قازاقستان رەسپۋبليكاسىنىڭ تۇڭعىش پرەزيدەنتىنىڭ قورىندا كوپ بالالى جانە از قامتاماسىز ەتىلگەن وتباسىلارعا قولداۋ كورسەتۋ ماقساتىندا ءبىلىم كۇنىنە ارنالعان شارا بولىپ ءوتتى.
«مەكتەپكە جول» دەگەن اتپەن رەسپۋبليكا كولەمىندە وتكىزىلىپ وتىرعان بۇل شارا, ەلباسىنىڭ بولاشاق ءبىلىمدار ۇرپاق تاربيەسىنە كوڭىل اۋدارۋ تۋرالى بەرىلگەن تاپسىرماسىن جۇزەگە اسىرۋ نيەتىمەن باستالعان ەدى. اي باسىنان بەرى ەلىمىز بويىنشا ەكى مىڭنان استام بالا مەكتەپكە كيەتىن كيىم-كەشەكپەن قاتار, سومكە, قالام-قاعاز سەكىلدى وقۋشى قۇرالدارىن سىيعا الىپ ۇلگەردى. ەل قازانى مەن كاسىپكەر ازاماتتاردىڭ قولداۋ كورسەتۋى ناتيجەسىندە بيىل 63 ميلليون تەڭگە وسى شاراعا ءبولىنىپ وتىر.
«1 قىركۇيەك كۇنى ءاربىر بالا ءجۇزى بالبۇل جايناپ مەكتەپكە بارعىسى كەلەدى. ول كۇن – مەرەكە, ول كۇن – قۋانىش. الايدا, بالالىقتىڭ بالىن تاتۋ بارلىق بالانىڭ باعى بولماي تۇر. بەيبىت ەلدىڭ بالالارى ءبىلىم الۋدان شەت قالماسىن دەگەن نيەتپەن تۇڭعىش پرەزيدەنتتىڭ قورى وسىنداي شارانى اۋقىمدىراق وتكىزىپ وتىر» دەدى, قور ديرەكتورىنىڭ مىندەتىن اتقارۋشى ب.مۇحامەدجانوۆ.
بۇل كۇنى جۇزدەن استام بالا سىي-سياپات كورىپ, مەكتەپ تابالدىرىعىن العاش اتتاعالى وتىرعان بۇلدىرشىندەر تۇڭعىش پرەزيدەنت قورىنىڭ بەلگىسى بەينەلەنگەن ارنايى سىيلىقتارمەن ماراپاتتالدى. بالالار شىعارماشىلىق ۇجىمدار ۇيىمداستىرعان كونتسەرتتىك باعدارلامانى تاماشالادى. ەرەسەكتەرى وتانىمىزدىڭ دامۋ كەزەڭىن پاش ەتەتىن ەلەكتروندى ەكسكۋرسياعا قاتىستى. شارا الماتى قالالىق بالالاردىڭ قۇقىعىن قورعاۋ دەپارتامەنتىمەن بىرلەسىپ وتكىزىلىپ وتىر.
قانات ەسكەندىر, الماتى.