قازاقستان رەسپۋبليكاسى ىشكى ىستەر ءمينيسترىنىڭ 2011 جىلعى 23 مامىرداعى № 232 بۇيرىعىمەن بەكىتىلگەن
ىشكى ىستەر ورگاندارى ارنايى قابىلداۋ ورىندارىنىڭ قىزمەتىن ۇيىمداستىرۋ ەرەجەسى
1. جالپى ەرەجەلەر 1. وسى ىشكى ىستەر ورگاندارى ارنايى قابىلداۋ ورىندارىنىڭ قىزمەتىن ۇيىمداستىرۋ ەرەجەسى (بۇدان ءارى – ەرەجە) «قوعامنان ۋاقىتشا وقشاۋلاۋدى قامتاماسىز ەتەتىن ارناۋلى مەكەمەلەردە ادامداردى ۇستاۋ ءتارتىبى مەن شارتتارى تۋرالى» قازاقستان رەسپۋبليكاسى زاڭىنىڭ (بۇدان ءارى – زاڭ) 9-1-بابىنا سايكەس ازىرلەندى جانە ۇستاۋ رەجيمىن قامتاماسىز ەتۋ ماقساتىندا ىشكى ىستەر ورگاندارىنىڭ ارنايى قابىلداۋ ورىندارى قىزمەتىنىڭ ءتارتىبىن جانە ونى ۇيىمداستىرۋدى رەتتەيدى. 2. ارنايى قابىلداۋ ورنى – اكىمشىلىك قاماۋعا الىنعان ادامداردى قابىلداۋعا جانە ۇستاۋعا ارنالعان ىشكى ىستەر ورگاندارىنىڭ ارنايى مەكەمەسى. 3. اكىمشىلىك قاماۋعا الىنعان ادامداردى ارنايى قابىلداۋ ورىندارىنا ورنالاستىرۋ ولاردى قاماۋعا الۋ تۋرالى سۋديا قاۋلىسىنىڭ نەگىزىندە جۇزەگە اسىرىلادى. 4. ارنايى قابىلداۋ ورىندارىندا تاۋلىكتىك كەزەكشىلىكتى قامتاماسىز ەتەتىن جانە ۇستالاتىن ادامداردىڭ ءوز ەركىمەن مەكەمەدەن تىس جەرگە كەتۋىن بولدىرمايتىن رەجيم ورناتىلادى. ارنايى قابىلداۋ ورىندارىندا رەجيمدى قامتاماسىز ەتۋ ارنايى قابىلداۋ ورنىنىڭ اكىمشىلىگى مەن قىزمەتكەرلەرىنە جۇكتەلەدى. 5. ارنايى قابىلداۋ ورىندارىندا ۇستالاتىن ادامداردى كۇزەتۋ بويىنشا قىزمەت وتكەرۋ ءۇشىن ناريادقا تاعايىندالاتىن قىزمەتكەرلەرگە قارۋ بەرىلمەيدى. ارنايى قابىلداۋ ورىنىنان قاشقان ادامدى ۇستاۋ كەزىندە «قۇقىق قورعاۋ قىزمەتى تۋرالى» قازاقستان رەسپۋبليكاسىنىڭ زاڭىنا سايكەس قارۋ قولدانىلمايدى. ارنايى قابىلداۋ ورنىنا ورنالاستىرىلعان ادامدارعا «قۇقىق قورعاۋ قىزمەتى تۋرالى» قازاقستان رەسپۋبليكاسىنىڭ زاڭىنا سايكەس كۇش پەن ارنايى قۇرالدار قولدانىلۋى مۇمكىن. 6. ارنايى قابىلداۋ ورنىنىڭ اكىمشىلىگى اكىمشىلىك قاماۋعا الىنعان ادامدارمەن پروفيلاكتيكالىق اڭگىمەلەسۋلەر وتكىزەدى, ونىڭ بارىسىندا قوعامعا قارسى مىنەز-ق ۇلىقتى توقتاتۋ قاجەتتىلىگىن ءتۇسىندىرىپ, قازاقستان رەسپۋبليكاسىنىڭ «اكىمشىلىك قۇقىق بۇزۋشىلىق تۋرالى» كودەكسىمەن تانىستىرادى. 7. اكىمشىلىك قاماۋعا الىنعان ادامداردى ارنايى قابىلداۋ ورىنا قاماۋعا الۋ نەمەسە ولاردى ءتيىستى مەديتسينالىق ۇيىمدارعا جىبەرۋ تۋرالى ارنايى قابىلداۋ ورنىنىڭ اكىمشىلىگى ءبىر تاۋلىك ىشىندە تۇرعىلىقتى جەرى بويىنشا ولاردىڭ جاقىن تۋىستارىنا حابارلايدى. 8. ارنايى قابىلداۋ ورىندارىندا مەديتسينا قىزمەتكەرلەرى ولاردا ۇستالاتىن ادامدارعا مەديتسينالىق كومەك كورسەتۋدى, مەملەكەتتىك سانيتارلىق-ەپيدەميولوگيالىق نورمالار مەن ەرەجەلەردىڭ ورىندالۋىن باقىلاۋدى ۇيىمداستىرادى جانە جۇزەگە اسىرادى. ەمدەۋ-پروفيلاكتيكالىق جانە سانيتارلىق-ەپيدەمياعا قارسى جۇمىس ماسەلەلەرى بويىنشا ارنايى قابىلداۋ ورىندارىنىڭ قىزمەتىن ادىستەمەلىك قامتاماسىز ەتۋدى قازاقستان رەسپۋبليكاسى ىشكى ىستەر مينيسترلىگىنىڭ تىل دەپارتامەنتى, استانا, الماتى قالالارىنىڭ, وبلىستارداعى ىشكى ىستەر دەپارتامەنتتەرىنىڭ مەديتسينا قىزمەتتەرى جانە دەنساۋلىق ساقتاۋ سالاسىنداعى ۋاكىلەتتى ورگان جۇزەگە اسىرادى. اكىمشىلىك قاماۋعا الىنعان ادامنىڭ مەديتسينالىق ۇيىمدارعا ورنالاستىرىلعانى تۋرالى ارنايى قابىلداۋ ورنىنىڭ اكىمشىلىگى پروكۋرور مەن سۋدياعا حابارلايدى. ەگەر سۋديانىڭ وزگە شەشىمى شىعارىلماسا, ساۋىقاننان كەيىن بۇل ادامدار اكىمشىلىك قاماۋدى ودان ءارى وتەۋ ءۇشىن ارنايى قابىلداۋ ورنىنا قاماۋعا الىنادى. ادامنىڭ قاماۋعا الىنۋىن باقىلاۋ ارنايى قابىلداۋ ورنىنىڭ باستىعىنا جۇكتەلەدى. 9. ارنايى قابىلداۋ ورىندارىن پايدالانۋ اكىمشىلىك قاماۋعا الىنعان ادامداردى قاۋىپسىز ۇستاۋ ءۇشىن جارامدى, سانيتارلىق-گيگيەنالىق نورمالار مەن ءورت قاۋىپسىزدىگى تالاپتارىنا جاۋاپ بەرەتىن ءۇي-جايلار بولعان جاعدايدا عانا رۇقسات ەتىلەدى. 10. ارنايى قابىلداۋ ورىندارىنىڭ قىزمەتى توقسانعا قۇراستىرىلاتىن جانە ىشكى ىستەر دەپارتامەنتى باستىعىنىڭ جەتەكشىلىك ەتەتىن ورىنباسارى بەكىتەتىن جوسپار بويىنشا قۇرىلادى. ارنايى قابىلداۋ ورىندارىنىڭ قىزمەتىن ۇيىمداستىرۋ ارنايى قابىلداۋ ورنىنىڭ باستىعىنا جۇكتەلەدى. 11. ارنايى قابىلداۋ ورنىنىڭ باستىعى: 1) بولىنىسكە جۇكتەلگەن مىندەتتەردى ورىنداۋدى قامتاماسىز ەتەدى جانە ونىڭ قىزمەتىن جەتىلدىرۋ بويىنشا شارالار قابىلدايدى; 2) قاراماعىنداعى قىزمەتكەرلەر مەن جۇمىسشىلاردى ىرىكتەۋ, ورنالاستىرۋ جونىندەگى جۇمىستى ۇيىمداستىرادى; 3) قىزمەتكەرلەردىڭ قىزمەتتىك جۇمىسىن باقىلاۋدى جۇزەگە اسىرادى جانە ارنايى قابىلداۋ ورنىنىڭ قىزمەتىندە زاڭدىلىقتى قامتاماسىز ەتۋ بويىنشا شارالار قابىلدايدى; 4) ءوزىنىڭ قىزمەتكەرلەرى مەن ارنايى قابىلداۋ ورنى جۇمىسكەرلەرىنىڭ لاۋازىمدىق مىندەتتەرىن ازىرلەيدى جانە ولاردى ىشكى ىستەر ورگانى باستىعىندا بەكىتەدى; 5) ارنايى قابىلداۋ ورنىنىڭ قىزمەتكەرلەرىمەن تاربيە جۇمىسىن, قىزمەتتىك, جاۋىنگەرلىك جانە دەنە شىنىقتىرۋ دايىندىعىن ۇيىمداستىرادى جانە وتكىزەدى; 6) اكىمشىلىك قاماۋعا الىنعان ادامداردى بەلگىلەنگەن نورمالارعا سايكەس ءۇش رەتتىك تاماقپەن جىل سايىن قامتاماسىز ەتەدى; 7) اكىمشىلىك قاماۋعا الىنعان ادامدار جازا مەرزىمىن وتكەرگەن سوڭ ولاردى جۇمىس, وقۋ ورنى بويىنشا, الەۋمەتتىك قامتاماسىز ەتۋ ورگانىنا جىبەرۋدى قامتاماسىز ەتەدى; 8) قارجىلاندىرۋ جوسپارلارىن, ارنايى قابىلداۋ ورنىن ۇستاۋعا ارنالعان سمەتانى ازىرلەيدى, ونى قاجەتتى قۇرال-جابدىقپەن, مۇكاممالمەن جانە اۆتوكولىكپەن قامتاماسىز ەتۋ بويىنشا شارالار قابىلدايدى, ءۇي-جايلاردى جوندەۋ جانە ولاردا ءتارتىپتى ۇستاۋ بويىنشا شارالار قابىلدايدى; 9) ارنايى قابىلداۋ ورنىنىڭ قىزمەتكەرلەرى مەن جۇمىسكەرلەرىنىڭ الەۋمەتتىك-تۇرمىستىق جاعدايلارىن جاقسارتۋ بويىنشا شارالار قابىلدايدى; 10) ارنايى قابىلداۋ ورنىنىڭ ءۇي-جايلارىنداعى سانيتارلىق جاعدايدى, ورنالاستىرىلعان ادامدار مەن توسەك-ورىندى سانيتارلىق وڭدەۋدەن ۋاقتىلى وتكىزۋدى باقىلاۋدى قامتاماسىز ەتەدى; 11) ۇستالاتىن ادامداردىڭ حاتتارى مەن وتىنىشتەرىن, ارنايى قابىلداۋ ورنىنىڭ قىزمەتكەرلەرى مەن جۇمىسكەرلەرىنىڭ ءىس-ارەكەتىنە شاعىمداردى قابىلدايدى جانە بەلگىلەنگەن مەرزىمدە قارايدى, تيەسىلىگى بويىنشا جولدايدى; 12) ىشكى ىستەر دەپارتامەنتىنىڭ باستىعىنا ارنايى قابىلداۋ ورنىنىڭ قىزمەتكەرلەرى مەن جۇمىسكەرلەرىن لاۋازىمعا تاعايىنداۋ, جىلجىتۋ جانە لاۋازىمنان بوساتۋ, سونداي-اق ولاردى كوتەرمەلەۋ جانە تارتىپتىك جازاعا تارتۋ تۋرالى ۇسىنىستار ەنگىزەدى, ارنايى قابىلداۋ ورنىنىڭ قىزمەتكەرلەرىنە ارناۋلى اتاقتار بەرۋ تۋرالى ۇسىنىمحاتتار جولدايدى; 13) ماتەريالدىق باعالى زاتتاردىڭ ساقتالۋىنا جانە ارنايى قابىلداۋ ورنىنداعى ءىس جۇرگىزۋگە جاۋاپ بەرەدى; 14) ارنايى قابىلداۋ ورنىنىڭ قىزمەتىندە قۇپيالىلىق رەجيمنىڭ ساقتالۋىن قامتاماسىز ەتەدى; 15) ارنايى قابىلداۋ ورنىنىڭ قىزمەتكەرلەرى مەن جۇمىسكەرلەرىنە دەمالىستار بەرەدى. 12. ارنايى قابىلداۋ ورنى باستىعىنىڭ ورىنباسارى اكىمشىلىك قاماۋعا الىنعان ادامداردى ۇستاۋ رەجيمىن باقىلاۋدى جۇزەگە اسىرادى, ولاردىڭ اراسىندا ىزدەستىرۋدە جۇرگەن ادامداردى انىقتاۋ جانە ولار جاساعان قىلمىستاردى اشۋ جونىندەگى ءىس-شارالاردى ۇيىمداستىرادى. ارنايى قابىلداۋ ورىندارىندا ۇستالاتىن ادامداردىڭ اراسىندا جەدەل-ىزدەستىرۋ جۇمىسىن جۇرگىزۋ «جەدەل-ىزدەستىرۋ قىزمەتى تۋرالى» قازاقستان رەسپۋبليكاسىنىڭ زاڭىنا سايكەس جۇزەگە اسىرىلادى. باستىق بولماعان كەزدە ونىڭ فۋنكتسيالارىن اتقارادى. 13. ارنايى قابىلداۋ ورنى بويىنشا كەزەكشى ارنايى قابىلداۋ ورنىنىڭ باستىعىنا جانە ونىڭ ورىنباسارىنا باعىنادى, ولار بولماعان كەزدە ارنايى قابىلداۋ ورنىنىڭ جۇمىسىنا باسشىلىق ەتەدى. كەزەكشى: 1) اكىمشىلىك قاماۋدى وتكەرۋ ءۇشىن ارنايى قابىلداۋ ورنىنا جەتكىزىلگەن ادامداردى تىركەيدى جانە ەسەپكە الادى; 2) ولاردى جەكە تەكسەرۋدى, سۋرەتكە ءتۇسىرۋدى جانە داكتيلوسكوپيالاۋدى جۇرگىزەدى; 3) كامەرالار بويىنشا بولەدى, ولاردىڭ ىشىنەن كامەرا بويىنشا كەزەكشىلەردى تاعايىندايدى; 4) ارنايى قابىلداۋ ورنىندا ۇستالاتىن ادامدارعا تيەسىلى زاتتاردىڭ, قۇجاتتاردىڭ, اقشا مەن باعالى زاتتاردىڭ ساقتالۋىن قامتاماسىز ەتەدى جانە بوساعان كەزدە ولاردى قايتارادى; 5) ارنايى قابىلداۋ ورنىنىڭ باستىعىنا نەمەسە ونىڭ ورىنباسارىنا جەتكىزىلگەن جانە ورنالاستىرىلعان بارلىق ادامدار تۋرالى باياندايدى; 6) ارنايى قابىلداۋ ورنىندا ۇستالاتىن ادامداردى مەديتسينالىق تەكسەرۋدى, سانيتارلىق وڭدەۋدى ۋاقتىلى قامتاماسىز ەتەدى, ولاردى تاماقتاندىرۋدى جانە سەرۋەندەۋگە شىعارۋدى ۇيىمداستىرادى; 7) ارنايى قابىلداۋ ورنىندا ۇستالاتىن ادامداردىڭ بارلىق شاعىمدارى مەن وتىنىشتەرى تۋرالى ارنايى قابىلداۋ ورنىنىڭ باستىعىنا ۋاقتىلى باياندايدى. شاعىمدار, ۇسىنىستار مەن حاتتار جازۋ ءۇشىن ورنالاستىرىلعان ادامدارعا جازۋ قۇرالدارىن بەرەدى; 8) ورنالاستىرىلعان ادامداردىڭ ىشكى ءتارتىپ ەرەجەسىن قاتاڭ ساقتاۋىن باقىلايدى, بەكەت ناريادىنىڭ قىزمەت وتكەرۋىن ۇدايى باقىلاۋدى جۇزەگە اسىرادى, ورنالاستىرىلعان ادامداردىڭ دەنساۋلىعى ناشارلاعان جاعدايدا مەديتسينا قىزمەتكەرىنە حابارلايدى, ال ول بولماعان جاعدايدا, جەدەل جاردەم شاقىرادى جانە شۇعىل مەديتسينالىق كومەك كورسەتەدى; 9) سيگناليزاتسيا, بايلانىس قۇرالدارى مەن بەكەت كەرەك-جاراقتارىنىڭ اقاۋسىز بولۋىن باقىلايدى; 10) اكىمشىلىك قاماۋعا الىنعان ادامدار بوساتىلعان كەزدە بەلگىلەنگەن ۇلگىدەگى انىقتامالار بەرەدى جانە ولاردىڭ قۇقىق بۇزۋشىلىقتارعا جول بەرمەۋىنە باعىتتالعان قىسقاشا پروفيلاكتيكالىق اڭگىمەلەسۋ جۇرگىزەدى; 11) مىناداي قۇجاتتاردى: ارنايى قابىلداۋ ورنىندا ۇستالاتىن ادامداردى ەسەپكە الۋ جۋرنالىن; نارياد قىزمەتتەرىنىڭ كىتابىن; تەلەفونوگراممالار كىتابىن; كەزەكشىلىكتى قابىلداۋ جانە تاپسىرۋ كىتاپتارىن; شاعىمدار مەن ۇسىنىستار كىتابىن; تەكسەرۋشىلەردىڭ ەسكەرتۋلەرىن جازۋ جۋرنالىن; ارنايى قابىلداۋ ورنىنىڭ جۇمىسشىلارى ۇيلەرىنىڭ مەكەنجايلارى مەن تەلەفوندارىنىڭ ءتىزىمىن; ەلدى مەكەندە ورنالاسقان ىشكى ىستەر ورگانى تەلەفوندارىنىڭ ءتىزىمىن جۇرگىزەدى جانە ساقتايدى. 14. ارنايى ءبولىمنىڭ ينسپەكتورى: 1) اكىمشىلىك قاماۋعا الىنعان ادامداردىڭ ىستەرىن جۇرگىزەدى, جازالاۋ مەرزىمىن وتكەرگەن سوڭ ولاردىڭ ۋاقتىلى بوساتىلۋىن باقىلايدى; 2) تولىقتىرۋ ءليميتى ۇلكەن ارنايى قابىلداۋ ورىندارىندا ەسەپتىك جانە الفاۆيتتىك كارتوتەكا جۇرگىزەدى. 15. بولىمشە كومانديرى بولىمشە جەكە قۇرامىنىڭ تىكەلەي باستىعى بولىپ تابىلادى جانە قاراماعىنداعىلاردىڭ تاربيەسى مەن وقۋى, ءتارتىبى, ساپتىق جيناقىلىق پەن جيناقى سىرتقى كەلبەتى ءۇشىن جاۋاپ بەرەدى. بولىمشە كومانديرى: 1) بولىمشەنىڭ پوليتسيا قىزمەتكەرلەرىن وقىتادى جانە تاربيەلەيدى; 2) ولاردان قىزمەتتىك پارىزىن ادال ورىنداۋدى, زاڭدىلىقتى قاتاڭ ساقتاۋدى تالاپ ەتەدى; 3) قىزمەتكە تۇسەتىن پوليتسيا قىزمەتكەرلەرىنە نۇسقاما جۇرگىزەدى; 4) بولىمشە پوليتسيا قىزمەتكەرلەرىنىڭ ەسەبىن جۇرگىزەدى جانە كۇن سايىن ولاردىڭ قىزمەتىنىڭ قورىتىندىسىن شىعارادى. 16. باقىلاۋ-وتكىزۋ پۋنكتى (بۇدان ءارى – ءبوپ) بويىنشا كەزەكشى-پوليتسەي ارنايى قابىلداۋ ورنى بويىنشا كەزەكشىگە جانە بولىمشە كومانديرىنە باعىنادى. كەزەكشى-پوليتسەي: 1) ارنايى قابىلداۋ ورنىندا وتكىزۋ رەجيمىن جۇزەگە اسىرادى, اكىمشىلىك قاماۋعا الىنعان ادامداردىڭ اۋماقتان ءوز ەركىمەن شىعۋىنا جانە بوتەن ادامداردىڭ كىرۋىنە جول بەرمەيدى; 2) بوساتىلعان ازاماتتاردى بەلگىلەنگەن ۇلگىدەگى انىقتامالار بويىنشا ءبوپ ارقىلى وتكىزەدى; 3) ءبوپ ارقىلى وتەتىن كولىكتى تەكسەرەدى, ارنايى قابىلداۋ ورنىنا تىيىم سالىنعان بۇيىمداردى وتكىزۋگە جول بەرمەيدى. 17. اكىمشىلىك قاماۋعا الىنعان ادامداردى كۇزەتۋ جونىندەگى ارنايى قابىلداۋ ورنىنىڭ پوليتسەيى ارنايى قابىلداۋ ورنى بويىنشا كەزەكشىگە جانە بولىمشە كومانديرىنە باعىنادى. پوليتسەيى: 1) بەكەتكە تۇسكەن كەزدە ارنايى قابىلداۋ ورنىنىڭ ءۇي-جايلارىندا ۇستالاتىن اكىمشىلىك قاماۋعا الىنعان ادامداردى قابىلدايدى; 2) ارنايى قابىلداۋ ورنىندا ۇستالاتىن ادامداردى تەكسەرەدى; 3) ۇستالاتىن ادامداردىڭ مىنەز-قۇلقىن ۇدايى باقىلايدى, قايتىس بولۋ, وزىنە ءوزى قول جۇمساۋ جانە دەنەگە زاقىم كەلتىرۋ وقيعالارىن ەسكەرتۋ بويىنشا شارالار قابىلدايدى; 4) ارنايى قابىلداۋ ورنىنا ورنالاستىرىلعان ادامداردىڭ ىشكى ءتارتىپ ەرەجەسىن ساقتاۋىن قامتاماسىز ەتەدى; 5) كەزەكشىمەن بىرگە ورنالاستىرىلعان ادامداردى كۇن سايىن سەرۋەندەۋگە شىعارادى, ولارعا ۆەدوموست بويىنشا تاماق بەرەدى; 6) كۇن سايىن كامەرالاردىڭ جاي-كۇيىن, ولاردىڭ جارامدىلىعىن تەكسەرەدى جانە بايقالعان اقاۋلار تۋرالى قابىلداۋ-تاراتۋ ورنىنىڭ باسشىلىعىنا باياندايدى, ولاردى جويۋ بويىنشا شارالار قابىلدايدى; 7) سيگناليزاتسيا مەن بايلانىستىڭ اقاۋسىز بولۋىن تەكسەرەدى; 8) اكىمشىلىك قاماۋعا الىنعان ادام سىرقاتتانعان جاعدايدا, بۇل تۋرالى مەديتسينا قىزمەتكەرىنە جانە ارنايى قابىلداۋ ورنى بويىنشا كەزەكشىگە حابارلايدى. 2. ارنايى قابىلداۋ ورىندارىن قۇرۋ 18. ىشكى ىستەر ورگاندارىنىڭ ارنايى قابىلداۋ ورىندارى جەرگىلىكتى اتقارۋشى ورگانداردىڭ شەشىمىمەن قۇرىلادى, قايتا ۇيىمداستىرىلادى جانە تاراتىلادى. 19. ارنايى قابىلداۋ ورىندارىن قارجىلاندىرۋ بيۋدجەت قاراجاتى ەسەبىنەن جۇزەگە اسىرىلادى. 3. ارنايى قابىلداۋ ورىندارىنىڭ ءۇي-جايلارى 20. ارنايى قابىلداۋ ورىندارىندا: 1) ەرلەر, ايەلدەر جانە بالالارى بار ايەلدەر, شەتەلدىكتەر جانە ازاماتتىعى جوق ادامدار ءۇشىن, سانيتارلىق تازالاۋدان وتپەگەن جاڭادان تۇسكەندەر, ناۋقاستار ءۇشىن جەكە كامەرالار; 2) ارنايى قابىلداۋ ورنىنىڭ اكىمشىلىگى مەن قىزمەتكەرلەرى ءۇشىن كابينەتتەر; 3) ەلەكتر پليتاسى, سۋ قايناتقىشى, شكافى, ىدىس جۋعا ارنالعان ءۇش بولىكتەن تۇراتىن ۆانناسى (سىيىمدىلىق) بار تاماق جىلىتۋعا ارنالعان بولمە; 4) توسەك-ورىن ساقتاۋعا ارنالعان بولمە; 5) جەكە زاتتاردى ساقتاۋعا ارنالعان بولمە; 6) سانيتارلىق وتكىزگىش, جۋىناتىن بولمەلەر, دەزينفەكتسيالاۋ كامەراسى; 7) كىر جۋاتىن بولمە, سانيتارلىق توراپتار كوزدەلۋى ءتيىس. 21. ارنايى قابىلداۋ ورىندارىنىڭ ىشكى قورشالعان سەرۋەندەۋ الاڭدارى, بولۋى كەرەك, ولار ساكىلەرمەن, ۋرنالارمەن جانە دارەتحانالارمەن جابدىقتالادى. 22. تولىقتىرۋ ءليميتى 50 جانە ودان دا كوپ ورىندارى بار ارنايى قابىلداۋ ورىندارىندا وتكىزۋ رەجيمىن قامتاماسىز ەتۋ ءۇشىن باقىلاۋ-وتكىزۋ بەكەتتەرى جابدىقتالادى. بۇيرىق قازاقستان رەسپۋبليكاسىنىڭ ادىلەت مينيسترلىگىندە 2011 جىلعى 22 ماۋسىمدا نورماتيۆتىك قۇقىقتىق كەسىمدەردى مەملەكەتتىك تىركەۋدىڭ تىزىلىمىنە №7030 بولىپ ەنگىزىلدى.