى. بەلگىسىز جان جارىلعىش زاتتى لاقتىرىپ جىبەرىپ, زىتىپ وتىرعان. عيماراتقا زاقىم كەلگەنى بولماسا, ەشكىم زارداپ شەكپەپتى.
* گرەكيا وكىمەتى بانكتەردى بانكروتتىقتان قۇتقارۋ ءۇشىن بەرگەن قاراجاتتارىنىڭ قۇمعا سىڭگەن سۋداي بولىپ كەتكەنىنە قايران قالىپ وتىر. ەلدەگى دەفولت پەن سالىقتان جالتارعان بانكيرلەر قارجىنى شەتەلگە اۋدارىپ جىبەرىپتى.
* تۇرىكتىڭ انتاليا قالاسىنىڭ ورتالىعىنداعى جاعاجايلاردىڭ بىرىندە جارىلىس بولىپ, ودان دەمالۋشىلار قاتتى قورقىپ, كەيبىرى ەسىنەن تانىپ قالعان. بىراق ادام شىعىنى جوق.
ينتەرنەت ماتەريالدارى نەگىزىندە ازىرلەندى.