قازاقستان رەسپۋبليكاسى پارلامەنتى ءماجىلىسىنىڭ ءتوراعاسى, «نۇر وتان» حدپ دەپۋتاتتىق فراكتسياسىنىڭ جەتەكشىسى ورال مۇحامەدجانوۆ اقمولا وبلىسىنا جۇمىس ساپارى بارىسىندا كوكشەتاۋ قالاسىنىڭ تۇرعىندارىن جەكە ماسەلەلەرى بويىنشا قابىلدادى.
ءبىرىنشى كەزەك «ميراس-كوكشە» قايىرىمدىلىق قورىنىڭ پرەزيدەنتى نىعمەت ەرحان ۇلىنا ءتيدى. ونىڭ ايتۋىنشا, جالعىزباستى جاس انالاردى الەۋمەتتىك قورعاۋ جانە وڭالتۋ ماسەلەلەرىمەن اينالىساتىن قوردىڭ جۇمىسىن دامىتۋ, ونىڭ رەسپۋبليكامىزدىڭ وزگە ءوڭىرلەرىندەگى وكىلدىكتەرىنە ۇيىمداستىرۋ تۇرعىسىندا كومەك كورسەتۋ قاجەتتىلىگى تۋىنداپ وتىر.
ورال بايعونىس ۇلى مۇنداي قوردىڭ ەكونوميكالىق ماقساتتا عانا ەمەس, الەۋمەتتىك-پسيحولوگيالىق باعىتتا دا پايدالى ەكەندىگىن اتاپ ءوتتى. قوعامدا وسى سيپاتتاعى پروبلەما ءجيى كورىنىس بەرۋدە, پەرزەنتحانالارداعى تاستاندى ءسابيلەر سانى ءوسىپ وتىرعاندىعى جاسىرىن ەمەس. وسىناۋ وزەكتى ىسپەن قوعامدىق نەگىزدە اينالىسۋشى كەڭ جۇرەكتى ازاماتتاردىڭ باستاماسى قولداۋعا تۇرارلىق. پارلامەنت ءماجىلىسىنىڭ توراعاسى وبلىستىق ىشكى ساياسات باسقارماسىنا «ميراس-كوكشەگە» قاجەتتى قولداۋ كورسەتۋدى تاپسىردى.
ايگەرىم ساعىندىقوۆا بيىل ءوزى ارمانداعان ش.ءۋاليحانوۆ اتىنداعى مەملەكەتتىك ۋنيۆەرسيتەتتىڭ «قولدانبالى ونەر جانە سىزۋ» فاكۋلتەتىنە تۇسكەنىمەن, گرانتقا ىلىنبەي قالىپتى. ءايگەرىم تۇرمىس جاعدايىنىڭ اۋىرلىعىن ايتا كەلىپ, قارجىلاي كومەكتىڭ قانداي ءمۇمكىندىكتەرى بارلىعىن سۇرادى.
– ۇمىتكەرلەردىڭ بارلىعى گرانت ءۇشىن كۇرەسۋى قاجەت, – دەدى ءماجىلىس سپيكەرى. ول ساپالى ءبىلىم جولىنداعى ءباسەكەلەستىكتى كۇشەيتەدى. ايتكەنمەن, مەملەكەت دارىندى نەمەسە الەۋمەتتىك قولداۋعا مۇقتاج مەكتەپ بىتىرۋشىلەرىن نازاردان تىس قالدىرمايدى. ءسىزدىڭ ءوتىنىشىڭىز وسىندا قاتىسىپ وتىرعان ۋنيۆەرسيتەت باسشىسىنىڭ قاراۋىنا بەرىلەدى. ماسەلە وڭ شەشىمىن تابادى دەگەن ويدامىن.
كوكشەتاۋ مەملەكەتتىك ۋنيۆەرسيتەتىنىڭ رەكتورى نايمان قالاباەۆ وقۋ ورنىنىڭ قورىنان ءا.ساعىندىقوۆاعا ءبىر جىلدىق گرانت تاعايىندالاتىنىن حابارلادى. سونداي-اق, ول ستۋدەنت جاقسى ۇلگىرگەن جاعدايدا گرانت مەرزىمى ۇزارتىلاتىنىن ايتتى.
ءىىم ارداگەرى ۆيتالي مامەدباكوۆ قۇقىق قورعاۋ ورگاندارىنداعى قىزمەتىن 1998 جىلدان كەيىن باستاعان كىسىلەرگە زەينەتاقى تاعايىنداۋ ءتارتىبىن قايتا قاراۋ تۋرالى ماسەلە كوتەردى. ازاماتتاردىڭ بۇل ساناتى 45 جاستا زەينەت دەمالىسىنا شىققانىمەن, زەينەتاقىنى 63-كە تولعان كۇننەن باستاپ الاتىنى تۇسىنىكسىز. وسى ەكى ارالىقتا ولار زەينەتاقى جيناقتاۋ قورىنداعى قارجىنى ءناپاقا قىلاتىن كورىنەدى.
ورال مۇحامەدجانوۆ سۇراقتىڭ تۋىنداۋى نەگىزسىز ەمەستىگىن كولدەنەڭ تارتىپ, ول مۇقيات زەرتتەلىپ, تالدانۋعا تيىستىگىن اتادى. جازباشا تۇردەگى ارىز رەسپۋبليكالىق دەڭگەيدەگى ءتيىستى ورىندارعا تاپسىرىلىپ, ارنايى باقىلاۋعا الىناتىن بولدى.
قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى الەكساندر بويكو بۋرابايداعى «ادرەنالين باعى» جوباسىنا قولداۋ كورسەتۋ ماسەلەسىن ورتاعا سالدى. قابىلداۋ جۇرگىزۋشى تۋريستىك كلاستەردى دامىتۋ, سالاماتتى ءومىر سالتىن قالىپتاستىرۋ, ازاماتتاردىڭ بەلسەندى دەمالىسىن ۇيىمداستىرۋ قازاقستانداعى مەملەكەتتىك ساياساتتىڭ باسىم باعىتتارى قاتارىندا ەكەندىگىن ەسكە سالدى. بۇل ورايدا ششۋچە-بۋراباي كۋرورتتى ايماعىنا ەرەكشە ماڭىز ارتىلادى. مۇنداي باق بارشامىزعا قاجەت. ونىڭ ۇستىنە ا.بويكونىڭ قولىندا «بيزنەستىڭ جول كارتاسى-2020» باعدارلاماسى شەڭبەرىندە جان-جاقتى زەرتتەلگەن بيزنەس-جوسپار دا بار. اقمولا وبلىسىنىڭ اكىمدىگى, وبلىستىق تۋريزم, دەنە شىنىقتىرۋ جانە سپورت باسقارماسى, جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسى مۇنداي جوبالاردى قولداپ, قوزعالىسقا ءتۇسىرۋى ءتيىس. سپورت ارداگەرىنىڭ حاتى ءتيىستى ورتالىق ورگاندارعا, ونىڭ ىشىندە تۋريزم جانە سپورت مينيسترلىگىنە تابىس ەتىلەتىن بولدى.
«اتامەكەن» وداعى ۇلتتىق ەكونوميكالىق پالاتاسى وكىلدىگىنىڭ ديرەكتورى نارتاي ىسقاقوۆ اۋىلدىق ەلدى مەكەندەردى دامىتۋ تاقىرىبىن العا تارتتى.
پارلامەنت ءماجىلىسىنىڭ ءتوراعاسى و.مۇحامەدجانوۆ اۋىل – التىن بەسىك ەكەندىگىن ەل بولاشاعىمەن بايلانىستىردى. اۋىلداعى الەۋمەتتىك ينفراقۇرىلىمدى نىعايتۋعا قوسىمشا قارجى ءبولۋ, مال شارۋاشىلىعىن دامىتۋدىڭ «سىباعا» باعدارلاماسىن جالعاستىرۋ جونىندەگى ۇسىنىس قولداۋعا تۇرارلىق. مۇنىمەن قۇزىرلى ورگاندار اينالىسادى.
«نۇر وتان» پارتياسىنىڭ بەلسەندىسى زەرە قيىقوۆانىڭ «زەينەتاقىمەن قامتاماسىز ەتۋ تۋرالى» زاڭعا وزگەرتۋلەر مەن قوسىمشالار ەنگىزۋ تۋرالى ۇسىنىسىنا قاتىستى پارلامەنت دەپۋتاتتارى بۇل باعىتتا جۇمىس ىستەپ جاتقاندىعى جونىندە جاۋاپ قايتارىلدى.
ءماجىلىس سپيكەرىنە ءوتىنىش-ءتىلەكپەن كەلگەن وزگە دە ازاماتتار تولعانىستى سۇراقتارىنا تىڭعىلىقتى جاۋاپ الىپ, ورال بايعونىس ۇلىنا العىس سەزىمدەرىن جەتكىزدى.
باقبەرگەن امالبەك, اقمولا وبلىسى.